Read abua Ẹḍua 38 Bible Online

Ẹḍua 38 - abua bible

Ẹḍua 38

¹Ọdi ạsighe oreeny ạkasia kụ ạkanam enmeny. Inya phọ ạraghaagh iileeny ni, 2.2 akuḅu ḍịdoony, ḅịle 2.2 akuḅu ḍịregh, ḅịle kẹn oniin 1.3 akuḅu ḍiphoph.

²Ọdi ạlhogh ni sịogho ạnyu inya aruukuna phọ, ọbo ạsiogho phọ ẹḅophan rꞌenmeny phọ. Kụ ọdi aakpereghiom oomo phọ ọdi enaba.

³Ọdi ạlhem kẹn ni oomo ạraraar phọ koḍighinom ghan bọ sịphe enmeny phọ: sịgbagba ọmughiom, rụsua, iteka ạsigbagba, rụkpa ḅịle rꞌasuugh. Oomo phọ ạraraar phọ ụlhemom enaba.

⁴Ọdi ạsighe enaba kụ ạlhemom ẹkerekere dị ạkpo eeḍian enmeny phọ kụ eeghelaan ghan.

⁵Ọdi ạlhogh ni inya ịkoro inya phọ aruukuna phọ.

⁶Ọdi ạsighe oreeny ạkasia dị ogbul enaba

⁷kụ aḅughe sịphe ịkoro phọ edi bọ ịphalagbal enmeny phọ ọbo edugh ophoophe. Enmeny phọ ụkanam ikpooghi opokoromi ẹpe ologhi phọ.

⁸Ọdi ạsighe sitamaḍiki ạnmariir phọ ạbuphe rokumu ghan bọ sịphe Ogbogo Ạdol Ọmoogh-we phọ kụ ạlhemom bọ oogboghom ạbafu enaba phọ rꞌesi oseere phọ.

⁹Ọdi ạsighe ịyegheyeghe arukpe kụ ạkpo aghoonyom Ogbogo Ạdol Ọmoogh-we phọ. Ạga phọ esoorom mọ, arukpe phọ iḍighi 44 akuḅu ḍịdoony,

¹⁰Oguph 20 aropogh kụ ogim 20 ạroko dị oḍighinom enaba, ịmoogh ni ịkomom rꞌịkasiom dị oḍighinom silva.

¹¹Ephunom oghoony phọ iniin phọ kẹn ni.

¹²Ẹpe erumuḍio phọ remeel ghan bọ, ụkpo kẹn ni rukpe phọ 22 akuḅu ḍịdoony, ugim ḍioph ạroko rꞌịkomom rꞌigbonoghineen dị ogbul silva.

¹³Ạga phọ ẹpe erumuḍio phọ remite ghan bọ, ẹpe ọnhu-aḍibuo phọ ạrol bọ, oghoony phọ aḍighi kẹn ni 22 akuḅu ḍịregh.

¹⁴Tọrotoro ạga ọnhu-aḍibuo phọ ụkpo ghan ukpe dị ạman 6.6 akuḅu kụ ogim ịraar ạroko ọphamam.

¹⁶Oomo phọ arukpe phọ ọkpo bọ oghoonyom iḍighi ọyegheyeghe ukpe.

¹⁷Ude ạroko phọ iḍighi enaba kụ ịkomom mọ, igbonoghineen phọ, ḅịle rꞌịpe ookpereghiom bọ ạnyu ạroko phọ eḍighi silva. Oomo phọ ạroko phọ ekitonom bọ oghoony phọ ukpoghom ịidoony asilva.

¹⁸Ukpe phọ ọkpo bọ ọnhu-aḍibuo oghoony phọ ulho ịma ọyegheyeghe ukpe dị oloom abiloogh, oodor, ḅịle rꞌọtogh-tọgh ogbidagbida ukpe dị ọlogh ịnme. Ukpe phọ aḍighi esugha akuḅu ḍịdoony rꞌịyal akuḅu ạnyu, ịghigh rukpe oghoony phọ.

