Read abua Job 37 Bible Online

Job 37 - abua bible

Job 37

¹Oghim raḍighi ghan ịdi oḅio ạmi rakaph ghan.

²Oomo anyina, ịnaghan ẹḍogh Ẹnaan, ọomaany phọ ạḍua bọ ọnhu phọ ọdi ramite.

³Ọdi kụ ratom ghan bọ kụ aḍio phọ rẹmepheghian ghan bọ ẹpe okuaḍio phọ, ẹḍua eniin eekuna ade phọ esi ẹpheri phọ.

⁴Kụ ogbi ọnaghan ẹḍogh phọ ọdi, egbogh ẹḍogh ọomaany phọ, ḅịle kẹn aḍio phọ rẹmepheghian ghan oomo amem mọ.

⁵Esi ịto phọ Ẹnaan ịikia ạraraar remite ghan ni, ịikia ạraraar dị yira kótue ọnaghanan.

⁶Ọdi ạto mọ ibikpo ẹloph sịen ade phọ, kụ ạḅile ạngo ogbogh oghim.

⁷Ọdi kụ rakureri ghan iiḍighi awe; ọdi raḍeenaan ghan bịdi ịpe ọdi katue bọ aḍighi.

⁸Ilhom ịnam reḍiku ropogh ạbidi.

⁹Oghim rạḍua ghan ẹpe esoorom mọ kụ karu, kụ oroogh dị ạbugh iboom rạḍua ghan ephunom mọ kụ karu.

¹⁰Aḍiphooghu Ẹnaan rẹpoomi ghan ni mụum, kẹḅile etene ibikpo.

¹¹Aḍio phọ rẹmepheghian ghan ẹpe ọotu phọ,

¹²ịduon bịdi retelhe bọ esi ogbi phọ Ẹnaan. Bịdi reḍighi ghan oomo ịlo Ẹnaan ẹto, tọrotoro ekpisi sịen oomo aḅirini phọ.

¹³Ẹnaan retom ghan ọlophia mọ ạlophom de phọ; ọdi katue ni ạsighe ạliom oye mụghumo oḍeenaan ạḍiḅeeraan esi ạbidi.

¹⁴Job, ḅoorian ẹnum ạnaghan; gbiighi rạraar ịiḍaany phọ Ẹnaan raḍighi ghan bọ.

¹⁵Nạ alegheri ni ịpe Ẹnaan rẹtooghi ghan bọ kụ reḍighi ghan bọ ịpe aḍio phọ rẹmepheghian ghan bọ?

¹⁶Nạ alegheri ni ịpe ọotu phọ ratelhe ghan bọ ẹpe okuaḍio phọ, oḍighi ẹekia ẹmaar phọ Ẹnaan?

¹⁷Eeye, nạ kạmiinom ghan esi ẹghologhol phọ bịn mem lọ ookuugh ẹpe esoorom mọ rakugh de phọ.

¹⁸Nạ katue ni ạloghonaan ḍịghaagh Ẹnaan phọ ọotarion okuaḍio phọ, ạḅile aḍighi ịlo kạkpar ạḅile ạmu ịdipho okuron ḍụghum?

¹⁹Ụtughemi iyoor ịlo ọḅeni Ẹnaan; yoor ụ́moogh mun ịyaar ọḅem.

²⁰Mị rápuru ọḅaanaan Ẹnaan; eeghe kụ iḍighi kụ mị kạngo bọ nyọdi ọgel oogulemi ạmi?

²¹Kụ nyịidipho ạḍiḅaal okuaḍio phọ reeloghoḍian ni, rẹmu kẹphughan ophogh; ḅịle ookuugh phọ maḅeer okuaḍio phọ ạḅaalami.

²²Ẹpe ephunom mọ rẹmu ni iboom ịdipho agol, kụ eegu phọ Ẹnaan Oomo Ịikpo phọ ịngo ni iyira omaghagha.

²³Ịikpo phọ Ẹnaan ẹbugh ịdi yira kótue otuman nyọdi; esi ạdol phọ ọdi rꞌawe ọdi aakuan ni ạḅile rasoph ghan iiḅi ịiruen.

²⁴Ẹpe kụ ịyaar phọ iikia ílho bọ ịduon oomo awe rokiilaan ghan bọ nyọdi, ḅịle kẹn ọdi rạḅitonaan ghan bụphe ọḅem bọ mọ bụno awe olegheri-ịyaar.