Read abua Ẹḍua 37 Bible Online

Ẹḍua 37 - abua bible

Ẹḍua 37

¹ẠBezalel ạsighe oreeny ạkasia kụ ạkaam bọ Igbe Ịyo phọ; 110 ẹkulom ạḍighaagh ḍịdoony, 66 ẹkulom ạḍighaagh ḍịregh, 66 ẹkulom ạḍighaagh ḍiphoph.

²Ọdi agbul ogey agol ologhi phọ rꞌạnyu phọ, kụ ạsighe gol ạloghom ḍịmaam akitonom ruukuna phọ.

³Kụ ọdi ạsighe inya ịkomom dị oḍighinom gol atulom inya phọ aruwol phọ, ịyal ịne ẹrol ghan ḍịghaagh.

⁴Ọdi ạsighe oreeny ạkasia dị ogbul gol kụ ạloghom ịkoro

⁵kụ aḅughe sịphe ịkoro phọ ọman atum ọman Igbe phọ.

⁶Ọdi ạsighe ogey agol ạkaam ekpereghi, 110 ẹkulom ạḍighaagh ḍịdoony, 66 ẹkulom ạḍighaagh ḍịregh.

⁷Ọdi ạsighe gol ạgurogh ạpeḅeremi ạkaam ịyal ạruukpaany aghuḍuul dị ẹmoogh raphaaph,

⁸oniin ạrol eniin eekuna ekpereghi phọ. Kụ ọdi ạka bịdi ạḅaraghiom ekpereghi phọ.

⁹Ạruukpaany aghuḍuul phọ ẹmoogh bọ raphaaph phọ iisomanan ni, ḅịle araphaaph phọ ạbidi ẹetaranu eghoph Igbe phọ.

¹⁰Ọdi ạsighe oreeny ạkasia kụ ạkaam bọ ịdaabili phọ; 88 ẹkulom ạḍighaagh ḍịdoony, 66 ẹkulom ạḍighaagh ḍịregh, 44 ẹkulom ạḍighaagh ḍiphoph.

¹¹Ọdi agbul oomo phọ ịdi ogey agol, ạḅile ạsighe gol ạghoorom ọokpo ẹpe eekuna phọ akitonom.

¹²Kụ ọdi ạsighe gol ạḅagham ruukuna phọ akitonom, 7.5 ẹkulom ạḍighaagh ḍịregh.

¹³Kụ ọdi ạsighe gol ạkaam inya ịkoro kụ ạlogh inya phọ aruukuna phọ ẹpe aruwol phọ.

¹⁴Ariigida phọ ịpe ẹpham bọ ịkpapham mọ kopoophiom ghan bọ ịdaabili phọ ịrol etuman ẹpe ọḅagh bọ.

¹⁵Ọdi ạsighe oreeny ạkasia kụ ạkaam bọ ịkpapham mọ kụ agbul gol.

¹⁶Ọdi ạsighe gol kụ ạlemom rụkpa lọ kọḅamaghi ịdaabili phọ: sịgbagba, sịkop, izoki ḅịle rꞌiigboghom ạsigbagba lọ koḍighinom ghan mem ạrikia-amiim.

¹⁷Ọdi ạsighe ogey agol kụ ạkaam bọ ọmeremiom ọtozi phọ. Ẹpe ade phọ ḅịle rꞌẹpe ẹmeera bọ iḍighinom gol dị ọgurogh ọpeḅeremi; ịnme phọ ọdi ịḅaram ịmiigh rꞌipoola iḍighi ni pạkiri ọdi.

¹⁸Odiiny ịla ịrol sịagaany phọ, ịraar ịne ẹrol ghan pạkiri.

¹⁹Tọrotoro ọla esi odiiny phọ ạmoogh ni ịraar ịnme dị ẹghigh ipoola ọmir-ighool rꞌịmiigh.

²⁰Ẹpe ẹmeera bọ sịphe ọmeremiom ọtozi phọ ịmoogh inya ịnme dị ẹghigh ipoola ọmir-ighool rꞌịmiigh.

²¹Oniin ọmiigh ạrol ghan eeḍian ạtorotoro ịraar ịla.

²²Ịmiigh phọ, ịla phọ ḅịle rꞌọmeremiom ọtozi phọ iḍighi ni eniin ịyaar dị ọlemom gol dị ọgurogh ọpeḅeremi.

²³Ọdi ạlhem oḍual ịtozi kụ ạḅamaghi sịphe ọmeremiom ọtozi phọ, kụ ọdi ạsighe ogey agol kụ ạkaam ịkpapham mọ rꞌịteleleeny ạrukpa phọ.

²⁴Ọdi ạsighe gol dị ạman 35 igbogh ịtoom ẹemor ogey agol kụ ọkaam bọ ọmeremiom ọtozi phọ ḅịle rꞌoomo ịpheri phọ ạraraar phọ ọdi.

²⁵Ọdi ạsighe oreeny ạkasia ạkanam enmeny ọsu ghan ịnsens. Inya phọ ạraghaagh phọ eeleeny ni, 45 ẹkulom ạḍighaagh ḍịdoony, 45 ẹkulom ạḍighaagh ḍịregh, 90 ẹkulom ạḍighaagh ḍiphoph. Ạsiogho ịrol li inya phọ aruukuna phọ.

²⁶Ọdi ạsighe ogey agol kụ agbul ạnyu phọ rꞌinya phọ ạraghaagh phọ, kụ ạsighe gol ạgoor akitonom ruukuna phọ.

²⁷Ọdi ạsighe ịyal ariigida agol ạloghom ịkoro eeḍian iigbom mọ ịyal phọ ạga phọ pịdi ẹpam ịkolom mọ ịpe kopoophiom ghan bọ.

²⁸Ọdi ạsighe oreeny ạkasia kụ ạkaam bọ ịkolom mọ kụ agbul gol.

²⁹Ọdi ạḅile kẹn ni aḍighi mụnum-ịko phọ, ḅịle rꞌọser-sẹr ịnsens eeḅi eḍu dị akirion ịdipho asimeri.