Read abua Ẹḍua 24 Bible Online

Ẹḍua 24 - abua bible

Ẹḍua 24

¹Ọmoogh-we phọ ạḅeni Mozis, “Tue ạnyu eegum mọ ụteeny ịmi, nạ rꞌEeron, ạNadab, Abihu rꞌoḍualdi abuḍiemiom mọ Ịzirel; kụ nyina ẹtol repogh bịn ekpuḍian iiseeny ịmi.

²Ogina ạna bịn kụ aru utuman ịmi. Awe phọ kúsi rosi eegum mọ.”

³AMozis ạghi ni ạteeny we phọ ạghaaph oomo ịpe Ọmoogh-we phọ ạto bọ ạḅeni bịdi kụ oomo awe phọ ọphagharanaan mọ, “Yoor koḍighi ni oomo ịpe Ọmoogh-we phọ mạḅem bọ.”

⁴AMozis ạge ni oomo ịto Ọmoogh-we phọ aseere loor ạḍinya. Eḅon ạḍiroor ạḍieri phọ aḍio phọ, ọdi ạkan enmeny ạrikia sịphe azin eegum mọ kụ ạmeremi ḍioph rꞌịyal ạrana, ẹdaphan ḍioph rꞌịyal arughunughun phọ Ịzirel.

⁵Kụ ọdi arom ugheel ạnmuny, kụ bịdi ọze sịnam oguom nịan, kụ oḍighinom rạraar aghuḍum ẹboroph ọngo Ọmoogh-we phọ.

⁶AMozis ạsighe iniin ịḅaal phọ ạlogh ologhi ạrukpa, ạsighe ịpheri phọ ạsaraghiom enmeny phọ.

⁷Kụ ọdi ạsighe ḍịnya ịyo phọ, ḍịphe ọge bọ ịto Ọmoogh-we phọ, kụ ạal ạḅeni weye phọ. Kụ bịdi ọphagharanaan mọ, “Yoor kọnaghanan ni Ọmoogh-we phọ ọḅile oḍighi oomo ịlo ọdi mạto.”

⁸Kụ aMozis ạsighe ịḅaal phọ ịpe ẹrol bọ rụkpa phọ ọdi ạsaraghiom weye phọ ọdi ạḅem, “Ịphen ịḅaal phọ emeremi bọ ịyo phọ ịpe Ọmoogh-we phọ aghiran bọ rꞌanyina mem mọ ọdi ạngo bọ oomo ịtooghi phọ ịphen.”

⁹AMozis, Eeron, ạNadab, Abihu ḅịle rꞌoḍualdi abuḍiemiom mọ Ịzirel ụsiiny ni eegum mọ

¹⁰kụ bịdi ọmiin Ẹnaan phọ Ịzirel. Eeḍian ạrada aruwol phọ ọdi ịghigh mụdi uḅolom rạna dị eḍighi ạbiloogh ịdipho okuaḍio phọ.

¹¹Ẹnaan ị́liom buḍiemiom mọ Ịzirel ạbuen phọ; bịdi ụmiin ni Ẹnaan, kụ bịdi ọḅophoghan olhe ọḅile ọphughol.

¹²Ọmoogh-we phọ ạḅeni Mozis mọ, “Sịiny eegum mọ aru ụteeny ịmi. Mị kạngo nyịna ịyal asighiigh dị ọge oomo iilogh phọ kotomoghiom bọ weye phọ.”

¹³AMozis rꞌaJosua ọḅarama phọ ọdi ookolobian kụ omiigh ọsiiny eegum iigbia phọ.

¹⁴AMozis ạḅeni buḍiemiom mọ, “Ikori iyoor sịen arugbogo phọ tụtu yoor oḅula. Eeron rꞌaHur odi ni sịen rꞌanyina; awe lọ ọmoogh ọgbaragbara ọghi bịdi ọghaaphogh.”

¹⁵AMozis ạsiiny Eegum aSainai kụ ọotu aakpereghiom.

¹⁶Aḍigbogh ạḍimu Ọmoogh-we phọ esoorom eegum mọ. Esi awe phọ Ịzirel ạḍiḅaal phọ ịghigh nịan dị reemor ạnyu eegum mọ. Ọotu phọ aakpereghiom eegum mọ odiiny aḍughul-otu kụ omuneniom oḍual aḍio phọ kụ Ọmoogh-we phọ ạmagh Mozis sịphe ọotu phọ.

¹⁸Kụ aMozis ạghi aḍigh pạ ologhi ọotu phọ kụ ạsiiny eegum mọ, kụ ạrol sịphe inyadi aḍio.