Read abua Job 3 Bible Online

Job 3 - abua bible

Job 3

¹Ruukuna phọ aJob ạḅa ni kụ aronyon ḍio phọ ạḍiphe ọmar bọ nyọdi.

²Ẹnaan, tonyon ḍio phọ ụmar bọ ịmi; tonyon ḍughul phọ ọkpo bọ eghun ạmi.

⁴Kiton ḍio phọ ạḍiphe atene ufiri; kạ́atughian mun ḍio phọ ạḍiphe phọ; ạḍiḅaal kímite mun esi ọdi.

⁵Ḍighi ḍio phọ ạḍiphe ḍio ọto rꞌokikiph ufiri; sịghe ọotu aakpereghiom, aḍime erumuḍio phọ.

⁶Piemi ḍughul phọ ạḍiphe phọ sịphe ạlha phọ; awe kúgbiom ghan mun ụ́logh esi.

⁷Ḍighi ịdi edughom rꞌibo kẹ́tolonaan ḍughul phọ ạḍiphe phọ.

⁸Ḅẹni rụḅaghama phọ mọ oronyon ḍio phọ ạḍiphe phọ, bụphe ọmoogh bọ ịikpo ọdaam Lẹviatan.

⁹Kámeera okoriom-ẹenaan ạḍiroor phọ ẹmu; oḍuom ologhi ạḍiroor kụ́tol ḍughul phọ ạḍiphe.

¹⁰Tonyon ḍughul phọ ạḍiphe emeera bọ mọ ụmar ịmi, emeera bọ mọ ụḅogh ịmi ọngo ọto rꞌịiḅaghami.

¹¹Mịnighe dị ọbo mị amugh ologhi ọkuruḅaka onhiin ạmi, ọbo kẹn amugh mem mọ ọpo ọmar bọ bịn.

¹²Eeghe kụ iḍighi kụ onhiin ạmi uḅeton ghan bọ ịmi? Eeghe kụ iḍighi kụ ọdi ụngo bọ ịmi mạmaam mọ ọdi?

¹³Mụghumo mị umugh mem mọ ọpo phọ, ọbo mị rapooghian nyịidipho;

¹⁴ọbo mị rạnaani ghan ịdipho ạraalha ḅịle rꞌawe ịtooghi, bụphe ọḅile bọ odoghoḍi ghan ruutu ạraalha ageedi phọ.

¹⁵Ọbo mị rạnaani ghan ịdipho ạnmuny ọdaam, bụphe omuzeḍi bọ ruutu ạbidi gol rꞌasilva,

¹⁶mụghumo ọnaani ịdipho ọony lọ ọmar kụ umoghi.

¹⁷Sịphe oḍi phọ ịkaraph awe rótue ghan mun koḍighi ịkaraph, ḅịle awe dị arukumuan mẹpher rọmala ghan kophooghian.

¹⁸Ghạlamo ạbuo ikoli bịn rọkelom ghan ẹepho, mokpetenaan ịpe aruwo ẹmhu phọ rọlooghiom ghan bọ komooghaam.

¹⁹Tọrotoro oye odi ni ẹpe phọ, ọpo amitiom bọ ḍien phọ ḅịle rꞌọpo oye úlegheri bọ; ekureriom mọ, ạrebene rọtol ghan ẹereegh.

²⁰Eeghe kụ omeera bọ kụ awe odi ghan dọl ịminimiin bịn? Eeghe kụ ọngo bọ ḍịḅaal weye dị odi esi ọto?

²¹Bịdi rokori ghan ḍuugh, kụ ọlo aḍuugh ímeera ítu; oḍi kụ ạḅeeraan bịdi epu ẹelha.

²²Bịdi ụ́moogh ọḅaal ologhi tụtu bịdi omugh oḍi;

²³Ẹnaan ẹbooghi ịlo iḍue phọ ạbidi kụ ekoonyom bịdi ekitonom.

²⁴Kpạripe rꞌole eḍien, mị odi ghan ọto; kụ mị kạ́bile ịkuph.

²⁵Tọrotoro ịyaar lọ mị aghiilaan remite ghan ni.

²⁶Mị ụ́moogh ẹepho rꞌophooghian; ḅịle kẹn ịiḅaghami phọ ạmi eekuna ílho.