Read abua Ẹḍua 8 Bible Online

Ẹḍua 8 - abua bible

Ẹḍua 8

¹Kụ Ọmoogh-we phọ ạḅeni Mozis mọ, “Kịa ạḅeni ọdaam eelhe phọ mọ, Ọmoogh-we phọ ạḅem ịduon mọ, ‘Meera awe phọ ạmi ogheel ukumu ịmi.

²Kụ eru mạar dị nạ úmeera mọ bịdi ogheel, mị kạsighe ni ịḅal amuzeḍi aleenye oomo eelhe phọ ạna.

³Oomo Ọphiiny aNail ịḅal bịn kụ kemuza, kụ ẹḍua pạ kụ etu eḍiku ogiga ọdaam eelhe phọ, eḍiku osoph ạna, ẹsiinyighu ạnyu ẹmina phọ ạna, eḍiku ruutu abutelhedom mọ ạna, eḍiku ruutu oomo awe phọ Ijipt, eḍiku rụghol, eḍiku rodo.

⁴Ịḅal kepeleghuom ghan nyịna rꞌawe phọ ạna rꞌabutelhedom mọ ạna.’”

⁵Kụ Ọmoogh-we phọ ạḅeni Mozis mọ ạḅeni Eeron mọ, “Sele ḍịghaagh phọ ạna asomoriom rịphiiny phọ rꞌạraaḅaraph phọ rꞌạruunu phọ, aḍighi ịdi ịḅal kemuza de phọ Ijipt.”

⁶Kụ Eeron asele ḍịghaagh phọ ọdi asomoriom rụmuum mọ Ijipt kụ ịḅal emiteghu eekpereghiom de phọ Ijipt.

⁷Kụ awe ịiḍaany phọ ạbuo Ijipt oghal rịkia phọ ạbidi ọtuugh ịduon phọ oḍighi aani, kụ ịḅal emiteghu de phọ Ijipt.

⁸Ọdaam eelhe phọ ạmagh Mozis rꞌEeron kụ ạḅeni mọ, “Ịiḅereghian Ọmoogh-we phọ ạsighiogh ịḅal phọ kꞌạmi rꞌawe phọ ạmi, bịn mị kameera ni mọ awe phọ anyina ọghi oḍighi rạraar aghuḍum ọngo Ọmoogh-we phọ.”

⁹AMozis ạḅeni nyọdi mọ, “Esi ọlogh eghuan ụḅeni ịmi mem dị mị kạaḅereghian mọ ịḅal phọ ẹḍuaghu kꞌạna, kꞌabutelhedom mọ ạna rꞌawe phọ ạna, esoroghu ẹtol ẹpe Ọphiiny aNail bịn.”

¹⁰Kụ ọdi ạḅem mọ, “Iḍue.” AMozis ameera mọ, “Ẹrol li ịdipho nạ ạḅem bọ, ọbo nạ alegheri mọ ẹnon ẹnaan dị epu Ọmoogh-we phọ Ẹnaan phọ ayoor ílho.

¹¹Ịḅal phọ kẹḍuaghu ni sịphe aruutu phọ ạna, rꞌọto ạna, kꞌabutelhedom mọ ạna rꞌawe phọ ạna, kụ esoroghu ẹtol ẹpe Ọphiiny aNail bịn.”

¹²AMozis rꞌEeron ọḍua kꞌọdaam eelhe phọ kụ aMozis ạaḅereghi Ọmoogh-we phọ mọ ạsighiogh ịḅal phọ ịpe ọdi ạghimom bọ kꞌọdaam mọ.

¹³Kụ Ọmoogh-we phọ ạnaghanan Mozis kụ ạtuugh aḍighi ịdipho phọ, kụ ạze oomo ịḅal phọ sịphe aruutu phọ ạbidi rꞌiizolokolo phọ ạbidi.

¹⁴Kụ awe Ijipt ọboorogh ịḅal phọ okpologhi rugu, kụ ade phọ emiigh ophur.

¹⁵Ọdaam eelhe phọ rọmiin mọ mephoorom bịn ạkparami ologhi ọdi bịn ọ́naghanan mun ịpe aMozis rꞌEeron ọḅem bọ, ịdipho Ọmoogh-we phọ mạtuugh bọ ạḅem.

¹⁶Ọmoogh-we phọ ạḅeni Mozis mọ, “Ḅẹni Eeron mọ, ‘Sịghe ịkpara phọ ạna asele ạgur ophugh ade phọ, bịn ighuugh kemuza ni oomo ade phọ Ijipt.’”

¹⁷Kụ bịdi ọtuugh ịdipho phọ oḍighi. Eeron ạsighe ịkpara phọ ọdi asele ạgur ophugh ade phọ, kụ eten ighuugh, eḍiku we rꞌịnam; oomo ophugh ade phọ Ijipt aḍighi ighuugh dị eekpereghiom we rꞌịnam.

