Read abua Job 36 Bible Online

Job 36 - abua bible

Job 36

¹Kpạram ạḅile ạnaghan ẹphurukpu ịphen mị rạkaaph bọ ịlo Ẹnaan.

³Olegheri-ịyaar phọ ạmi ạbugh ni; mị kaḍighinom ni ịpe mị alegheri bọ esi oḍeenaan mọ Ẹnaan Ọlemia phọ ạmi oye iiḅi ịiruen.

⁴Ịyaar ílho dị mị ạḅeni nyịna dị eḍighi ọkpe; nạ ạkaraghi rạmiin oye dị ạsu ologhi sịen risigh ạna.

⁵Pọ eeghe ịikpo dị Ẹnaan ẹmoogh. Ọdi rạ́ḅitonaan ghan oye; ịyaar ílho dị ọdi ụ́naghanan.

⁶Ọdi rámeera ghan mọ abuḍighinom ịkaraph ọrol ghan bịn, ḅịle ọdi rasophonaan ghan rukulom iiḅi ịiruen.

⁷Ọdi raako ghan ni weye aruukuan; ọdi rameera ghan ni mọ bịdi ọda ịdipho ạraalha, kạḅile ameera mọ oghueni bịdi kꞌagee-pọ.

⁸Kụ ọlo eḍighi ịyaar lọ ọphaḍiom weye izime, bịdi ọmiinom esi ịdi bịdi moḍighi,

⁹Ẹnaan reḍeenaan ghan ni bịdi ịkaraph phọ ạbidi rꞌophoophe aloor phọ ạbidi.

¹⁰Ọdi raḍighi ghan ni ịdi bịdi kọnaghanan ọphur ạruru phọ ọdi mọ bịdi ọḍua esi ịkaraph.

¹¹Eḍighi ịyaar lọ bịdi ọnaghanan Ẹnaan kụ okumu nyọdi, pọ edughom rꞌẹepho kụ kẹtolonaan ghuḍum ạbidi.

¹²Kụ ọlo ịdipho ílho, pọ bịdi komughom rꞌélegheri ịyaar bịn ọḅeeny okol phọ osi ọmar iḍim.

¹³Awe dị Ẹnaan úlegheri odimom ghan ọghagh ologhi, kụ ghạlamo amem lọ ọliom ni, bịdi rọ́oḅereghi ghan kọlom ọloghonaan ạḍighaagh.

¹⁴Bịdi romugh ghan ẹpuuny, ạdol umugholoor kụ reegborion ghan bịdi.

¹⁵Kụ ọlo Ẹnaan rẹsighe ghan ni ịminimiin kẹtughemiom weye, ḅịle kẹn rẹsighe ghan ịiḅaghami kẹḅaranom riḍien ạbidi.

¹⁶Ẹnaan imitiom nyịna esi ịiḅaghami, ẹḅile emeera nạ ạghelom ịma ạdol; eḍien olhe emuza kꞌạna.

¹⁷Kụ ọlo nyịidipho rọliom nyịna ịpe ẹkpianaan bọ.

¹⁸Gona loor ạna ọbo ịgara keekeleghi ghan bọ nyịna, ọbo nạ kape ghan bọ eten loor ẹmhu ẹelha.

¹⁹Ịlooghi ọloghonaan ạḍighaagh nyịna sụo kẹ́ngo; oomo ịnyaam mọ ạna kétue ẹloghonaan nyịna ḍịghaagh nyịidipho.

²⁰Kạ́lom mọ aḍughul eghul, mem mọ ọpo areelhe phọ kepe bọ.

²¹Gona loor ạna ọbo nạ kạki ghan bọ ẹku ịkaraph; ụngo nyịna ịminimiin phọ ọbo nạ aghiilaan ịkaraph.

²²Tụutughian igbogh ịikpo phọ Ẹnaan; ọdi kụ ọkaraghi ogbogh ọtughemia.

²³Oye ólho dị kạḅeni Ẹnaan ịlo oḍighi, ọbo kẹn ạgbaanaan mọ ọdi aḍighi ịkaraph.

²⁴Roboom ghan nyọdi oomo amem esi iiḍighi phọ ọdi; ẹkpianaan nyịna kẹn oboom ghan ọdi.

²⁵Tọrotoro oye mạmiin ni ịphen ọdi maḍighi bọ; kụ ọlo yira kọtol egher kụ opogh aani ghan.

²⁶Yira kọ́kar otue olegheri oomo phọ ịpe ọdi ạman bọ, ọbo kẹn ogbi ạsia lọ ọdi ạman.

²⁷Ẹnaan phọ kụ rẹsighe ghan bọ mụum sịen ade phọ kụ katene ikpo ọlophia.

²⁸Ọdi kụ rameera ghan bọ mọ ọlophia ạlophonaan oomo awe.

²⁹Oye ólho dị alegheri ịpe ọotu phọ ratelhe ghan bọ rꞌịpe ọomaany rẹtaph ghan bọ ẹpe okuaḍio phọ, ẹpe Ẹnaan erugh bọ.

³⁰Aḍio phọ rẹmepheghian ghan ẹpe oomo okuaḍio phọ, kụ ọlo ude ọphiiny phọ abil li.

³¹Ịduon kụ ịdi ọdi rạngo ghan eḍien weye phọ kạḅile amuzeḍinaan eḍien.

³²Ọdi rasiphom ghan ḍịghaagh ọdi ọomaany kụ kạtuugh esi ạraph.

³³Ọomaany kụ rạḅem ghan mọ oghim ratu, kụ ạsinam bịn elegheri ni mọ ọdi ratu.