Read abua Ẹḍua 2 Bible Online

Ẹḍua 2 - abua bible

Ẹḍua 2

¹Oniin oye ọlo eghun aLivai kụ ạghi aphin ạnir ọnyo ạbidi,

²kụ ạmaranaan olephiri ọony. Mem dị ạnir phọ ạmiin ẹnighe ọony phọ kụ ạaghi nyọdi ịraar ụnwanyu.

³Kụ útue mun ụbooghi, kụ ạsighe ikpu aloom egunum agbul ạḅay ịdi ạmuum káḍigh, kụ ạlogh mọony phọ ologhi aseere esi dị kepooph ọgbal ọphiiny phọ.

⁴Kụ umarani ọony phọ ạbona esi dị ẹkel ophogh ghan ịlo kemitenaan nyọdi.

⁵Kụ ọnyani ọdaam eelhe phọ aru esiḍia owura ạmuum, kụ ạnmanyaan-otu ọdi orelhe yogh ghan ẹpe ọgbal ọphiiny phọ. Kụ ạmiin egunum mọ sịphe ikpu phọ, kụ arom oniin ọnyani phọ mọ ạghi ạsighe aruom nyịno.

⁶Kụ ọnyani ọdaam eelhe phọ rokpegheron kụ ạmiin ọony phọ dị ramoghi. Kụ aḍigh igbiririph esi ọdi kụ ạḅem mọ, “Ọphon oniin ọony ọlo aHibru phọ.”

⁷Kụ umarani ọony phọ apuru ọnyani ọdaam eelhe phọ mọ, “Mị ụki ạmaghanaan nyịna oniin ạnir ọnyo aHibru dị kaakonominaan nyịna mọony phọ ḍụghum?”

⁸Ọnyani ọdaam eelhe phọ ạḅeni nyọdi mọ, “Kịa.” Kụ ọdi ạghi ạmagh onhiin ọony phọ.

⁹Ọnyani ọdaam eelhe phọ ạḅeni ạnir phọ mọ, “Pạm mọony phọ ọphon agheelom, uukonominaan imi, mị kạkpe ni nyịna ikpoki arookonom.” Kụ ạnir phọ ạpham mọony phọ agheelom aakonom.

¹⁰Kụ ọony phọ rọmanam kụ ạnir phọ ạsighe nyọdi aḅulemi ạghiom ọnyani ọdaam eelhe phọ. Kụ ọdi ạsighe ọony phọ mọ ọlo ọno. Kụ ọdi ạatughian mọ, “Mị ụḅom nyọdi ologhi ạmuum kụ iḍighi kụ mị akol ḍien ọdi mọ aMozis.”

¹¹ Eniin aḍio, mem dị aMozis mạmanam, ọdi amite ni ạghi ophogh ạbuo aHibru awe phọ ọdi, kụ ạmiin ịdi ọkpaariom ghan bịdi oḍighi ịikpara iiḍighi. Rọmiin dị ọnyo Ijipt rakuphogh oye ọlo aHibru,

¹²ọdi ạnmanaghian, aphogh ẹphen aphogh ẹpe, oye ọ́miin, kụ aghiigh ọlo Ijipt phọ bịn aguph esi ịisaar aḍi.

¹³Ḍịeri phọ aḍio phọ kụ ọdi ạḅile ạghi kụ ạmiin ịdi ịyal awe ạbuo aHibru robeeghi, kụ ọdi ạḅeni nyọpo ạpioman bọ mọ, “Esi ika kụ ẹdi nạ ạtu bọ rakuphogh onyoogbo phọ ạna?”

¹⁴Kụ ọdi ạphagharanaan apuru nyọdi mọ, “Ạnhian kụ aḍighi bọ nyịna uwo ẹmhu rꞌoogboom ịiruen dị nạ kusophonaan iyoor ọoruen? Nạ rạwa ghan oghiigh aani ạmi ịdipho nạ aghiigh bọ nyọpo Ijipt phọ ḍụghum?” Kụ eḍigh ruugu esi aMozis, kụ aloghoma loor mọ, “Awe molhegheri ni ịphen phọ.”

¹⁵Kụ mem dị ọdaam eelhe phọ ạnaghan bọ ịphen phọ, kụ aasophoghian ghan Mozis ịlo oghiigh. Kụ aMozis asuma ạḍua risigh ọdaam eelhe phọ, ạghi arugh ẹpe de ạMidian.

¹⁶Eniin aḍio, aMozis odi ọgbal aghuḍia ạtol ude, kụ oḍual ạnmanyaan aJetro oyil ạrikia ọlo ạMidian phọ uru ni ọkpaaghi ạmuum odoghoḍi arokoom ạmuum dị iyool-ịga rꞌạrutu-ịga ọde phọ ạbidi kẹpughol ghan.

¹⁷Kụ buniin abupoghom iyool-ịga oru ophorogh nmạnyaan phọ. Pọ kụ amem dị aMozis aḅetenu ạloghonaan bịdi ḍịghaagh ạngo ịnam mọ mụum.

¹⁸Mem dị bịdi origheel osi ọteeny Jetro ọde phọ ạbidi, ọdi apuru mọ, “Uḍighi ika kụ nyina ẹnuun ịduon erigheel rodon?”

¹⁹Kụ bịdi ọḅeni nyọdi mọ, “Oniin ọnyo Ijipt kụ ụtagharan iyoor ḍịghaagh abukoriom iyool-ịga phọ, ạḅile ụkpaaghinaan iyoor mụum dị ịnam mọ ẹpughol.”

²⁰Kụ apuru nmạnyaan phọ ọdi mọ, “Oye phọ odi ẹghen? Uḍighi ika kụ nyina ẹwile bọ nyọdi erigheel? Ịki ẹmagh ọdi aru olhe eḍien rꞌayira.”

²¹Kụ ẹḅeeraan Mozis orughan rꞌoye phọ kụ oye phọ ạngo oniin ọnyani ọdi Zipora mọ aphin.

²²Ọnyani phọ ạmaranaan Mozis olephiri ọony, kụ aMozis aloghoma mọ, “Mị ooruen sịen ade phọ ạḍien kụ mị akol ḍien ọdi mọ aGersom.”

²³Ịman ni sịa kụ ọdaam eelhe phọ Ijipt amugh, kụ awe phọ Ịzirel rọkunuma ghan dọl ạrebene phọ ạbidi, kụ omoghi ghan ọmoogh ạpeleeny. Kụ Ẹnaan ẹnaghan emoghi ịminimiin phọ ạbidi.

²⁴Kụ Ẹnaan ẹnaghan ịḅiphighu phọ ạbidi kụ ẹetughian ịyo phọ ọdi aghiran bọ rꞌEbraham rꞌẠizik rꞌạJekob.

²⁵Ọdi ạmiin dọl ạrebene awe phọ Ịzirel kụ ạnmanaan bịdi ighirigiir.