¹⁹Ugim inya ạroko dị ude phọ aḍighi enaba. Ịkomom mọ ạbidi, ịpe ookpereghiom bọ ạnyu phọ ạbidi ḅịle rꞌigbonoghineen phọ uḍighinom silva.

²⁰Oomo ạsikan Ogbogo phọ ḅịle rꞌịlo oghoony phọ uḍighinom enaba.

²¹Ḍịen ạḍikool ạraraar phọ oḍighinom bọ Ogbogo Ạdol Ọmoogh-we phọ, sịphe oseere bọ ịyal ipoḍi asighiigh phọ ịpe ọge bọ ḍioph phọ iilogh phọ. AMozis kụ ạto mọ ọge, kụ ạbuo aLivai phọ bụphe ọrol ghan bọ ẹeḍian ịtooghi Itamar ọony phọ Eeron oyil ạrikia phọ ọge.

²²ẠBezalel ọony Uri ḅịle ọnyanyani aHur, ọlo eghun aJuda, kụ aḍighi tọrotoro ịyaar phọ ẹpe Ọmoogh-we phọ ạto bọ.

²³Ọnyo ọḅarama phọ ọdi, Oholiab ọony Ahisamak, ọlo eghun ạDan, ạmaar mạka, ọnighemi ịyaar, ḅịle rꞌolo ịyegheyeghe arukpe ḅịle rꞌabiloogh, oodor, ḅịle rꞌọtogh-tọgh ogbidagbida ukpe.

²⁴Ẹemor oomo agol phọ ọḅogh bọ ọngo Ọmoogh-we phọ mọ oḍighinom Ogbogo Iigbia phọ ịman oniin ọonir igbogh ịtoom ọkaraghi ogey ọtoom ẹemor.

²⁵Mem dị ọkar bọ ogbiighi ẹemor asilva aweye phọ osogh bọ ạman 3,430 igbogh ịtoom ọkaraghi ogey ọtoom ẹemor.

²⁶Ịphen phọ ẹman ookpomoghi oomo phọ ịpe awe dị mọmanam kụ osogh bọ, tọrotoro oye asogh ghan ni ịpe ọḅem bọ kụ ọtoom ghan ọkaraghi ogey ọtoom ẹemor. Ọrol bọ 603,550 alephiri ạnmuny dị mọman ịyaldi ạsia kụ ẹghiom ạnyu, bụphe ogbi bọ mem mọ rogbi bọ weye phọ.

²⁷Sịphe asilva phọ osogh bọ, ụsighe 3,400 igbogh ịtoom ẹemor kụ ọlhemom bọ oniin okuron ipoḍi ịpe ogborori ghan bọ ude Ogbogo Iigbia phọ ḅịle rꞌukpe phọ ọpo ọkpoom bọ, 34 igbogh ịtoom ẹemor oḍighinom ghan oniin opoḍi.

²⁸Ọphori phọ ịraardi igbogh ịtoom ẹemor asilva phọ asugha bọ, ạBezalel ạsighe aḍighinom igbonoghineen phọ, rꞌịkomom ạroko phọ, ḅịle rꞌịlo ookpereghiom ạnyu ạroko phọ.

²⁹Enaba dị ọḅogh ọngo Ọmoogh-we phọ ịman 2,425 igbogh ịtoom ẹemor.

³⁰Ọdi ạsighe ịphen phọ kụ ạlhemom bọ ipoḍi ịpe ogborori bọ ude phọ sịphe ọnhu-aḍibuo Ogbogo Ạdol Ọmoogh-we phọ, enaba enmeny phọ, ḅịle rꞌẹkerekere phọ, oomo ạraraar phọ kẹtol ghan bọ enmeny phọ,

³¹ipoḍi phọ ịpe ekitonom bọ oghoony phọ, ḅịle rꞌọnhu aḍibuo oghoony phọ, ḅịle rꞌoomo ạsikan Ogbogo phọ rꞌoghoony phọ akitonom bọ.