Read abua Job 32 Bible Online

Job 32 - abua bible

Job 32

¹Loor esi dị aJob ameeraam bọ ni akuphom owol mọ ọno ọ́piom, ịraar phọ awe phọ ụwile ni ọphagharanaan ọdi.

²Kụ ọlo oniin oye dị raten aani ni bịn dị oghol mọ Elihu órue mun ọphamaghan ọghagh ologhi phọ ọdi, loor esi dị aJob rạḅem ghan mọ ọno ọ́piom ạḅile ghụn rạḍagha Ẹnaan. (Elihu phọ aḍighi ọony ạBarakel, ẹemara ẹemara aBuz, ḅịle ọdi ọlo eelhe phọ ạRam).

³Ọdi ạghagham kẹn ni ologhi ịraar phọ ạrighiri phọ aJob. Bịdi útue ụ́pagharanaan Job kụ ịduon phọ ịḅile ẹghigh mụdi Ẹnaan phọ ghụn kụ edi ekeeny.

⁴Loor esi dị Elihu kụ ạkaraghi aḍighi ọbumoony dị ạrol aani bọ sịphe phọ, ọdi akori ni tụtu tọrotoro oye mạghaaph ạman.

⁵Mem dị ọdi ạmiin bọ mọ ịraar phọ awe phọ útue ụ́pagharanaan Job, ọdi ạghagh ni ologhi

⁶kụ amiigh ọghaaph: Mị aḍighi ni ọbumoony, ḅịle nyina eḍighi ikumoor awe, kụ iḍighi kụ mị ughiilaan ni ọḅeni anyina ịpe mị ạatughian bọ.

⁷Mị ụḅeni loor phọ ạmi mọ nyina kụ ịkpe ọghaaph, mọ nyina ikumoor awe phọ ịsighe olegheri-ịyaar phọ anyina eḍighinom.

⁸Kụ ọlo uwaloor Ẹnaan Oomo Ịikpo phọ kụ rasoorom ghan weye kụ kạngo olegheri-ịyaar.

⁹Oḍighi okumoor oye kụ réḍighi ghan ịdi awe kolegheri ịyaar ọbo ọbo ọloghonaan ạbidi ḍịghaagh olegheri ịpe eru bọ ịne.

¹⁰Nyịidipho mị rạwa mọ nyina ịnaghanan ịmi; mị kịḅeni inyina ịpe mị ạatughian bọ.

¹¹Mị ụkparam ni kụ ạnaghan ghan mem mọ nyina rẹkaaph bọ, ạḅile akori ghan mem mọ nyina rẹwaragha bọ ikpo ọnhu olegheri-ịyaar phọ.

¹²Mị ulher aḅeri kụ ạnaghan mọ nyina ítue ịkaaph iikpereghi ịpe aJob ạghaaph bọ.

¹³Iḍighi ika kụ nyina ẹsighenom bọ mọ nyina kụ mẹmiin olegheri-ịyaar? Ẹkpe ni dị Ẹnaan kẹpagharanaan Job, loor esi dị nyina memeel.

¹⁴AJob ạghaaph ghan ịḅeni inyina, kạ́mi, kụ ọlo mị kạ́pagharanaan ịpe nyina eḍighi bọ.

¹⁵Job, ikpo ọnhu mebi bịdi; bịdi ụ́moogh ọphagharanaan ọngo ạna.

¹⁶Mịna kaḅoorian bịn ạkiom ghan risigh ḍụghum mem dị bịdi moḅoroghian? Bịdi ọmeregha sịphe bịn ụ́moogh mun ịyaar ọghaaph.

¹⁷Eeye, mị kạngo ọphagharanaan ọlo ạmi nyịidipho, ạḅile ịḅeni inyina ịpe mị ạatughian bọ.

¹⁸Mị kátue mun akori. Mị kátue mun aḅoronom ikpo ọnhu phọ.

¹⁹Eḍighi ịyaar dị mị ụ́moogh ọgel ọghaaph aani, mị katuphaan ịdipho okuru lọ amiim amuza.

²⁰Mị kátue mun ạkparam; ịkpianaan ịmi ọghaaph.

²¹Mị kạ́pel oye aḍighan oye esi ọghaaph phọ ọphon; mị ráatumeni oye.

²²Mị ụ́maar ootumeni oye, ḅịle Ẹnaan keegborion ni ịliom ịmi eḍighi ịyaar dị mị aḍighi ịdipho.