Read abua Job 21 Bible Online

Job 21 - abua bible

Job 21

¹Nạghanan ịphen mị rạḅem bọ; ịphen kụ oomo ịidereghi dị mị rạwa ḍịghaagh ạna.

³Ụngo ịmi ọgel ọghaaph aani kụ mem dị mị mạmadan kụ agbi nụun ọmilogh ạmi ịlo ẹḅeeraan nyịna.

⁴Ọruonu phọ ạmi ólho esi oye dị kamugh ni. Ẹkaraghi ni ẹkpianaan dị mị kạ́kparam mun.

⁵Uphogh ịmi. Ẹkpe ni dị keḍigh ruugu esi ạna bịn kụ nạ ạnmagharan aḅoorian kụ uphogh ghan ịmi ḍụghum?

⁶Mem dị mị ạatughian ịphen mimitenaan bọ ịmi, reḍigh ghan ni ruugu esi ạmi.

⁷Eeghe kụ iḍighi kụ Ẹnaan emeera bọ mọ ịkaraph awe ọrol ghan oḍum ọḅile ọkpo?

⁸Bịdi rọmoogh ghan nmụny ḅịle rꞌạnmuny oko, kụ ọtol ọmiin dị oomo phọ ạbidi koḍumogh.

⁹Ẹnaan répiemi ghan ruutu phọ ạbidi, bịdi rọ́tol ghan rꞌeepuph.

¹⁰Ii, oomo ạsinam ạbidi rẹmaraghian ghan ni kụ rẹmar ghan rꞌẹwoor.

¹¹Ạnmuny ạbidi rokilighuan ghan kophegh ịdipho ạnmuny iyool-ịga,

¹²ọḅile ọkerogh ịḅa mem lọ roti ọne ọḅile ropula ọkuodu.

¹³Bịdi rọtol ghan sighuḍum mọ ạbidi rꞌẹepho, ḅịle roḍighi ghan lẹeph bịn komugh dị ụ́miinom.

¹⁴Ạbukaraph awe phọ rọḅeni ghan Ẹnaan mọ ạkporion bụno ḍịghaagh; bịdi ụ́wa olegheri ogbi phọ ọdi dị egbolomaam sighuḍum ạbidi.

¹⁵Bịdi rogbiom ghan mọ ẹekpia okumu Ẹnaan Oomo Ịikpo phọ ílho, ḅịle kẹn mọ ạsuo ólho ọoḅereghi ọdi.

¹⁶Bịdi rọḅem ghan mọ aghuḍum mọ ạbuno esi ẹkpar ạbuno ni, kụ ọlo mị kátue ameeraam ịpe bịdi rọotughian bọ.

¹⁷Moḍime ghan ni ọtozi ọkaraph oye ḍụghum? Ạraraar ọnyo ạbidi meegulaan ghan ni ḍụghum? Ẹnaan mẹlhiom ghan ni ọkaraph oye esi ọghagh ologhi ḍụghum?

¹⁸Ạḅile apula bịdi ạsighiogh ịdipho ịpherepher, ọbo ọbo ịdipho ophugh dị oghim maḅoorogh?

¹⁹Nạ rạḅem ghan mọ Ẹnaan rẹliom ghan ni mọony loor esi ịkaraph ọde phọ ọdi. Eeye! Ẹnaan ẹliom ghan buḍighinom ịkaraph rꞌaloor ạbidi aḍeenaan ghan mọ ọdi rạliom loor esi ịkaraph phọ ạbidi!

²⁰Abuḍighinom ịkaraph phọ orool ghan ịikpia ịkaraph phọ ạbidi, bịdi ologhoma ghan ghẹlhe Ẹnaan Oomo Ịikpo phọ.

²¹Mem dị aghuḍum oye maten, aḍigey ạdol ạnmuny phọ ọdi katue ni ạḅile ạaḅaghami nyọdi ḍụghum?

²²Oye katue ni ạtughemi Ẹnaan phọ ẹpe reegbo ghan bọ ịiruen kẹngo ghạlamo awe dị ọrolom igbogh ạsigada ịtooghi?

²³Abuniin awe romoon ghan ni bịn tụtu ẹteeny ḍio dị komugh; bịdi romugh ghan rꞌọḅaal ologhi, asiloor phọ ạbidi ẹmaar ẹbughogh.

²⁵Ạbunon awe rọ́moogh ghan iboh rꞌẹnum; bịdi rọtol ghan kọḅile omugh rꞌeghiḍim sịphe ologhi phọ ạbidi.

²⁶Kụ ọlo oomo awe romugh ghan ni ḍiniin aḍuugh phọ kọḅile oḍi; ạsileegbem reekpereghiom ghan ni oomo phọ ạbidi.

²⁷Mị alegheri ni ịitughian ạrigilaam dị nạ ạmoogh.

²⁸Nạ apuru mọ, “Otu ogbogh oye phọ odi ẹghen nyịidipho, oye phọ ọpo raḍighi ghan bọ ịkaraph phọ?”

²⁹Nạ kọ̋ḅaanaan ghan weye dị rọki ghan erelhe? Nạ ólhegheri dom dị bịdi rọpam ghan korighelom?

³⁰Ḍio phọ ạḍiphe Ẹnaan rẹkagh bọ ologhi kụ rẹliom bọ ọkaraph oye phọ ghụn kụ ẹdi ropogh ghan kọwile.

³¹Oye ọgba ịkaraph ọḅam ẹmhu ọkaraph oye phọ rꞌọkpe esi oomo ịpe ọdi maḍighi bọ rạ́tol ghan.

³²Mem dị orool nyọdi osiemi ẹpe ẹkaraph eḍum mọ, sịphe oḍi phọ ọdi ọmaar bọ oselemi,

³³ạsimuunir awe kụ rọdaph ghan igbe phọ mem lọ rọki oḍi, ghạlamo ade phọ bịn remiigha ghan ni loor kụ keekpereghiom ḍizu phọ ọdi.

³⁴Kụ nạ! Nạ rụudereghiom ghan ịmi élegheri-ịyaar. Tọrotoro ọphagharanaan lọ nạ ạngo pọ ọkpe ni.