Read abua Job 16 Bible Online

Job 16 - abua bible

Job 16

¹Mị mạnaghan ghan ni ọdo ikpo ọnhu phọ ịphen; ịidereghi phọ nạ ạngo bọ eḍighi ịminimiin bịn.

³Nạ kạtol ọghaaph ọghaaph bịn kꞌagee-pọ ḍụghum? Ogina ạna bịn kụ kạkaaph ghan bịn emineen ḍụghum?

⁴Eḍighi ịyaar dị nạ odi dọl phọ ạmi kụ mị odi ḍịphe ạna, mị mutue ni ạghaaph oomo ịphen nạ rạkaaph bọ. Mị mutue ni aphighemi ẹmhu ạmi ịlo olegheri-ịyaar kụ mụsighe ikpo ọnhu dị ẹghigh mụum-aḍigho ẹminom nyịna.

⁵Mị mutue ni ạsighe oroma ạngoom nyịna, ạḅile ạghaaph ghan ạadereghiom nyịna.

⁶Kụ ọlo ịyaar dị mị ạḅem dị kẹlogh ḍịghaagh ílho, kụ oḅoorian kẹn bịn ọ́phoomi eephina phọ ạmi.

⁷Nạ maḍighi ịdi aloor phọ ạmi mẹyololo, Ẹnaan; nạ mameera mọ ọze eghunotu phọ ạmi.

⁸Nạ musiph ịmi; nạ ẹpomoghian ạmi. Mị masugha ruzu rꞌịḅarara bịn, kụ awe ọsighenom ịduon phọ mọ eḍeenaan ọpioman phọ ạmi.

⁹Esi ọghagh ologhi Ẹnaan mịphanyi ịmi ẹmadan; ọdi ạnmagharan kụ ruphoghom ịmi ḍikia.

¹⁰Awe rụnmoghoghoom ghan ịmi; bịdi ukoom ịmi kụ uuḅorogh ịmi.

¹¹Ẹnaan mịḅogh ịmi ẹngo ịkaraph awe.

¹²Mị ụrol ghan ni dọl ẹepho, kụ Ẹnaan ẹpogh ooko ạmi kụ ịgurogh ịmi eetughuḍi. Ẹnaan ịsighe ịmi kụ eseere rẹtuughaam ghan ọraph ọka,

¹³kụ rạtaḅal ghan oomo ạmi ịkpina — ikpo-ịkpina dị regim ghan kiḍighi ịmi ịyaar; kụ ghạlamo ịduon phọ ni kẹn bịn ọdi óḍeenaan igbiririph.

¹⁴Ọdi ruḍighi ghan ịmi rạraar elegh bịn kạghiom risigh; ọdi uzuom ịmi ẹgham ịdipho oye ẹgham lọ raḍigh ẹlaal esi aḍikia.

¹⁵Mị odi ọto kụ ạkpologhian rukpe-ọto, kụ mị ạtol sịen ophugh phọ, aloor ạmi medugh.

¹⁶Mị mamoghi tụtu arisigh ạmi rạtogh, ariḍien phọ ạmi mewuphogh oogho akitonom,

¹⁷kụ ọlo mị ụ́piom ọphue ịyaar oye, ḅịle kẹn ịiḅereghi phọ ạmi esi Ẹnaan ẹki ni oyen.

¹⁸Nạ Ade phọ, kạ́booghi ịkaraph phọ ịphen muḍighi bọ ịmi! Kámeera awe ọzerom iiḅi ịiruen phọ mị ạlho bọ rạmagh ghan.

¹⁹Oye odi ni ẹpe kꞌạke dị kameera ọgbaanaan ạmi.

²⁰Ạrighiri ạmi rụmilogh ghan ịmi; ariḍien phọ ạmi rezu ghan izin kephoghom Ẹnaan.

²¹Mị rạwa ni oye dị kạaḅereghian Ẹnaan loor ẹmhu ạmi, ịdipho oye rakol ghan bọ ọyaghiri ọdi kạaḅereghian.

²²Ạsia phọ ạmi remuneen, kụ mị ratelhe eten phọ ẹpe rótigheel ghan bọ.