Read abua Job 30 Bible Online

Job 30 - abua bible

Job 30

¹Kụ ọlo awe dị mị kụ aḍighi okumoor oye apu rụmilogh ghan ịmi nyịidipho! Ạburude ạbidi ụ́moogh ghan ịyaar oḍighinom kụ mị úmeera ghan mọ bịdi ọloghonaan ḍịghaagh suogh ạmi rokori iyool-ịga ạmi.

²Bịdi uḍighi ghan ḍita awe dị mọghanyanu, modugh ọpughan oḍighinaan ạmi, ịyaar.

³Bịdi uḍighi weye eboom ekulom rꞌọkoony dị tụtu ọraal ghan ịgharaghar ạsini ireeny — mem aḍughul, ogbo ologhi eḍum.

⁴Bịdi uruph ghan ịbam ireeny ẹpe ẹdala phọ kụ ọraalogh, ghạlamo rꞌạsini eeberia phọ rẹ́dughan bọ ni!

⁵Tọrotoro oye aphorogh ghan bịdi rꞌịlooghi, ịdipho ẹrol dị rọlooghiom rụḅa.

⁶Bịdi ụḅile ghan orughogh iloghi aropogh aruugum, iloghi aropogh dị oguphogh ọgbal asighiigh dị ekpululu.

⁷Ẹpe elegheḍum mọ bịdi uukpomoghan ghan ịdipho ịnam, ọḅile ookurughan ghan ẹpe eḍum mọ.

⁸Egu ạraraar dị ḍien ụ́moogh kụ úḍighi weye! Uphorogh bịdi omitiom sịphe ade phọ.

⁹Nyịidipho bịdi otu kụ rụmilogh ghan ịmi; mị maḍighi oghiil oye esi ạbidi.

¹⁰Bịdi ụ́wa mun ọmiin ạmi; bịdi ọotughian mọ bụno ọnighe ọpughan otuman ạmi, ọḅile ghụn rọsinoghom ghan ịghor risigh ạmi.

¹¹Loor esi dị Ẹnaan midughe ịmi ḅịle mị ụ́moogh mun ọloghonaan ạḍighaagh, bịdi ooghiraan bịn kụ ọsighe oomo ọghagh ologhi phọ ạbidi usomori ịmi.

¹²Aḍita awe phọ ạbuen phọ ruzuom ghan ịmi elephiri; bịdi runyu ghan ịmi oghiil osuma; bịdi ookolobian ịinya ẹgham ạbidi dị esugha ọman.

¹³Bịdi osoph osoor ịduon mị rasuma bọ robianan ghan oogulemi ạmi; kụ oye ólho ọmeremi ạbidi.

¹⁴Bịdi ọḍua ropogh iikpe okoriaam aloor ạmi kụ omiteghu ozuom ẹmhu ạmi.

¹⁵Oboom aruugu rusiph ni ịmi; eghuan phọ ạmi mẹḍua ịdipho ookuugh dị ophula ọlogh esi kụ ịyaar phọ eruphaan, ḅịle kẹn ẹelha phọ ạmi ẹkigh ọotu.

¹⁶Nyịidipho aḍuugh ạmi mẹebeeph; ophooghian ólho ịminimiin phọ ạmi.

¹⁷Mem aḍughul oomo ịḅarara phọ ạmi repin ghan ni; eephina phọ ẹpe rịgbiloghom bọ ịmi eekuna ílho.

¹⁸Ẹnaan mesiph orum ạsuoma phọ ạmi, ạḅile apurughi bịn ạsuoma phọ anmia ịpe ạrol ghan bọ.

¹⁹Ọdi muroph ịmi asumeeny ọposo; mị ụ́nighe upu ẹenir.

²⁰Mị ạmagh nyịna, Ẹnaan, kụ ọlo nạ ómegheron; kụ mem lọ mị ạaḅereghi, nạ ráler ghan mun rụru.

²¹Nạ ạsighe ẹkaraph ekpeḍien kụ ruphoghom ịmi; nạ ạsighe oomo ịikpo phọ ạna kụ rụgbiphoghom ịmi.

²²Nạ ameera kụ ookuugh uphula ịmi ạsighe; nạ ameera kụ oologh ụphiphoghom ịmi.

²³Mị alegheri ni mọ nạ ụsighe ịmi rạkiom ḍuugh ạmi, ọda phọ ọpo odianaan bọ tọrotoro oye.

²⁴Eeghe kụ iḍighi kụ nạ azuom ẹgham oye dị maguul, oye dị kátue aḍighi ịyaar omuton ọlom ọnma ighirigiir?

²⁵Mịna úmoghinaan ghan weye lọ odi esi ịiḅaghami ḍụghum, ạḅile amoghinaan weye lọ ạraraar rẹeḅaghami?

²⁶Mị uḍuom ghan ologhi ọmoogh iboh rꞌạḍiḅaal, kụ ọlo ịiḅaghami rꞌufiri kụ ịḅile ghụn eru.

²⁷Amukum ologhi rꞌịiḅaghami meḍighi ịdi aloor phọ ạmi ẹḍua ni bịn; mị ạmoogh ịminimiin bịn ḍio etum ḍio.

²⁸Mị ạnmir bịn kụ ratelhiom ghan, erumuḍio phọ ị́mu mun; mị ạmeera esi ogbo kụ ạlom ọloghonaan ạḍighaagh.

²⁹Ẹḍogh ạmi ebeeph ẹḅile edi ighirigiir ịdipho ẹḍogh aḍighololoony mꞌostris.

³⁰Aḍizu phọ ạmi mekitonu ebil; osipheeny rụnuemi ịmi.

³¹Sịphe mị ạnaghan ghan bọ sụor iboh, nyịidipho mị rạnaghan ghan emoghi rꞌọto bịn.