Read abua Ẹḍua 35 Bible Online

Ẹḍua 35 - abua bible

Ẹḍua 35

¹AMozis aakpomoghi ni oomo awe phọ Ịzirel kụ ạḅeni mọ, “Ịphen kụ ịdi Ọmoogh-we phọ ạtol mọ oḍighi ghan:

²Nyina ẹmoogh odiiny aḍio okumuan ghan, kụ ọlo omuneniom oḍual aḍio phọ eḍighi ḍio iigbia, ḍio ophooghian dị mọḅogh ụngo ịmi Ọmoogh-we phọ. Oye lọ akumuan ḍio phọ ạḍiphe kokiigh ni.

³Rꞌạnian kẹ́kpooni ruutu anyina ḍio ophooghian phọ.”

⁴AMozis ạḅeni oomo awe phọ Ịzirel, “Ịphen kụ ịdi Ọmoogh-we phọ ạto:

⁵Ịngo ghan inmo Ọmoogh-we phọ. Tọrotoro oye lọ rạwa ọngo ạsighe aru inmo agol, asilva rꞌenaba;

⁶ọyegheyeghe ukpe; ạbiloogh, oodor rꞌọtogh-tọgh ogbidagbida ukpe; ukpe lọ oloom suphuugh ạrutu-ịga;

⁷ozu idughuna dị ọtoghomi; ọyegheyeghe ozu ạnam, oreeny ạkasia;

⁸mụnum ọsuom ịtozi phọ; rạraar lọ kẹnighemi mụnum-ịko phọ ẹḅile ẹdughemi eḍu ịnsens phọ;

⁹ikpo ẹbe ḅịle rꞌịnon ọdo ịikia ạrana dị kọkpooghi onyoraam, ọḅile okophom odaam-ekpologhi ogbogh oyil ạrikia phọ.

¹⁰“Oomo awe ẹmaar sịen ogbo phọ anyina oru oḍighi tọrotoro ịlo Ọmoogh-we phọ ạto:

¹¹Ogbogo phọ, ukpe osophom ologhi phọ rꞌạnyu phọ, ịkomom ọdi, ḅịle ịḅagham mọ, ịpe ogbonoghi bọ ạnyu phọ, ạroko phọ, ịpe ade phọ;

¹²Igbe Ịyo phọ, ariisi ọpham mọ, ekpereghi phọ, ḅịle rꞌukpe-ogbo phọ ọkpo bọ osophom nyọdi;

¹³ịdaabili phọ, ariisi ọpham mọ, ḅịle rꞌoomo ạraraar phọ kọḅamaghi bọ; ạbred phọ ọngo bọ Ẹnaan phọ;

¹⁴ọmeremiom ọtozi ịlo ọngo ạḍiḅaal phọ, ịtozi phọ rꞌạmunum mọ ạbidi;

¹⁵enmeny ọsu ghan ịnsens phọ ḅịle rꞌariisi ọpham ghan, ạmunum-ịko phọ; ịnsens eeḅi eḍu phọ; ukpe ọkpo ọnhu-aḍibuo Ogbogo phọ;

¹⁶enmeny ọḅam ghan ẹkia phọ kụ ọsu, rꞌeeta phọ ọdi oḍighinom bọ enaba phọ, rꞌariisi ọpham mọ, ḅịle rꞌoomo ịpe kọḅamaghi bọ; ạgbagba ootolaam ạraghaagh phọ ḅịle rꞌẹpe ade phọ;

¹⁷arukpe ọkpooghi ẹpe ologhi phọ, ạroko phọ ọdi ḅịle rꞌẹpe ade phọ; ukpe ọkpo ọnhu-aḍibuo osoph phọ;

¹⁸ạsikan rꞌiḍigh ọkpooghiom Ogbogo phọ rꞌosoph phọ;

¹⁹ḅịle rꞌịikia ạrusuoma phọ ariil ạrikia phọ kọkpologhian ghan bọ mem lọ bịdi rokumuan sịphe Ạdol Iigbia phọ; rụsuoma iigbia phọ Eeron oyil ạrikia phọ ḅịle rꞌạnmuny phọ ọdi.”

