Read abua Job 2 Bible Online

Job 2 - abua bible

Job 2

¹Ịteeny ni ẹnon aḍio dị ạnmuny phọ kꞌạke kọḅile ni ọki egbodo Ọmoogh-we phọ; aSetan ạrol li sịphe igbo phọ ạbidi.

²Ọmoogh-we phọ apuru nyọdi mọ, “Nạ ụrol ghan ẹghen?” ASetan ạphagharanaan mọ, “Mị ratelhe yogh ghan ni bịn kạghi ạḅile aru, rayeela ghan kakitonom de phọ.”

³“Nạ ạmiin ni otelhedom mọ ạmi Job?” Ọmoogh-we phọ apuru. “Sịen ade phọ ọnon oye ólho dị ạmoogh omeeraam ạḅile ạnighe ịdipho ọdi. Ọdi ruuseeny ghan ịmi ḅịle kẹn agona loor ọbo ọdi kaḍighi ghan bọ ịkaraph. Nạ ụkpuughiom ịmi bịn mị ameera mọ kịa ạaḅaghami nyọdi dị ẹmhu ílho, kụ ọlo aJob ạpam ni omeeraam mọ ọdi esi ạmi rạkiom ghisigh.”

⁴ASetan ạphagharanaan mọ, “Oye katue ni ạḅogh oomo ạraraar ọdi ạngo pịdi ọdi ạrol ghan nịiniin eye.

⁵Kụ ọlo eḍighi ịyaar dị nạ ạḅogh loor phọ ọdi, ọdi karonyon nyịna egaan.”

⁶Esi ịduon kụ Ọmoogh-we phọ ạḅeni Setan mọ, “Ẹnighe ni-a. Ọdi odi ḍịghaagh ạna, kụ ọlo, kákiigh nyọdi.”

⁷Kụ aSetan ạḍua risigh Ọmoogh-we phọ kụ ạghi aḍighi ịdi aloor aJob emiteghom rọko.

⁸AJob ạghi ạrol ude ọgbal esi dị rozu ghan ịiya kụ ạsighe ọkeeghi kụ ạgholom ghan rọko phọ ọdi.

⁹Ạnir ọdi ạḅeni nyọdi mọ, “Nạ ạpam ghan ni omeeraam mọ ọphon rạkiom risigh? Eeghe kụ iḍighi kụ nạ óronyon bọ Ẹnaan alegheri amugh?”

¹⁰AJob ạphagharanaan mọ, “Ọghaaph phọ ạna ọ́moogh ịyaar oḍighinom. Mem dị Ẹnaan ịngo iyira igey ạraraar, yira rọsighe ghan ni. Keḍighi bọ ika kụ yira ọḅa mem dị ọdi ụngo iyira ịkaraph?” Ghạlamo ịduon ọdi ạmiinom bọ ni oomo phọ ịphen phọ, aJob ọ́ghaaph ịkaraph ịlo Ẹnaan.

¹¹AJob ạmoogh bọ ịraar ạrighiri dị oghol mọ Ẹlifaz ọlo ẹmha aTeman; ạBildad ọlo ẹpe ade aSua; rꞌaZofar ọlo ẹpe ade aNaama. Mem dị bịdi ọnaghan bọ ịlo ịminimiin phọ aJob, bịdi ogbiighi ọghi ọodereghi ọdi.

¹²Mem dị bịdi ọkelan ni ịminighan bịdi ọrol ọmiin Job, kụ ọlo bịdi ụ́logh nyọdi elegh. Mem dị bịdi ọlogh bọ nyọdi elegh, bịdi omiigh emoghi rꞌịlooghi, orunyian ibura ạbidi loor ọto, ḅịle kẹn okpoph ophugh kụ omophoghi rụmhu ạbidi.

¹³Kụ bịdi ọrologhu oopho ude rꞌọdi oḍual aḍughul rꞌoḍual ootaany oye ọ́ḅem ịyaar loor esi dị bịdi ụmiin ni ịdi ọmiinom mọ ọdi ạbugh.