Read abua Job 33 Bible Online

Job 33 - abua bible

Job 33

¹Kụ nyịidipho, Job, mạar ạnaghan oomo ịphen mị kạkaaph bọ.

²Mị maakolobian ọghaaph ịpe edi bọ ologhi phọ ạmi.

³Oomo ikpo ọnhu phọ ạmi ịne ni; ḅịle kẹn mị rạkaaph ni igey phọ.

⁴Uwaloor phọ Ẹnaan kụ ụlhem ịmi ạḅile ụngo ịmi ghuḍum.

⁵Ụphagharanaan ịmi, mụghumo nạ atue. Kookolobian ịpe nạ kạkaaph bọ ạgbagharan.

⁶Nạ rꞌạmi igina phọ ni risigh Ẹnaan, ụsighe ni ọposo kụ ọḅolom ịyal ayira.

⁷Kụ iḍighi kụ nạ ọ́moogh ịyaar ọtuan oghiilaan ạmi; mị nyịna kákpobiom.

⁸Nyịidipho ịphen kụ ịdi mị ạnaghan dị nạ ạḅem:

⁹“Mị ịyaar ụ́piom; mị úḍighi ịyaar ekeeny. Mị ologh úsoor ḅịle ịkaraph úḍighi.

¹⁰Kụ ọlo Ẹnaan ẹmoogh ni eeghola ọtuan ọtomoghi ạmi kụ oḍighi ạmi ịdipho ẹpomoghian.

¹¹Ọdi ạsighe izime kụ ạpaḍiom ruwol ạmi; ọdi ragon ghan ni tọrobo ịlo mị arelhe.”

¹²Kụ ọlo mị rạḅeni nyịna, Job, nạ ạpioman ni. Ẹnaan epu ni tọrotoro oye.

¹³Eeghe kụ iḍighi bọ kụ nạ rạnughe bọ ẹka Ẹnaan phọ mọ ọdi rạ́pagharanaan ghan ịlo oye ạlom nyọdi?

¹⁴Ghạlamo ịdipho Ẹnaan ẹghaaph bọ ni ẹḅile ẹghaaph, oye ọ́naghanan ịpe ọdi rạḅem bọ.

¹⁵Ḍughul mem lọ awe mọnaani, Ẹnaan rẹḅaanaan ghan reten ạmalha rꞌọmiin ikon.

¹⁶Ọdi raḍighi ghan ni ịdi bịdi kọnaghanan ịpe ọdi rạkaaph bọ, kụ aruugu rasiph ghan ni bịdi esi ịlo ọdi ạphur rụru.

¹⁷Ẹnaan rẹkaaph ghan oḍighi ịlo bịdi kọbile oḍighi ịkaraph rꞌọphelom ạbidi ọbo kopoophe ghan bọ loor.

¹⁸Ọdi kámeera mọ bịdi oogulaan; ọdi rạpel ghan bịdi esi aḍuugh rꞌaloor.

¹⁹Ẹnaan rẹsighe ghan ni ẹzegh keelemiom oye, ẹḅile emuzeḍiom loor phọ ọdi rꞌariiphina.

²⁰Oye dị úmoon rạ́moogh ghan ẹephua olhe eḍien, ghạlamo eḍien dị ọkuami ni ọsa retu ghan ozu.

²¹Aloor phọ ọdi remiteghu ghan ni iboom; nạ katue ni ạmiin oomo ịḅarara phọ ọdi.

²²Ọdi rạwa ogheel ọmar iḍim.

²³Iini ọokpaany katu ni ọloghonaan ọdi ḍịghaagh — oniin esi ạsimuunir ạruukpaany kꞌẸnaan, bụphe rọotughianam ghan bọ weye iiḍighi phọ ạbidi.

²⁴Esi ọnma ighirigiir ọokpaany phọ kạḅem mọ, “Ịbile nyọdi. Ọdi kạ́ki ọmar iḍim. Pọrono ịyaar ọtagharanam ọdi.”

²⁵Aloor phọ ọdi kẹḅile ni ẹekparagh ịdipho ọbumoony.

²⁶Mem lọ ọdi ạaḅereghi, Ẹnaan kẹnaghan ni ịiḅereghi phọ ọdi; ọdi kaaseeny ni Ẹnaan rꞌibo; Ẹnaan kẹḅile ni eselemi rạraar phọ ọdi.

²⁷Ọdi kạkaaph ni esi ogbo mọ, “Mị maḍighi ịkaraph. Mị agey úḍighi, kụ ọlo Ẹnaan ịnma ni ịmi ighirigiir.

²⁸Ọdi ómeera mọ mị ukeel ọmar iḍim, kụ mị ạḅile bọ ni odi rapooghu.”

²⁹Ẹnaan reḍighi ghan ni kẹḅile eḍighi ịphen phọ;

³⁰Ọdi rạpel ghan ni ghuḍum oye, kạḅile ạngo nyọdi iboh aghuḍum.

³¹Nyịidipho, Job, nạghanan ịphen mị rạkaaph bọ; ḅoorian mị kạkaaph.

³²Kụ ọlo eḍighi ịyaar dị nạ ạmoogh ịyaar ọghaaph, pọ kạaph mị ụnaghan. Mị kameeraam ni rꞌibo mọ nạ odi ni elhiom.

³³Kụ ịdipho ílho, pọ ḅoorian ụnaghanan ịmi, bịn mị kạtughemi nyịna olegheri-ịyaar.