Read abua Job 28 Bible Online

Job 28 - abua bible

Job 28

¹Ariisi edi ghan ni ude dị roguph ghan silva komitiom; ariisi edi ni dị roḍighi ghan gol.

²Awe roguph ghan ude kụ komitiom okuron kụ ọozaghami ọgiata omitiom ologhi ạrana.

³Awe rọwaaghi ghan ni rạraar esi ogbogh ufiri. Bịdi rọki ghan ọlha-ude kụ kọwaaghi kụ ọki esi ufiri oguph ọwa ạrana.

⁴Ọkelan ekpisi lọ oye arugh rꞌekpisi dị ẹda oye kési ghan, awe roguph ghan ịidoony aropogh. Ẹpe phọ kụ ẹdi ogina ạbidi kọtol kụ okumuan ghan kụ ọokpaphagh ghan iḍigh ẹpe ariini phọ.

⁵Eḍien resi ghan sịen ade phọ kụ ọlo ẹpe ọlha-ude phọ ni oomo phọ ịdi meḅughuronu eezighiḍian.

⁶Asighiigh phọ edi bọ ẹpe ude phọ ẹmoogh ni sạfair, ḅịle kẹn ọoru phọ ạmoogh ni gol.

⁷Ọogho ólho dị rạmiin ghan eten ẹpe ude phọ roguph bọ. Ḅịle kẹn ọdelhe ólho dị rạpeeph ghan ạnyu ạbidi.

⁸Ạnam-dịka mụghumo ẹnon elhom ẹnam ílho dị retelhe ghan reten phọ ịpe phọ oye úlho bọ.

⁹Awe roguph ghan sighiigh dị ẹkar ẹkpar iboom, roguph ghan rạaḅaraph koḍinyon.

¹⁰Ịdipho bịdi roguph bọ ropogh komitiom eten ariisi asighiigh phọ, bịdi rọmiin ghan ni ịikia ạrana dị ẹman ikpoki.

¹¹Bịdi roguph ghan kọghi osi ude esi phọ ọphiiny phọ amiigh bọ kọḅile omitiom obalelhe rạraar dị ạaghi yogh.

¹²Kụ ọlo ẹghen kụ ẹdi kọmiin bọ olegheri-ịyaar? Ẹghen kụ ẹdi yira kọtuugha ọnaghanan ạḍughum?

¹³Olegheri-ịyaar kótue ọmiin igbo awe; oye ólhegheri ọkaraghi ịpe ọdi ạman bọ.

¹⁴Ude ạriphiiny ạbazi phọ rạḅem ghan mọ olegheri-ịyaar kọ̋miin ẹpe.

¹⁵Kótue ọsighe silva rꞌagol okoom.

¹⁶Ọkaraghi ogey agol rꞌikpo ẹbe bịn ị́man ḍighi ọdi.

¹⁷Ọdi ạman ịyaar apu gol, apu tọbili dị oḍighinom gol mꞌatamaḍiki.

¹⁸Olegheri-ịyaar ạman mạar apu ikpo ẹbe rꞌịkpurukian.

¹⁹Ạtopas dị ạnighe agey rꞌogey agol bịn kọ́tomaam ịdi olegheri-ịyaar ạman.

²⁰Ẹghen nụun kụ azin olegheri-ịyaar? Ẹghen kụ ẹdi kọtuugha ọnaghanan ạḍughum?

²¹Ịyaar ílho dị repooghu ni dị ketue ẹmiin nyọdi. Ghạlamo ẹnun phọ ẹpe rẹpeeph bọ ni.

²²Ghạlamo aḍuugh ḅịle ọphueghi bịn ọḅem ni mọ bụno ụnaghan ụḅem-mọ bịn.

²³Ẹnaan phọ bịn kụ elegheri eten phọ, ẹḅile elegheri esi dị kọmiin olegheri-ịyaar,

²⁴loor esi dị ọdi rạmiin bọ ni ruukuna ade phọ rạmiin ghan oomo ạraraar dị edi eeḍian okuaḍio phọ.

²⁵Mem mọ Ẹnaan ẹngo bọ ịikpo oghim mọ, ẹḅile ẹmha ịpe otu-ḅualhe phọ kaleeny bọ,

²⁶mem mọ Ẹnaan ẹmha bọ ekpisi phọ ọlophia kạloph bọ rꞌeten phọ ẹpe ọomaany phọ katelhe bọ;

²⁷Ọpo kụ amem mọ ọdi ạmiin bọ olegheri-ịyaar phọ rꞌịpe ọdi ạman bọ — kụ ọdi ạḅem mọ ẹnighe ni.

²⁸Ẹnaan ịḅeni ni weye mọ, “Nyina rẹwa ọsu ologhi, pọ nyina kẹlogh ghan eegu Ọmoogh-we phọ. Nyina rẹwa ọmoogh ọnaghanan ạḍughum, pọ nyina kekel ghan ịkaraph.”