Read abua Job 17 Bible Online

Job 17 - abua bible

Job 17

¹Eekuna aghuḍum mọ ạmi mẹebeeph. Mị útue mun upooghu; ịyaar ịmi ísughanaan mun emuton oḍi phọ.

²Mị ạmiin ni ịpe awe rụnmoghoghoom bọ ịmi.

³Mị ụ́booghi ịyaar, Ẹnaan. Sịghe ni ikpo ọnhu phọ ạmi. Ọnon oye ólho dị kạnaghan ọghaaph phọ ạmi.

⁴Nạ mạsighe iloghi phọ ạbidi esi ịitughian; kámeera bịdi ọkpar upu ịmi nyịidipho phọ.

⁵Esi aḍidogh ageedi phọ oye ạtuan ikpoki kụ abool ọyaghiri ọdi, kụ ạnmuny ọdi ọmiinom loor ịduon phọ.

⁶Kụ nyịidipho awe rudoghonaan ghan ịmi ḍidogh phọ aḍien phọ; bịdi otu kụ ọsinom ịghor risigh ạmi.

⁷Okururu ạmi maḍighi ịdi mị rạ́kar mun kạmiin eten; ạraghaagh phọ rꞌaruwol phọ ạmi memunonom ịdipho oogho.

⁸Awe dị ọḅem mọ ạbuno igey awe okperenom ni, kụ oomo ạbidi mosoph ọoruen uphume ịmi mọ mị úlegheri Ẹnaan.

⁹Awe dị ọḅem mọ ạbuno ọkpe oghueni mọkaraghi bịn kụ omeeraam mọ ạbuno odi ni elhiom.

¹⁰Kụ ọlo eḍighi ịyaar dị oomo ạbidi oru kụ ọmeera risigh ạmi, mị kạ́miin rꞌoniin ọnyo ạbidi dị ạsu ologhi.

¹¹Asiḍughul-otu phọ ạmi meten; igbiighi phọ ạmi mibi ịmi; oḍuom ologhi phọ ạmi maphe.

¹²Kụ ọlo ạrighiri phọ ạmi rọḅem ghan mọ aḍughul pọ ootaany; bịdi ọḅem mọ ạḍiḅaal mẹebeeph kụ ọlo mị alegheri ni mọ mị odi ufiri.

¹³Oḍuom ologhi ạmi ọmar iḍim bịn. Ẹpe kụ ekpisi dị mị kạmina ạnaani esi ufiri.

¹⁴Mị kakol oḍi phọ mọ ọde ạmi. Ḅịle kẹn ạsileegbem mọ kạang bọ ịmi, mị kakol mọ onhiin ạmi rꞌabumarani ạmi.

¹⁵Ẹghen kụ ẹdi oḍuom ologhi udianaan ịmi? Ạnhian kụ ạmiin rꞌoniin.

¹⁶Oḍuom ologhi ịmi kụ́daph mem dị mị rakeel ọmar iḍim.