Read abua Ẹḍua 4 Bible Online

Ẹḍua 4 - abua bible

Ẹḍua 4

¹AMozis ạḅeni Ọmoogh-we phọ mọ, “Awe phọ Ịzirel ịmi kúmeeraam ḅịle ịmi kụ́naghanan. Mị kaḍighi ika eḍighi mạar dị bịdi ọḅem mọ nạ ómite egaan dị mị ạmiin nyịna.”

²Kụ Ọmoogh-we phọ apuru nyọdi mọ, “Ẹpe nạ ạpham bọ ḍịghaagh phọ ạna eeghe?” Kụ ọdi ạphagharanaan mọ, “Ịkpara.”

³Kụ ọdi ạḅeni nyọdi mọ, “Tebeeny ịkpara phọ ạna ude.” Mem dị aMozis atebeeny bọ bịn ịkpara phọ eten ẹkaraph-ịyaar. Kụ ọdi aghiilaan ạgbol.

⁴Kụ Ọmoogh-we phọ ạḅeni Mozis mọ, “Zuman asiph ẹsoph phọ aphoophe.” Kụ aMozis azuman asiph, kụ ẹḅile eten ịkpara sịphe ạḍighaagh phọ ọdi.

⁵“Ḍighi ịduon aḍeenaan bịdi mọ Ọmoogh-we phọ, Ẹnaan ạburude phọ ạbidi, Ẹnaan phọ Ebraham rꞌẠizik rꞌạJekob imite ni egaan esi ạna.”

⁶Ọmoogh-we phọ ạḅeni nyọdi mọ, “Lọgh ḍịghaagh ạna ipholophool ạna.” AMozis ạnaghanan kụ mem dị ọdi amitiom ḍịghaagh phọ ọdi, bịn ẹzegh iḍighi ni, ạmiin dị ẹzegh oku ufe meḍighi.

⁷Kụ Ọmoogh-we phọ ạḅeni nyọdi mọ, “Ḅịle ạlogh ḍịghaagh phọ ạna ipholophool phọ ạna.” Ọdi ạtuugh aḍighi, kụ ọdi ạḅile amitiom bịn memoon ịdipho ịpheri phọ ariisi aloor phọ ọdi.

⁸Ẹnaan ẹḅile ẹḅeni nyọdi mọ, “Mụghumo bịdi nyịna úmeeraam ịḅel ịiḍaany phọ, pọ ịphen ketir ri ekpom ạbidi.

⁹Kụ eḍighi ịdi ịyal phọ ịiḍaany phọ bịdi úmeeraam ọnaghan ịlo nạ ạḅem, pọ kịa Ọphiiny aNail akor mụum azu ude bịn katen ni ịḅaal.”

¹⁰AMozis ạḅeni Ọmoogh-we phọ mọ, “Eeye, oye dị ụmoogh ịmi, ịmi kúrom. Mị ụ́maar ọghaaph, kụ mị kọ̋ghaaph ghan kꞌamem mọ nạ rụḅaanaan ghan bọ ịmi. Anem ạmi rákem ghan ọghaaph ịyaar.”

¹¹Kụ Ọmoogh-we phọ apuru nyọdi mọ, “Ạnhian kụ ạlhem bọ ọnhu phọ oye? Ạnhian kụ aḍighi bọ oye ọḅaaghaph ḅạaghaph, ekpom ọka, ọmiin eten rꞌẹ́miin eten? Kạ́mina Ọmoogh-we phọ?

¹²Kịa nyịidipho mị kạloghonaan ni nyịna ḍịghaagh ọghaaph. Mị kạtughemi ni nyịna ịpe nạ kạkaaph bọ.”

¹³Kụ aMozis ạḅeni nyọdi mọ, “Eeye, kạ́le, oye dị ụmoogh ịmi. Mị rạaḅereghi ni nyịna, tom ọnon oye.”

¹⁴Kụ Ọmoogh-we phọ mạghagham Mozis ologhi, kụ ọdi apuru mọ, “Eeron umor phọ ạna ọnyo kꞌaLivai phọ sịphe ólho? Mị alegheri ni mọ ọdi katue ni ạkaaph ịyaar igeny. Kụ ologhi ọdi kạḅaal ọmiin ạna.

¹⁵Nạ atue ni ạḅaanaan nyọdi ạḅeni ịlo ọdi kạkaaph. Mị kạloghonaan ni ḍịghaagh ịyal phọ anyina ọnhu ọokpaan. Mị kạtughemi ni ịyal phọ anyina ịlo oḍighi.

