Read abua Job 12 Bible Online

Job 12 - abua bible

Job 12

¹Ii, nyina kụ ẹḍogh awe phọ. Mem lọ nyina emuughu, olegheri-ịyaar kamughan rꞌanyina.

³Kụ ọlo, mị ạsu ni ologhi ịduon anyina; nyina ịmi ípu; tọrotoro oye alegheri ni ịphen nyina mẹghaaph bọ.

⁴Ghạlamo ạrighiri ạmi bịn rụmilogh ni ịmi nyịidipho; bịdi rọmilogh ni, ghạlamo ịduon mị aseleman bọ ni; kụ ọlo amem ịrol li dị Ẹnaan ẹnaghanan ịiḅereghi ạmi.

⁵Nyina ị́moogh ịiḅaghami, kụ nyina rịmilogh ghan ịmi; nyina rẹgur ghan ẹḅam oye dị rạwa ni omeel.

⁶Kụ ọlo ạruḅa rꞌawe dị Ẹnaan úlegheri odi ni rꞌẹepho ghạlamo ịduon ẹmugh phọ ạbidi kụ ịnyaam mọ ạbidi bịn.

⁷Ghạlamo ịnun rꞌịnam bịn ẹmoogh ni iboom ạraraar ọtughemi anyina;

⁸Ipuru rạraar phọ ịpe ọlhem bọ sịen ade phọ rꞌọphiiny phọ mọ ịngo inyina olegheri-ịyaar phọ ạbidi.

⁹Oomo phọ ạbidi olegheri ni mọ ạḍighaagh Ọmoogh-we phọ kụ ịlhem bụno.

¹⁰Ẹnaan kụ retelhiom sighuḍum ạraraar phọ dị ạlhem bọ; aghuḍum ạtorotoro oye odi esi ịto phọ ọdi.

¹¹Kụ ọlo ịdipho eḍien rẹdugh ghan bọ sịphe anem mọ ạna, ịduon kụ ịdi ọghaaph rạdugh ghan esi areḅeri phọ ạna.

¹²Ikumoor awe ọmoogh ni olegheri ịyaar, kụ ọlo Ẹnaan ẹmoogh ni olegheri-ịyaar rꞌịikpo. Ikumoor awe kotue ni opogh ịyaar bịn olegheri; Ẹnaan ketue kẹn ni epogh ịyaar bịn elegheri ḅịle kẹn ọdi ạmoogh ni ịikpo oḍighi ịlo ọdi ạwa.

¹⁴Mem dị Ẹnaan kụ elereghi, ạnhian kụ katue ạḅile ạlogh ạmeremi; ḅịle ạnhian kụ katue ạtagharan oye dị Ẹnaan ẹlhogh ikoli?

¹⁵Ade phọ rẹ́moogh ghan mun mụum mem lọ Ẹnaan eghughiom ọlophia; ạmuum-aḍigho ratu ghan mem lọ ọdi ạkputon mụum mọ.

¹⁶Ẹnaan ẹmoogh ni ịikpo kụ rạmoogh ghan ọkpar opu oomo amem; ọpo ookeleghi bọ rꞌọpo raakeleghi ghan bọ odi ni esi ịto phọ ọdi.

¹⁷Ọdi rạbonyi ghan olegheri-ịyaar ạbuo ịtooghi phọ kụ aḍighi ịdi abuḍiemiom mọ koḍighi ghan ịlo arolologhi.

¹⁸Ọdi rasoore ghan ni bụdaam ẹmha kaḍighi bịdi weye ikoli;

¹⁹ọdi rasooromi ghan ni riil ạrikia ḅịle rꞌawe ịtooghi.

²⁰Ọdi rakpomori ghan ni rụnhu awe dị awe oḍuom ologhi, ạḅile kẹn ni rạbonyi ghan olegheri-ịyaar ikumoor awe phọ.

²¹Ọdi rasiphe ghan ni umugholoor weye dị odi esi ịtooghi kạḅile akunughi ịikpo ạbuo ịtooghi phọ.

²²Ọdi rạngo ghan ni ḍịḅaal riisi dị ewil ịdipho aḍuugh.

²³Ọdi raḍighi ghan ni ịdi areelhe kẹmoogh ịikpo ẹḅile ẹbugh, kụ ọdi katue kẹn ni aagulemi bịdi.

²⁴Ọdi raḍighi ghan ni ịdi abuḍiemiom mọ ạbidi koḍighi rolologhi kạwile bịdi oyeela ophe;

²⁵bịdi rooba ghan esi ufiri ḅịle kẹn ọbelebele ịdipho ạbupughol miim.