Read abua Job 31 Bible Online

Job 31 - abua bible

Job 31

¹Mị maguanaan ni rꞌiikunya mọ mị kápogh ạnir-ephoph kụ ạmoogh ẹephua.

²Eeghia kụ ẹdi Ẹnaan Oomo Ịikpo phọ uḍighi iyira? Ika kụ ẹdi ọdi raanmo ghan ruunmo iiḍighi awe?

³Ọdi raagulemi ghan bụphe ọpiom bọ.

⁴Ẹnaan elegheri ni tọrotoro ịyaar lọ mị aḍighi; ọdi rạmiin ghan ni tọrobo ịlo mị arelhe.

⁵Mị akunya ni mị kőḍighi ghan ịkaraph ḅịle kẹn mị kőokeleghi ghan bụnon awe.

⁶Ẹnaan ẹsighe ni ogey ọtoom kụ uphoghom ịmi, bịn ọdi kạmiin ni ịpe mị aseleman bọ.

⁷Eḍighi ịyaar dị mị mạgbol ghan eten igey phọ, ọbo kẹn mị mạmoogh ghan ẹephua ịkaraph; eḍighi ịyaar dị ạraghaagh ạmi ịḅaal esi ịkaraph,

⁸pọ ịizupha ạmi eegulaan, ḅịle kẹn ạbunon awe kụ ole eḍien lọ mị aḅeph!

⁹Eḍighi ịyaar dị mị mạmoogh ghan ẹephua esi ạnir amatuman ạmi, kụ ạḅukian akori ghan ạnir phọ ọman eghuugh,

¹⁰pọ ạnir phọ ọphon ạmi ạsa eḍien ọnon oye, ạḅile ạmina ẹmina ọnon oye!

¹¹Ịikpia ọdo ịkaraph phọ ịpe phọ ẹkpe oḍighi aḍuugh.

¹²Kẹkighimaam nịan ooni ạnian phọ rele ghan bọ tọrotoro ịyaar lọ mị ạmoogh.

¹³Mem lọ oniin otelhedom ạmi kụ ạghaaph ịlo ạmi, mị ụnaghanan ghan ni ạḅile aḍighi nyọdi ịlo ẹnighe.

¹⁴Eḍighi ịyaar dị ịduon phọ mị úḍighi, mịna kạmeera bọ ika risigh Ẹnaan? Mịna mụkaaph eeghe mem lọ Ẹnaan eru osoph ọoruen ọngo ạmi?

¹⁵Eniin phọ Ẹnaan phọ ịlhem bọ ịmi kụ ẹlhem bọ kẹn ni butelhedom mọ ạmi.

¹⁶Mị kọ̋wile ghan ọloghonaan ạḍighaagh rukulom; mị kőmeera ghan arukpukele ạnmariir ọrol dọl iniin-kụ-eeghe,

¹⁷ọbo kẹn ameera mọ ạbunyigo ạnmuny ọrol ọkoony mem dị mị rale ni.

¹⁸Oomo aghuḍum mọ ạmi mị maako ni bịdi.

¹⁹Mem lọ mị ạmiin oye lọ ịyaar rẹeḅaghami kụ kátue ako ukpe loor esi eboom ekulom,

²⁰mị ụngo ghan ni ạsuoma ẹghologhol dị oḍighinom suphuugh iyool-ịga phọ ạmi kụ ọdi ụseph ịmi rꞌoomo ologhi ọdi.

²¹Eḍighi ịyaar dị mị maagbegheḍiom ghan ọnyigo ọony, loor esi dị mị alegheri bọ ni mọ mị katue ni ạkpar apu nyọdi mem lọ ọghi otu asighiton,

²²pọ ạraghaagh ạmi ewunughian, bịdi ẹkporonu sịen asikpe phọ ạmi!

²³Loor esi dị mị rakiilaan ghan bọ ịpe Ẹnaan rẹliom ghan bọ oye, mị útue uḍighi ịyaar dị ẹrol ịdipho.

²⁴Mị kọ̋kpasi ghan emooph ạmi esi ẹelha,

²⁵ọbo kẹn aphoophe loor ạmi loor esi ẹelha phọ ạmi.

²⁶Erumuḍio phọ mị kọ̋oḅereghi ghan loor esi ạḍimu phọ ọdi, ọbo kẹn ụnwanyu phọ loor esi ẹnighe phọ ọdi.

²⁷Mị kőphe ghan eten oghueni ạbidi ḅịle rꞌọkpun ạḍighaagh ạmi oghueniom ạbidi.

²⁸Ịikpia ọdo ịkaraph phọ ịpe phọ ẹkpe oḍighi aḍuugh; ịpe phọ rẹparanaan ghan Ẹnaan Oomo Ịikpo phọ.

²⁹Ologhi ạmi kọ̋ḅaal ghan mem lọ ẹpomoghian ạmi rạmiinom, ọbo kẹn ologhi ạmi ạḅaal mem lọ ịiḅaghami esoorom bịdi.

³⁰Mị kọ̋pioman ghan ọoḅereghi mọ bịdi omuughu.

³¹Oomo awe dị ruḍighinaan ghan ịmi iiḍighi olegheri ni mọ mị rạlogh ghan ni otu ruuruen.

³²Mị ụmagh ghan ni buteneneen ạlogh otu ạmi kụ úmeera ghan bịdi ọmina ẹpe eten phọ.

³³Ạbunon awe rọbooghi ghan ni ịkaraph ạbidi, kụ ọlo kꞌekulha mị ụ́booghi ịlo ạmi.

³⁴Mị úkiilaan ghan ịlo awe kọḅem; mị kőḅoorian ghan ọrol ologhi otu bịn loor oghiilaan ạreer ạbidi.

³⁵Oye kạ́tol dị kạnaghanan ịphen mị rạkaaph bọ? Mị akunya ni mọ tọrotoro ekpo ọnhu ạmi eḍighi ni ịne. Ẹnaan Oomo Ịikpo phọ ịphagharanaan ịmi! Eḍighi ịyaar dị ịphen ọpo utomoghi bọ ịmi rụgbaanaan bọ ịmi, kụ eḍighi ịdi ọge esi dị mị kạmiin,

³⁶rꞌọḅaal ologhi kụ mị ạsighe ạkpologhian ạḅile azua ẹmhu ạmi ịdipho eghoony.

³⁷Mị mụkaaph ni ạḅeni Ẹnaan tọrotoro ịlo mị maḍighi ghan ạḅile aphoophe ẹmhu ạmi ạmeremi sịphe ghisigh ọdi.

³⁸Eḍighi ịyaar dị mị ami de phọ ạḍiphe mị raḅeph ghan bọ ozo phọ, ạḅile aziton ḍịghaagh ọpo ạkaraghi bọ ạmoogh —

³⁹eḍighi ịyaar dị mị malhe ghan eḍien dị oḅeph sịphe phọ kụ aseere buḅephom iizo phọ ọkoony —

⁴⁰pọ kpạripe lọ ịbiakpa rꞌabali kụ kesi, ạroogho rꞌiitoor kụ esi! Ikpo ọnhu phọ aJob mesi eekuna.