Read abua Job 22 Bible Online

Job 22 - abua bible

Job 22

¹Oye odi ni ḍụghum, ghạlamo ọkaraghi ọpo ạmoogh bọ oomo olegheri-ịyaar phọ, dị ạmoogh ịyaar oḍighinom esi Ẹnaan?

³Igey eḍighinom ạraraar phọ ạna kẹngo ni sụo Ẹnaan Oomo Ịikpo ḍụghum? Ḅịle kẹn ogey oye phọ nạ aḍighi bọ kẹloghonaan ni nyọdi ḍịghaagh?

⁴Ịphen Ẹnaan rẹliom bọ nyịna ị́tuan dị nạ ạlogh nyọdi eegu.

⁵Eeye, ịtuan dị ịkaraph phọ ạna mẹbugh iboom; ịtuan esi oomo ịkaraph phọ nạ maḍighi bọ.

⁶Esi oḍighi ịlo umor ạna kạkpe nyịna ọmugh dị ọdi ale ḍịghaagh ạna, nạ ụsighiogh oomo arukpe ọdi bịn ọdi ọ́moogh ịyaar ọkpologhian.

⁷Nạ ómeera ọngo mụum weye dị aloor medugh, ḅịle nạ ómeera ọngo eḍien weye dị ọkoony rasiph.

⁸Nạ ụsighe ịikpo phọ rꞌạgada phọ ạna bịn ạsighenom oomo phọ ade phọ.

⁹Nạ ómeera ọloghonaan ḍịghaagh rukpukele ạnmariir, nạ ụḅile ghụn kụ ạkpilighi ghan bụnyigo.

¹⁰Kụ iḍighi kụ nyịidipho ariini mekoom nyịna, kụ egina amem aruugu rasiph nyịna.

¹¹Mewil iboom dị nạ ọ́miin mun eten, ḅịle ạmuum-aḍigho rạmin nyịna.

¹²Ẹnaan ílho ẹpe ọkar ạsike phọ kụ rapogh ghan rạanaan phọ ẹphen ude, ghạlamo ịduon bịdi ẹkel aani bọ ni ạnyu phọ ḍụghum?

¹³Ghạlamo ịduon phọ ni nạ rapuru ghan mọ, “Ẹnaan ilegheri eeghe? Ọotu ạbooghi ni nyọdi — ọdi kasoph ika ọoruen kụ ụngo iyoor?”

¹⁴Nạ ragbiom ghan mọ ọotu phọ rakikima ghan ni nyọdi ọmiin eten, ịduon ọdi ratelhe ghan bọ ẹpe okuaḍio phọ.

¹⁵Nạ ạkaraghi ni ạnya orelhe areten phọ ạbukaraph awe phọ rọdaph ghan bọ ḍụghum?

¹⁶Ạmuum-aḍigho aatol li bịdi ạsighiogh kụ egbi ọteeny amem mọ ạbidi.

¹⁷Bụen phọ kụ awe phọ oghel bọ Ẹnaan Oomo Ịikpo phọ kụ omeeraam bọ mọ ọdi ịyaar kátue aḍighi bụno.

¹⁸Kụ ạri Ẹnaan phọ ni kụ ịngo bọ bịdi ẹelha phọ — mị útue ụnaghanan ịitughian ạbukaraph awe phọ.

¹⁹Igey awe ologhi rạḅaal ghan ni ḅịle awe dị ụ́piom rọmilogh ghan ni rẹer mem lọ bịdi ọmiin dị rọliom bụkaraph awe phọ.

²⁰Oomo ạraraar lọ ọkaraph oye phọ ạmoogh ropiemi ghan ni, kụ ạnian rele ghan ni tọrotoro ịyaar lọ esugha.

²¹Nyịidipho, Job, kịa ạwa ẹepho ḍịghaagh Ẹnaan, kápogh mun nyọdi ịdipho ẹpomoghian ạna; eḍighi ịyaar dị nạ aḍighi ịduon phọ, ọdi kạseph ni nyịna.

²²Nạghanan ịtughemi phọ ọdi; lọgh ologhi ạna ikpo ọnhu phọ ọdi.

²³Ii, ẹkpianaan ni nyịna osooromi aloor origheel esi Ẹnaan, ọḅile okunughi ịkaraph phọ ịpe roḍighi bọ ẹpe kꞌạna.

²⁴Toḅologhi sigol phọ ạna; toḅologhi ọkaraghi igey asigol phọ ạna ẹpe ude ọphiiny phọ.

²⁵Meera Ẹnaan Oomo Ịikpo phọ kụ eḍighi gol ạna, ḅịle ọdi kụ aḍighi silva dị okpolonaan nyịna.

²⁶Ọpo kụ amem dị oḍuom ologhi phọ ạna kạtol esi Ẹnaan Oomo Ịikpo kụ nạ ạmiin mọ ọdi kụ azin iboh phọ ạna.

²⁷Mem lọ nạ ạaḅereghi, ọdi kạnaghanan ni nyịna, ḅịle ịlo nạ aguanaan, nạ kạtuugh ghan ni aḍighi.

²⁸Nạ kạmiin ghan ni igey esi oomo ịlo nạ aḍighi, ḅịle ạḍiḅaal kẹmu ni sịphe eten phọ ạna.

²⁹Ẹnaan resooromi ghan ni oye lọ aphoophe loor, ạḅile rapoophe ghan oye lọ asooromi loor.

³⁰Ọdi kạtagharan ni nyịna eḍighi ịyaar lọ nạ ụ́piom, eḍighi ịyaar lọ ịpe nạ raḍighi bọ kụ eḍighi ni elhiom.