Read abua Job 13 Bible Online

Job 13 - abua bible

Job 13

¹Tọrotoro ịyaar phọ nạ ạḅem bọ, mị mạnaghan ghan ni. Mị ạnaghan aani oomo phọ ịdi; mị alegheri ni oomo phọ ịpe nạ alegheri bọ. Nạ ịmi úpu.

³Kụ ọruonu phọ ạmi ọdi rꞌẸnaan Oomo Ịikpo, kạ́na. Mị rạwa ọgbaaghian rꞌọdi.

⁴Nạ ạsighe ọkpe bịn kụ raakpereghiom ghan élegheri-ịyaar; nyina ẹkigh riil dị kótue ookonom oye.

⁵Kạ́ḅem ịyaar bịn awe kogbiom ghan mọ nạ ạsu ni ologhi!

⁶Ler aḅeri mị kạkaaph aani.

⁷Eeghe kụ iḍighi kụ nạ rạgba ghan bọ ọkpe? Nạ ragbiom ghan mọ ọkpe ạna kạngo ni sụo Ẹnaan ḍụghum?

⁸Nạ rạwa ghan ọgbaanaan ọdi ḍụghum? Nạ kạmeera otu iilogh ạgbaanaan ḍighiton phọ ọdi ḍụghum?

⁹Eḍighi ịyaar dị Ẹnaan ẹkaraghi ephogh nyịna, kạmiin ni ịyaar dị ẹnighe ḍụghum? Nạ ragbiom ghan mọ nạ katue ni aakeleghi Ẹnaan ịdipho nạ raakeleghi ghan bọ weye?

¹⁰Ghạlamo igbiighi ịkaraph ịiruen phọ ạna ạaghian ni, ọdi kạḅaam ni nyịna,

¹¹ḅịle kẹn ịikpo phọ ọdi kemuzeḍinaan nyịna ruugu.

¹²Asidogh phọ ạna ị́moogh ịyaar oḍighinom ịdipho ọoru; ịgbakian phọ ạna kẹgbian ịdipho ạḅay.

¹³Ḅoorian mị ụḅile ụkaaph aani kụ ịpe keḍighi bọ eḍighi.

¹⁴Mị ạnya ni ọpham aghuḍum ạmi ẹḅeelia.

¹⁵Oḍuom ologhi ịmi úlhoonaan mun, kụ eḍighi ịyaar dị Ẹnaan ighiigh ịmi? Mị kạkaaph ḍighiton phọ ạmi ạḅeni nyọdi.

¹⁶Iini ghụn ạkpo ologhi phọ kụ kụphel ịmi, loor esi dị ọkaraph oye ólho dị katue ạmerenyan risigh Ẹnaan.

¹⁷Nyịidipho nạghanan ịphen mị kạkaaph aani bọ.

¹⁸Mị mạnya ọgba aani aḍighiton phọ ạmi loor esi dị mị alegheri ni mọ mị odi ni elhiom.

¹⁹Ẹnaan, nạ ratu ọghaaph ịpe mị aḍighi bọ ḍụghum? Eḍighi ịyaar dị nạ aru ạghaaph, mị aakolobian ni oḅoorian bịn omugh.

²⁰Meera mị upuru aani ịyal ạraraar; meeraam ni rạraar phọ bịn mị kạ́ki ạaghian esi ạna.

²¹Ịmi kụ́lhiom mun, ḅịle kẹn ịmi kúghiighom ruugu.

²²Ẹnaan, nạ pụr ạghaaph, kụ mị ạphagharanaan; mụghumo mị ụpur ụkaaph kụ nạ ạphagharanaan.

²³Ịghen kụ ịkaraph phọ ạmi? Eeghe ọpioman kụ ẹdi mị aḍighi bọ? Ịghen iilogh kụ ẹdi mị asoor bọ?

²⁴Eeghe kụ iḍighi kụ nạ ụḅitonaan bọ ịmi? Eeghe kụ iḍighi kụ nạ ruḍighi bọ ịmi ịdipho ẹpomoghian ạna.

²⁵Nạ rạwa ghan ọdegh ạmi ḍụghum? Mị aḍighi ḍịnya oreeny bịn; nạ razuom ghan ẹgham ọpherepe ạḍinya oreeny dị mạgharaghar.

²⁶Nạ usiph ịmi iilogh dị rekiḍim iboom, ghạlamo ạraraar dị mị aḍighi ẹghoroghor.

²⁷Nạ ạsighe izime ạpaḍiom ruwol ạmi; nạ ragon ghan tọrotoro ẹda lọ mị ạgbatan, kụ nạ ạkar kẹn ni rạaḅeghion ghan esi lọ mị ạzeer.

²⁸Loor esi ịduon phọ, mị maatughuḍian ịdipho ạḍipe lọ mẹḅor, ịdipho ạsuoma lọ ariphiliḅa asuphuugh melhe.