¹⁶Ọdi kụ kaḍighi oye ọghaaph ạna kụ aghol nyịna ạḅaanaan we phọ, kụ nạ kạkigh Ẹnaan, ọḅeni ghan ọdi ịlo ọdi kạkaaph.

¹⁷Sịghe ịkpara phọ ịphen ạpham aḍighinom ịiḍaany.”

¹⁸AMozis aḅula kꞌaJetro ọyogo phọ ọdi kụ ạḅeni nyọdi mọ, “Seseeny, mị rạaḅereghi ni nyịna, meera mị ụki ẹpe Ijipt ụteeny siya ạmi, mị ụmiin mọ bịdi odi ni eye.” AJetro ameera kụ ạngo nyọdi ọghor eeḅi erelhe.

¹⁹Mem dị aMozis odi ni sịphe Mịdian, Ọmoogh-we phọ ạḅeni nyọdi mọ, “Ḅula ẹpe Ijipt, ịdi eḍighi bọ oomo awe phọ ạbuphe ọwa ghan bọ oghiigh ạna momuughu.”

²⁰AMozis ạsighe ạnir phọ ọdi rꞌạnmuny phọ ọdi ạsaany ọman ẹnam adool kụ anyeeniom ẹpe Ijipt. AMozis ạpham ịkpara phọ Ẹnaan ẹḅeni bọ nyọdi mọ ạpham mọ ḍịghaagh ọdi.

²¹Ọmoogh-we phọ ạḅeni Mozis mọ, “Nyịidipho nạ raḅula bọ ẹpe Ijipt, ḍighi yogh risigh ọdaam eelhe phọ oomo ịiḍaany phọ ịpe mị ạngo bọ nyịna ịnyaam oḍighi yogh phọ, kụ mị kaḍighi ni ịdi ọdaam eelhe phọ kạḅaar ẹmhu, kụ ọdi kámeera mọ awe phọ ogheel.

²²Ịduon kụ ịdi nạ kạḅeni bọ ọdaam eelhe phọ mọ, ‘Mị Ọmoogh-we phọ ạḅem ịduon mọ Ịzirel ọkpana ọony ạmi.

²³Mị rạḅeni nyịna mọ meera mọ ọony phọ ạmi agheel, ọbo ọdi ukumu ịmi. Kụ eru mạar dị nạ úmeera mọ ọdi agheel, pọ mị kakiigh ọkpana ọony phọ ạna.’”

²⁴Rosi esi dị ozu ogbogo mem mọ ọdi roḅula ẹpe Ijipt, Ọmoogh-we phọ azuan Mozis kụ ạwa oghiigh ọdi.

²⁵Kụ aZipora ạsighe opoḍi ẹna dị eroph aḍunom mọony phọ ọdi, oodu phọ atebenaan ruwol aMozis kụ ạḅem mọ, “Nạ olhom ịḅaal esi ạmi.”

²⁶Loor iḍun phọ kụ ẹdi aZipora ạtu bọ kụ ạḅeni Mozis mọ, “Nạ olhom ịḅaal esi ạmi” phọ. Esi ịphen phọ kụ ẹdi Ẹnaan ẹwilenaan Mozis.

²⁷Ọmoogh-we phọ ạḅeni Eeron mọ, “Kịa ẹpe ẹdala phọ ạteeny Mozis.” Ọdi ạghi kụ azuan Mozis ẹpe eegum mọ Ẹnaan, kụ ạkpun nyọdi.

²⁸Kụ aMozis ạghaaph oomo ikpo ọnhu Ọmoogh-we phọ mem mọ ạḅeni bọ nyọdi oḅula ẹpe Ijipt ạḅeni Eeron, rꞌoomo ịiḍaany phọ ịpe ọdi ạḅeni bọ nyọdi oḍighi yogh phọ.

²⁹Kụ aMozis rꞌEeron ọghi ẹpe Ijipt ookpomoghi oomo ikumoor awe phọ Ịzirel.

³⁰Kụ Eeron ạghaaph oomo ịpe Ọmoogh-we phọ ạḅeni bọ Mozis, kụ aMozis aḍighi ịiḍaany phọ egbodo oomo awe phọ.

³¹Kụ awe phọ omeeraam. Mem dị bịdi ọnaghan bọ mọ Ọmoogh-we phọ maru apogh we phọ Ịzirel ạḅile ạmiin ịminimiin phọ ạbidi, bịdi ozumeri yogh rụmhu ạbidi ude kụ ọoḅereghi.