¹⁸Kụ ạbuo ịmiin phọ ọphinyon rịkia phọ ạbidi ọtuugh ịduon phọ oḍighi aani ịlo ophugh phọ katen aani ighuugh kụ útue, kụ ighuugh phọ eḍiku tọrobo esi.

¹⁹Awe ịiḍaany phọ ọḅeni ọdaam eelhe phọ mọ, “Kụen phọ ạghunugh Ẹnaan.” Kụ ẹkparami ologhi phọ ọdi, kụ ọdi ọ́naghanan Mozis rꞌEeron, ịdipho Ọmoogh-we phọ mạtuugh bọ ạḅem.

²⁰Ọmoogh-we phọ ạḅeni Mozis mọ, “Ḅetenu eḅon ạḍiroor ạghi akori ọdaam eelhe phọ, mem lọ ọdi aten rạki ẹpe esiḍia phọ kụ ạḅeni nyọdi mọ, ‘Ọmoogh-we ạḅem mọ meera awe phọ ạmi ogheel ọghi ukumu ịmi.

²¹Kụ eru mạar dị nạ úmeera mọ bịdi ogheel, mị katom oghuugh ịphi eḅor nyịna rꞌabutelhedom mọ ạna rꞌawe phọ ạna eḍiku oomo aruutu phọ ạna; oomo aruutu awe phọ Ijipt rꞌade phọ ạbidi, ịphi kụ kemuza.

²²Mị kạ́ḅaram de phọ aGosen, ḍịphe awe phọ ạmi orugh bọ. Ịphi kẹ́tol ẹpe phọ. Mị kaḍighi ịduon ẹrol dị nạ alegheriom mọ mị kụ Ọmoogh-we ịsien aḅirini phọ.

²³Mị kạlogh ni ọku ạgbatan we phọ ạmi rꞌawe phọ ạna. Ịiḍaany phọ ịphen kemite iḍue.’”

²⁴Kụ Ọmoogh-we phọ ạtuugh ịphen phọ aḍighi; kụ aḍita oghuugh ịphi ẹghi eḍiku ogiga ọdaam eelhe phọ rꞌaruutu abutelhedom mọ ọdi emuza kụ ẹphueghi oomo ade phọ Ijipt.

²⁵Kụ ọdaam eelhe phọ arom ạghiom Mozis rꞌEeron kụ ạḅeni mọ, “Ịki eḍighi yogh rạraar aghuḍum ẹngo Ẹnaan phọ anyina sịen eelhe phọ ẹphen.”

²⁶Kụ aMozis ạḅem mọ, “Ị́kpe dị yoor koḍighi ịphen phọ. Oḍighi ịyaar aghuḍum ọngo Ọmoogh-we Ẹnaan phọ ayoor eru bọ ḅạphanya Ijipt. Kepin ni iloghi awe Ijipt dị yoor roḍighinom rạraar aghuḍum ịnam mọ yoor ọngo bọ Ọmoogh-we Ẹnaan phọ ayoor. Eḍighi ịyaar lọ bịdi kụ ụmiin iyoor, bịdi kuroḅol iyoor ikpo tụtu yoor omuughu.

²⁷Yoor kọki erelhe ịraar aḍio oḍigh ẹdala phọ, oḍighi rạraar aghuḍum mọ ọngo Ọmoogh-we phọ Ẹnaan phọ ayoor, ịdipho ọdi ạto bọ ụḅeni iyoor.”

²⁸Kụ ọdaam eelhe phọ ạḅem mọ, “Mị kameera ni nyina ẹghi ẹpe ẹdala phọ eḍighi rạraar aghuḍum ẹngo Ọmoogh-we Ẹnaan phọ anyina, kụ ọlo kẹ́kel iboom. Ịiḅereghinaan ịmi.”

²⁹AMozis ạḅeni ọdaam eelhe phọ mọ, “Mị rọḍua sịen bịn mị kạaḅereghi Ọmoogh-we phọ mọ iḍue ọdi aphorogh ịphi phọ kꞌạna rꞌaruutu abutelhedom mọ ạna rꞌawe phọ ạna. Kụ ọlo iyoor kúukeleghi mun asophoghom we phọ ọghi oḍighi yogh rạraar aghuḍum mọ ọngo Ọmoogh-we phọ.”

³⁰AMozis ạḍua kꞌọdaam eelhe phọ, kụ ạaḅereghi Ọmoogh-we phọ.

³¹Kụ Ọmoogh-we phọ ạtuugh ịpe aMozis ạlhom bọ nyọdi aḍighi; kụ aphorogh ịphi phọ kꞌọdaam eelhe phọ, kꞌaruutu abutelhedom mọ ọdi rꞌawe phọ ọdi, rꞌeniin ísugha.

³²Ọdaam eelhe phọ ạkparami kẹn ni ologhi ọdi egi phọ ẹphen bịn ómeera mọ awe phọ ogheel.