²⁰Kụ oomo awe phọ Ịzirel ọḍuaghu,

²¹kụ tọrotoro oye lọ ẹḅeeraan ạsighe ghan inmo aruom Ọmoogh-we phọ ịduon phọ mọlhogh bọ Ogbogo Ạdol Ọmoogh-we phọ. Bịdi ụsighe ni oru oomo ạraraar lọ kọsighe kụ ọoḅereghiom ọḅile ọkolom rụsuoma oyil ạrikia phọ.

²²Oomo awe lọ ẹḅeeraan, nmạriir rꞌalephiri, ụsighe ni oru ịkomom, reḅeri-sụa, rạlha, sigulu, rꞌọdo kịrokiro ịkuta dị oḍighinom gol, kụ ọḅogh ọngo Ọmoogh-we phọ.

²³Tọrotoro oye lọ ạmoogh ịma ọyegheyeghe ukpe; ạbiloogh, oodor, mụghumo ọtogh-tọgh ogbidagbida ukpe; ukpe dị oḍighinom suphuugh ạrutu-ịga, ozu idughuna lọ ọtoghomi; mụghumo ọyegheyeghe ozu ạnam; ạsighe ni aru.

²⁴Oomo awe lọ orue osogh silva mụghumo enaba ụsighe ni oru ọngo Ọmoogh-we phọ, ḅịle oomo ạbulo ọmoogh oreeny ạkasia dị kotue oḍighinom oḍighi phọ ụsighe ni oru.

²⁵Oomo ạnmariir ẹmaar ụsighe ni oru iri, ịyegheyeghe iri ạbiloogh, oodor ḅịle rꞌịtogh-tọgh dị bịdi ọlem.

²⁶Bịdi ụsighe kẹn ni suphuugh ạrutu-ịga ọlemom iri.

²⁷Abuḍiemiom mọ ụsighe kẹn ni oru ikpo ẹbe ḅịle rꞌịnon ọdo ịkuta dị kọkpooghi ạsuoma iikpera ạraghaagh phọ ḅịle rꞌọdaam ekpologhi phọ,

²⁸rạraar lọ kẹnighemi, mụnum ịtozi rꞌạmunum-ịko phọ ḅịle rꞌodughemi eḍu ịnsens phọ.

²⁹Oomo awe phọ Ịzirel lọ ẹḅeeraan ụsighe ni inmo oruom Ọmoogh-we phọ esi oḍighi phọ ọdi ạto bọ ạngo Mozis mọ oḍighi phọ.

³⁰AMozis ạḅeni weye phọ Ịzirel mọ, “Ọmoogh-we phọ mạsaḅar Bẹzalel, ọony aUri ḅịle ọony-oko aHur, ọlo eghun aJuda,

³¹Ẹnaan memuzeḍinaan nyọdi ịikpo phọ ọdi, ạḅile ạngo nyọdi ẹmaar, olegheri-ịyaar, ḅịle rꞌikeḍi oḍighinom ạtorotoro ọkal oḍighi,

³²ọsighe agol, silva rꞌenaba ogbiighiom rꞌoḍighinom ịlo kẹnighe;

³³oogboom ịnme dị kọlogh esi; ọsighe oreeny ọkaam ịyaar; ḅịle rꞌạtorotoro oḍighi dị koḍighinom ẹmaar.

³⁴Ọmoogh-we phọ mạngo nyọdi rꞌOholiab ọony Ahisamak, ọlo eghun ạDan, ikeḍi ọtughemiom ạbunon awe ẹmaar.

³⁵Ọdi mạngo bịdi ẹmaar oḍighinom oomo iiḍighi ạmaka, ọlogh ịnme, ḅịle rꞌoloom ọyegheyeghe ukpe; ạbiloogh, oodor, ḅịle rꞌọtogh-tọgh ogbidagbida ukpe; ḅịle rꞌọnon ukpe. Bịdi kotue ni oḍighi ịdo kịrokiro iiḍighi; ḅịle rꞌọlogh ịma ịnme.