Read abua Ẹḍua 27 Bible Online

Ẹḍua 27 - abua bible

Ẹḍua 27

¹“Ịsighe oreeny ạkasia kụ ẹkanam enmeny ạrikia. Inya phọ ạraghaagh phọ eeleeny ni, 2.2 akuḅu ḍịdoony, ḅịle 2.2 akuḅu ḍịregh, ḅịle kẹn 1.3 akuḅu ḍiphoph.

²Ịlogh ni sịogho inya phọ aruukuna ẹpe ạnyu phọ. Ạsiogho phọ ẹḅophan ni rꞌenmeny phọ kụ eekpereghiom oomo phọ ọdi enaba.

³Ịsighe enaba kụ ẹlemom sịgbagba ọboorom ọoru, rụsua, rụkpa, ịkoro ḅịle rꞌasuugh.

⁴Ịsighe enaba ẹlemom enmeny kụ ekomori inya ịkoro enaba ọphamam ẹpe aruukuna phọ.

⁵Ịkpo ẹkerekere phọ eeghelaan eeḍian enmeny phọ.

⁶Ịsighe rọkolom ạkasia dị ogbul enaba ẹkaam ịkolom,

⁷kụ eḅughe sịphe ịkoro phọ edi bọ ịigaany enmeny phọ mem lọ ophoophe.

⁸Ịsighe ikpooghi kụ ẹkaam enmeny phọ kụ ẹwile ẹpe ologhi phọ aphoghogho, ọdaphan ịpe mị aḍeenaan bọ nyịna sịphe ạnyu eegum mọ.”

⁹“Ịsighe ịyegheyeghe arukpe kụ ẹkpo eghoonyom Ogbogo Ạdol Ọmoogh-we phọ. Ạga esoorom mọ, arukpe phọ eḍighi inyadi rꞌinya akuḅu ḍịdoony.

¹⁰Ịsighe ịyaldi ạroko enaba kụ egim, ẹḅile ẹsighe ịyaldi ạroko enaba esuom. Ạroko phọ ẹmoogh ni ịkoro rꞌạrokolom dị oḍighinom silva.

¹¹Ịtuugh ịduon kụ eḍighi aani ḍịghaagh ephunom mọ.

¹²Ạga phọ ẹpe erumuḍio phọ remeel ghan bọ, ịkpooghi rukpe ịyaldi rꞌịyal akuḅu ḍịdoony, eguph ḍioph aropogh kụ egim iḍioph ạroko.

¹³Ạga phọ ẹpe erumuḍio phọ remite ghan bọ, ẹpe ọnhu-aḍibuo phọ odi bọ, oghoony phọ aḍighi aani ịyaldi rꞌịyal akuḅu ḍịregh.

¹⁴Tọrotoro ạḍighaagh ọnhu-aḍibuo phọ ịkpo ghan ukpe dị ạman 6.6 akuḅu, egim ịraar ạroko ẹphamam.

¹⁶Sịphe ọkaraghi ọnhu-aḍibuo phọ, ịkpo ghan ukpe dị ạman esugha akuḅu ḍịdoony aḍighi ọyegheyeghe ukpe dị ooteneghiom ạbiloogh, oghozo ḅịle rꞌọtogh-tọgh ogbidagbida ukpe kụ ọḅile olo ọnighemi. Igim inya ạroko kụ ẹphamam.

¹⁷Oomo phọ ạroko phọ ekitonom bọ oghoony phọ kokpoghom ikpo arukuron asilva ḅịle ịkomom mọ ạbidi eḍighi silva kụ ade phọ eḍighi enaba.

¹⁸Oghoony phọ aḍighi inyadi rꞌinya akuḅu ḍịdoony, ịyaldi rꞌịyal akuḅu ḍịregh, ḅịle 2.2 akuḅu ạnyu. Arukpe phọ eḍighi ọyegheyeghe ukpe kụ ade phọ eḍighi enaba.

¹⁹Oomo phọ ạraraar phọ koḍighinom ghan bọ sịphe Ogbogo phọ, oomo ạsikan phọ kẹpam bọ Ogbogo phọ rꞌoghoony phọ iḍighinom enaba.

²⁰“Tọ ạḅeni we phọ Ịzirel mọ ọsighe ọkar amugey ạmunum-ọliv oruom nyịna ạlogh ghan ọtozi phọ, pịdi ọsu ghan tọrotoro adulhe.

²¹Eeron rꞌạnmuny phọ ọdi kụ kọsu ghan ọtozi phọ sịphe Ogbogo Ạdol phọ ạmi ẹphen esumanan ukpe phọ ọkpo bọ osophoghom Igbe Ịyo phọ. Ọtozi phọ kaamor ghan sịphe ạdol phọ ạmi emiigh dulhe tụtu ẹḅaal ḍịroor. Awe phọ Ịzirel rꞌẹemara ẹemara ạbidi ooko ologh phọ ọphon kꞌagee-pọ.