Read abua Ẹḍua 7 Bible Online

Ẹḍua 7 - abua bible

Ẹḍua 7

¹Ọmoogh-we phọ ạḅeni Mozis mọ, “Mịin, mị maḍighi nyịna dịadi Ẹnaan esi ọdaam eelhe phọ Ijipt. Eeron umor phọ ạna kaḍighi oyil ạna.

²Nạ kạkaaph ghan oomo ịpe mị kạḅeni bọ nyịna, kụ Eeron umor phọ ạna ạkaaph ghan ạḅeni ọdaam eelhe phọ mọ ọdi ạwile we Ịzirel bịdi ọḍua sịphe ade phọ.

³Mị kạngo ni ọdaam eelhe phọ ọḅaar ẹmhu, kụ ghạlamo mị umiteghom ni ịminighan areḍeenaan rꞌịiḍaany phọ ạmi sịphe ade phọ Ijipt,

⁴ọdi nyịna kạ́naghanan, kụ mị kabiririom ni ḍịghaagh ạmi Ijipt. Mị kạliom ni we phọ Ijipt igey kụ mị ạsighe we phọ ạmi Ịzirel amitiom sịphe ade phọ.

⁵Awe phọ Ijipt kolegheri ni mọ mị kụ Ọmoogh-we phọ, mem mọ mị kabiririom bọ bịdi ḍịghaagh phọ ạmi, kụ ạsighe we phọ Ịzirel ogbo ạbidi amitiom.”

⁶AMozis rꞌEeron ụtuugh ni ịpe Ọmoogh-we phọ ạḅeni bọ bịdi oḍighi.

⁷AMozis ạman bọ ọphaanyadi ạsia, Eeron ạman bọ ọphaanyadi rꞌịraar ạsia, mem mọ bịdi ọḅaanaan bọ rꞌọdaam eelhe phọ.

⁸Ọmoogh-we phọ ạḅeni Mozis rꞌEeron mọ,

⁹“Mem lọ ọdaam eelhe phọ ịḅeni inyina mọ, ‘Imitiom eḍeenaan’, kụ ạḅeni Eeron mọ, ‘Sịghe ịkpara phọ ạna atebeeny ude risigh ọdaam eelhe phọ Ijipt, kụ eten ẹkaraph-ịyaar.’”

¹⁰AMozis rꞌEeron ọghi kꞌọdaam eelhe phọ kụ ọtuugh ịpe Ọmoogh-we phọ ạḅeni bọ bịdi oḍighi: Eeron ạsighe ịkpara phọ ọdi atebeeny ude risigh ọdi rꞌabutelhedom mọ ọdi, bịn ịkpara phọ eten ẹkaraph-ịyaar.

¹¹Ọdaam eelhe phọ ạmagh we olegheri ịyaar rꞌạbuo ịiḍaany sịphe Ijipt kụ bịdi oghal kụ ẹtuugh ịduon phọ eḍighi aani.

¹²Tọrobo ọnyo ạbidi ạsighe ghan ịkpara ịlo ọdi atebeeny ude bịn eten ẹkaraph-ịyaar, kụ ịkpara phọ Eeron ẹminogh ịkpara phọ ịpe ạbidi.

¹³Ologhi phọ ọdaam eelhe phọ ódugh ạgbagara ni, ọ́naghanan ịpe bịdi rọkaaph bọ, ịdipho Ọmoogh-we phọ mạtuugh bọ ạḅem.

¹⁴Ọmoogh-we phọ ạḅeni Mozis mọ, “Ologhi ọdaam eelhe phọ Ijipt ạgbagara ni, dị ómeera mọ awe phọ ạmi ogheel.

¹⁵Kịa ạteeny nyọdi ḍịroor mem lọ ọdi rạki ẹpe esiḍia phọ, akori nyọdi ẹpe ịpaḅi Ọphiiny aNail. Pạm ịkpara phọ ịpe eten bọ ẹkaraph-ịyaar phọ,

¹⁶kụ ạḅeni nyọdi mọ, ‘Ọmoogh-we phọ, Ẹnaan awe phọ aHibru, kụ urom ịmi oru ọḅeni ạna mọ, “Meera awe phọ ạmi ogheel, ọghi ukumu ịmi ẹpe ẹdala phọ, kụ kꞌạnyiidipho nạ ómeera.”’

¹⁷Ọmoogh-we phọ ạḅem ịduon mọ, ‘Esi ịphen kụ ẹdi nạ kalegheri mọ mị kụ Ọmoogh-we phọ: pogh, mị kạsighe ịkpara phọ ịphen mị ạpham bọ ạgur mụum Ọphiiny aNail, ạmuum mọ kakitonu aten ịḅaal.

¹⁸Ina phọ edi bọ pạ Ọphiiny aNail kemuughu ni, kụ ạmuum mọ ọphiiny phọ kapur ri dị awe phọ Ijipt kótue ọpughol.’”

¹⁹Ọmoogh-we phọ ạḅeni Mozis mọ ạḅeni Eeron mọ, “Sịghe ịkpara phọ ạna ạpham, asele ḍịghaagh ạna aphoghomiom oomo ạrumuum mọ rꞌạriphiiny phọ Ijipt, rụunu phọ rꞌạruudu phọ. Sịphe oomo ade phọ Ijipt, ạrumuum keten ịḅaal, ạreepe ạmuum, mꞌaroko ireeny mꞌịzoki asighiigh.”

²⁰AMozis rꞌEeron ụtuugh ni ịpe Ọmoogh-we phọ ạḅeni bọ bịdi oḍighi. Risigh ọdaam eelhe phọ rꞌabutelhedom mọ ọdi, Eeron aphoophe ịkpara phọ ạgur mụum Ọphiiny aNail, kụ oomo ạmuum ọphiiny phọ akitonu aten ịḅaal.

²¹Ina Ọphiiny aNail emuughu. Ạmuum rapur, ọ́nighe ịlo awe Ijipt phọ kọ́pughol. Oomo ade phọ Ijipt iḍighi ịḅaal ịḅaal.

²²Kụ awe ịiḍaany phọ Ijipt ọsighe rụgba phọ ạbidi ọtuugh ịphen phọ oḍighi aani, kụ ẹkparami ologhi ọdaam eelhe phọ, ọ́naghanan Mozis rꞌEeron, ịdipho Ọmoogh-we phọ mạtuugh bọ ạḅem.

²³Ọdaam eelhe phọ ạḍua sịphe phọ agheel kꞌọdi, kụ ịphen phọ ị́man mạar esi ọdi.

²⁴Oomo awe phọ Ijipt oguphogh oogbom ọphiiny phọ ọwa ghan ạmuum ọphughol, ịdi eḍighi bọ ạmuum Ọphiiny aNail ọ́nighe mun ọphughol.

²⁵Eḍigheen phọ ẹphen Ọmoogh-we phọ ạgur bọ mụum Ọphiiny aNail phọ ịrol oḍual aḍio.