Read abua Job 11 Bible Online

Job 11 - abua bible

Job 11

¹Oye kạ́pagharanaan ọghaaph elologhi phọ ọphon? Oboom ọghaaph katue ni aseere oye elhiom ḍụghum?

³Job, nạ ragbiom ghan mọ yoor kótue ọphagharanaan nyịna ḍụghum? Mọ ikpo ọnhu ạrigilaam mọ ạna kekpomori ni rụnhu ayoor ḍụghum?

⁴Nạ rạsighenom ghan mọ ịphen nạ ạḅem bọ agey ni; nạ ạsighenom mọ nạ aseleman ni risigh Ẹnaan phọ.

⁵Mịnighe ịikia dị Ẹnaan kẹphagharanaan nyịna!

⁶Ọdi mụḅeni ni nyịna mọ olegheri-ịyaar phọ ạmoogh ni ịbadi ịla; ạraraar edi ni dị epel oye olegheri. Ịphen Ẹnaan rẹliom bọ nyịna esughanam ni ịdi ẹkpe bọ ọliom ạna.

⁷Nạ katue ni ạwa amitiom oomo ạḍibugh phọ rꞌịikpo phọ Ẹnaan?

⁸Okuaḍio phọ kéekuna Ẹnaan, kụ ọlo etenom ni esi dị nạ kạteenya. Ẹnaan elegheri ni ọmar iḍim kụ ọlo nạ ólhegheri.

⁹Igbogh phọ Ẹnaan epel de phọ, ẹtegh epu otu-ḅualhe phọ.

¹⁰Eḍighi ịyaar dị Ẹnaan esiph nyịna ẹmeremi esi ịiruen, ạnhian kụ katue akikima nyọdi?

¹¹Ẹnaan elegheri ni weye dị ụ́moogh mạar oḍighinom; ọdi rạmiin ghan ni oomo ịkaraph iiḍighi phọ ạbidi.

¹²Arolologhi komiigh ọsu ologhi mem lọ ọmar ilhom ịnam adool dị ẹsu iloghi.

¹³Job, leelemi ologhi phọ ạna. Ḍuraan ạghi esi Ẹnaan.

¹⁴Toḅologhi ịkaraph ḅịle rꞌekeeny eḍighinom ịyaar sịphe otu phọ ạna.

¹⁵Kụ ạḅile asoman aḅirini phọ rꞌạkpo ologhi.

¹⁶Pụruku oomo ịiḅaghami phọ ạna kẹḍua ologhi ạna, ịdipho ạmuum-aḍigho dị maten bịn oye ọ́otughian mun.

¹⁷Aghuḍum mọ ạna kạmu ni apu ogogo amem ootaany; ḅịle kẹn amem ogbogh ufiri aghuḍum mọ ạna kẹmu ịdipho ạḍiroor.

¹⁸Nạ kạtol ịma ạdol dị oḍuom ologhi amuza; Ẹnaan keeko ni nyịna ẹḅile ẹngo nyịna ophooghian.

¹⁹Nạ kákiilaan bụmulogh-ḍien phọ ạna; ịbadi awe kọlom ghan nyịna ọloghonaan ạḍighaagh.

²⁰Kụ ọlo ạbukaraph awe phọ kopogh ghan ni ọkiom, ọtuom dị úlegheri mun ịlo oḍighi, kụ ọwa ọmiin mọ ịlo okpetenaan ílho. Emuton ḍuugh, ọnon oḍuom ologhi ạbidi ólho.