Read abua Job 24 Bible Online

Job 24 - abua bible

Job 24

¹Eeghe kụ iḍighi kụ Ẹnaan Oomo Ịikpo phọ íseere bọ mem oogbo ịiruen, ḍio oogbonaan iiḅi ịiruen bụphe rokumu bọ nyọdi?

²Awe ronme ghan olool lọ ogim ọku konme esi pịdi bịdi ọmoogh de phọ ọbughe; bịdi romi ghan iyool-ịga kọlogh ẹpe otu-ịga phọ ạbidi.

³Bịdi rọsighiogh ghan ịnam adool ạbunyigo, kọḅile ọpham nạm oḍighi ekpukele ạnir tụtu ạnir phọ ạkpe ịikpia ọdi.

⁴Bịdi rómeera ghan arukulom ọmoogh riliom ạbidi, ḅịle rọkpaariom ghan rukulom mọ oghiil ạaghian.

⁵Loor esi ịduon phọ arukulom mọ mọghigh ịnam adool rọwa ghan riiḍien ạbidi ẹpe ẹdala phọ ẹgharaghar bọ; ẹnon ekpisi ílho dị bịdi kotue ọki ọwaanaan eḍien nmụny ạbidi.

⁶Emeelom bịdi obugha iizo dị ítu ịlo ạbidi ḅịle rꞌọkuughi iimuma ebughotu ịkaraph awe.

⁷Ḍughul bịdi rọmina ghan bịn dị ịyaar ozua ílho, ịyaar ílho ophoroghom osipheeny.

⁸Ọlophia phọ rạloph ghan bọ ẹpe ạraaḅaraph phọ rakun ghan bịdi, ḅịle kẹn bịdi rokuphian yogh ghan ọgbal asighiigh phọ ọmoogh aani oghoph.

⁹Ịkaraph awe rọsighe ghan bụnyigo ạnmuny koḍighi rẹbene, kọḅile ọsighe nmụny uwekulom mọ kọkpiom ọmugh.

¹⁰Kụ ọlo uwekulom rạki esi, ạsuoma rạ́kpologhian ghan; bịdi rọtol ghan ọkoony kụ kọkuom ịbiakpa phọ.

¹¹Bịdi romiim ghan ọliv komitiom mụnum ḅịle rꞌiimuma avain komitiom miim, kụ ọlo bịdi rꞌaloor odi ọkoony ạmuum.

¹²Ẹpe igbogh ạramha phọ awe dị oḍighi yogh rạraar elegh kụ romuughu ọlooghi, kụ Ẹnaan ẹḅitonaan ịiḅereghi phọ ạbidi.

¹³Awe odi ghan ni dị oghel ḍịḅaal; bịdi ụ́naghanan ḍịḅaal ḅịle rọ́daph ghan.

¹⁴Ḍịroor ọokom-enu phọ raḅetenu ghan kạghi oghiigh uwekulom mọ, ḅịle ḍughul ọdi rạki ghan imi.

¹⁵Oliom ẹmha phọ rakori ghan mọ adulhe eghul; ọdi rapukian ghan risigh ọdi ọbo oye kạmiin ghan bọ nyọdi.

¹⁶Mem aḍughul ạruḅa rọkaaghi ghan ruutu, kụ ọlo mem ootaany bịdi rọbooghian ghan kọḍua esi ạḍiḅaal.

¹⁷Bịdi rokiilaan ghan ḍịḅaal ootaany phọ, kụ ọlo ufiri ọ́moogh ruugu esi ạbidi.

¹⁸Ạmuum-aḍigho rakilom ghan ọkaraph oye phọ kạsighe, ḅịle Ẹnaan etonyon ni de phọ ọdi ạmoogh bọ; ọdi rạ́ki ghan mun oḍighi ẹpe iizo avain phọ ọdi.

¹⁹Ịdipho ibikpo rẹgbo ghan bọ esi ẹghologhol, ịduon kụ ẹdi oḍighinom ịkaraph phọ rape ghan sịphe ade ạbuen odi bọ.

²⁰Ghạlamo onhiin phọ ọdi bịn ọ́otughian mun nyọdi nyịidipho; ạsileegbem melhe nyọdi epiemi ịdipho oreeny lọ ameel.

²¹Ịpe phọ remite ghan loor esi dị ạkpilighi rukpukele ạnmariir, ḅịle ọdi óḍeenaan ọnma ighirigiir nmạriir dị nmụny ụ́mar.

²²Ẹnaan, esi ịikpo phọ ọdi, raagulemi ghan ni igbogh awe phọ; Ẹnaan eḍighi — bịn kụ ọkaraph oye phọ amugh.

²³Eeni amem Ẹnaan ẹbile ọdi ạtol dị ịiḅaghami ílho, kụ ọlo kepoghom ghan ni nyọdi eniin ekpeḍien oomo amem.

²⁴Ọkaraph oye phọ raḍum ghan ni emiighom mọ, kụ ọlo mem dị ẹteeny ọdi kạnu ịdipho ạroogho lọ ọsam, ịdipho eghuuny ọbiakpa lọ mosoph.

²⁵Oye katue ni ạparanaan mọ kị́dipho ḍụghum? Oye katue ni ạwa amitiom mọ ikpo ọnhu phọ ạmi eḍighi ni ọkpe ḍụghum?