Read abua Job 14 Bible Online

Job 14 - abua bible

Job 14

¹Oomo awe rodughogh ghan ni mem lọ ọmar ḅịle kẹn kótue ọloghonaan ḍịghaagh loor ạbidi. Oomo awe rọtol ghan ekulha amem bịn kụ rịiḅaghami.

²Yira roogborion ghan kophoph ọḅile ọgharaghar ịdipho ạsifalaway; yira rope ghan ịdipho ạroogho.

³Nạ kuphogh kẹn ni ịmi, Ẹnaan, ạḅile kẹn ụmeremi ịmi esi ịiruen kụ usophonaan ịmi ọoruen ḍụghum?

⁴Ịyaar dị eseleman kétue ẹḍua emite esi ịyaar dị eḍigh ẹenir ịdipho oye.

⁵Ḍịdoony aghuḍum mọ ọdi mọto ni kụ oseere — ọnhu ạrunwanyu lọ ọdi kạtol. Nạ magbiighi ni kụ aseere, oye kátue anme.

⁶Pogh bịn ạḅitonaan ạwile nyọdi; bịle ọdi ạghelom ọgbagara aghuḍum ọdi — mụghumo ọdi atue.

⁷Oḍuom ologhi odianaan ni oreeny dị molher; katue ni ạḅile asi ạmoogh ghuḍum.

⁸Ghạlamo ạsini phọ iḍighi ni igbaany, ḅịle kẹn azin phọ ạḅor ẹpe ade phọ,

⁹ạmuum ạrol, ọdi kasi ni ịdipho ọbam oreeny.

¹⁰Kụ ọlo oye ramugh ghan, bịn ịlo ọdi memuneen; ọdi romugh, bịn ạḅile ghan odi ẹghen?

¹¹Ịdipho ọphiiny lọ rákil mun rꞌạruudu dị ạmuum mamuneen,

¹²kụ ịdi awe romugh ghan, róḅetenu ghan mun. Bịdi kóḅetenu mun sịen okuaḍio phọ odi bọ ni; bịdi kóḅetenu mun esi ạralha phọ ạbidi.

¹³Ḅẹlee mọ nạ kạaghi ni ịmi ẹpe ọmar iḍim; mị ụbooghian tụtu ạghelhe phọ ạna aten, kụ agbi nụun ọsaḅar amem ọotughian ạmi.

¹⁴Eḍighi ịyaar dị oye amugh, ọdi katue ni ạḅile amite ḍụghum? Kụ ọlo mị kakori ni ogey amem, akori tụtu amem ịiḅaghami phọ eten esi eekuna.

¹⁵Pọ kụ amem dị nạ kạmagh kụ mị amegheron, kụ nạ agbi ọmoogh ạḍiḅeeraan ạmi, ọlem mọ ạna.

¹⁶Kụ nạ agon ịgbaranuom aruwol phọ ạmi, kụ ọlo nạ kátue ạgba ịkaraph phọ ạmi.

¹⁷Nạ kạsar ri ạbilenaan bịdi ạsighe atoḅologhi; nạ kagbuurogh ni oomo ọpioman lọ mị maḍighi ghan.

¹⁸Amem retu ni dị ạraaḅaraph kemeleghu ḅịle kẹn ạrana etelhe ni ẹḍuaghu.

¹⁹Ạmuum kạagbirion sighiigh kụ ogbogh ọlophia ạagbirion de phọ kụ nạ aagulemi oḍuom ologhi phọ oye ọmoogh aghuḍum.

²⁰Nạ ạkpar apu oye kụ aporogh nyọdi bịn kꞌagee-pọ; ghisigh phọ ọdi mopighe esi aḍuugh.

²¹Ạnmuny ọdi ọkpar ọmoogh rughuenian, ọdi ólhegheri mun, ḅịle kẹn rọ́ḅeni ghan nyọdi mem lọ oofolomi bịdi.

²²Ọdi raloghoma ghan eephina aloor phọ ọdi bịn, ḅịle rꞌịkunu ologhi phọ ọdi.