Read abua Ẹḍua 6 Bible Online

Ẹḍua 6 - abua bible

Ẹḍua 6

¹Kụ Ọmoogh-we phọ ạḅeni Mozis mọ, “Mẹteeny, nyịidipho nạ kạmiin ịdi mị kaḍighi ọdaam eelhe phọ. Mị kạkpaariom nyọdi mọ ameera awe phọ ạmi ogheel, ọdi kụ kaporogh bịdi amitiom sịphe ade phọ.”

²Ẹnaan ẹḅeni Mozis ịduon mọ, “Mị kụ Ọmoogh-we phọ.

³Mị umite ni egaan ghisigh Ebraham rꞌẠizik rꞌạJekob ịdipho Ẹnaan Oomo Ịikpo, kụ mị úḍighi ịlo bịdi kolegheri ḍien phọ ạmi Ọmoogh-we phọ.

⁴Kụ mị ạḅile agananami ịyo phọ bịdi rꞌạmi oghiran bọ, mọ mị kạngo bịdi de phọ aKenan, de phọ ạḍiphe bịdi ọrol bọ iiruen phọ.

⁵Kụ mị mạnaghan ni ịkuph awe phọ Ịzirel, bụphe ạbuo Ijipt phọ oseere bọ dọl ạrebene, kụ mị mạatughian ịyo phọ ạmi.

⁶Loor ịduon phọ ḅẹni we phọ Ịzirel mọ, ‘Mị kụ Ọmoogh-we phọ. Mị kịsighe ni inyina esi ịminimiin phọ Ijipt rịmiine bọ inyina. Mị kịsighe ni inyina esi ạdol ạrebene phọ. Mị kapoophe ni ḍịghaagh iphelegbe ạmi ịtagharan inyina rꞌịgbagara ịiruen.

⁷Mị kịsighe ni inyina awe phọ ạmi aloghoma kụ mị aḍighi Ẹnaan anyina, kụ nyina egbi olegheri mọ mị kụ Ẹnaan Ọmoogh-we phọ anyina, ọpo ịtagharan bọ inyina ạsighe esi ạdol ạrebene phọ ẹpe Ijipt.

⁸Kụ mị ịsighe inyina asiemi ẹpe ade phọ ḍịphe mị aghunya bọ ọngo Ebraham rꞌẠizik rꞌạJekob. Mị kịngo inyina ịdipho erua. Mị kụ Ọmoogh-we phọ.’”

⁹AMozis ạghaaph ịphen phọ ạḅeni we Ịzirel, kụ bịdi ụ́naghanan Mozis ịdi eḍighi bọ uwaloor ạbidi makururu loor esi ạdol ạrebene phọ.

¹⁰Kụ Ọmoogh-we phọ ạḅeni Mozis mọ,

¹¹“Kịa ạḅeni ọdaam eelhe phọ Ijipt mọ, ‘Meera awe phọ Ịzirel ọḍua sịphe ade phọ ạna ogheel.’”

¹²Kụ aMozis ạḅeni Ọmoogh-we phọ mọ, “Awe phọ Ịzirel ịmi rụ́naghanan ghan, ọdaam eelhe phọ kaḍighi ika kụ ụnaghanan bọ ịmi, mịna aru bọ oye eema phọ?”

¹³Ọmoogh-we phọ ạto ạḅeni Mozis rꞌEeron mọ, “Ịḅeni we Ịzirel rꞌọdaam eelhe phọ Ijipt mọ mị kụ irom bọ inyina mọ iḍiemiom we Ịzirel emitenom sịphe ade phọ Ijipt.”

¹⁴Bụen kụ ạbuo ạrumhu sịphe arughunughun ạburude phọ ạbidi. Ạnmuny aRuben ọkpana ọony phọ Ịzirel ạbuen: Hanok, aPalu, ạHezron rꞌaKami. Bụen iipolo aRuben.

¹⁵Ạnmuny ạSimion ạbuen: ạJemuel, aJamin, Ohad, aJakin, aZohar rꞌaSaul, ọony ạnir ọlo aKenan. Bụen iipolo ạSimion.

¹⁶Ịphen asiḍien ạnmuny aLivai, ọto atum ọto: Gerson, aKohat rꞌaMerari. ALivai ạman bọ 137 ạsia.

¹⁷Ạnmuny aGerson: aLibni rꞌaSimei, bụo ọto rꞌopolo, oghiil atum oghiil.

¹⁸Bụen kụ ạnmuny aKohat: Ạmram, Izhar, ạHebron rꞌỤziel. AKohat ạman bọ 133 ạsia.

¹⁹Bụen kụ ạnmuny aMerari: aMahli rꞌaMusi. Bụen iipolo aLivai, oghiil atum oghiil.

²⁰Ạmram ạsighe Jọkebed ọony umarani ọde ọdi aphin kụ ạmaranaan nyọdi Mozis rꞌEeron. Ạmram ạman bọ 137 ạsia.

²¹Ạnmuny Izhar ạbuen: aKora, aNefeg rꞌaZikri.

²²Ạnmuny Ụziel ạbuen: ạMisael, Ẹlzafan rꞌaSitri.

²³Eeron aphin Eliseba ọnyani Ạminadab, umarani aNason, kụ ạmaranaan nyọdi Nạdab, Abihu, Ẹliazar rꞌItamar.

²⁴Bụen kụ ạnmuny aKora: Asir, Elkana rꞌAbiasaf; bụen ạriikpigh ọto aKorahait.

²⁵Ẹliazar ọony phọ Eeron aphin ọnyani ạPutiel, kụ ạmaranaan nyọdi Fịnehas. Bụen kụ ạbuo ạrumhu sịphe eghun aLivai bụo ọto rꞌopolo.

²⁶Eeron rꞌaMozis kụ ạbudi Ọmoogh-we phọ ạtu bọ kụ arom mọ ọghi ọsighe rughunughun awe phọ Ịzirel ọḍuanam ẹpe ade phọ Ijipt.

²⁷Bịdi kụ ạbudi ọtu bọ ọghi ọḅeni ọdaam eelhe phọ Ijipt mọ ạwile we phọ Ịzirel ọḍua Ijipt ogheel.

²⁸Ḍio phọ ạḍiphe Ọmoogh-we phọ ạghaaph bọ ạḅeni Mozis ẹpe Ijipt, ọdi ạḅem mọ,

²⁹“Mị kụ Ọmoogh-we phọ. Kịa ạghaaph oomo ịpe mị ạḅeni bọ nyịna ạḅeni ọdaam eelhe phọ Ijipt.”

³⁰Kụ aMozis ạḅeni mọ, “Mịna oye eema phọ. Ọdaam eelhe phọ kụ́naghanan ni ịmina.”