Read abua Job 38 Bible Online

Job 38 - abua bible

Job 38

¹Ọmoogh-we phọ ạḅaanaan Job mem oghim.

²Nạ ạnhian opuru ịlo olegheri ịyaar phọ ạmi rꞌikpo ọnhu elologhi phọ ạna?

³Mẹera ịlo olephiri ọony ạphagharanaan ḍipuru phọ mị kapuru bọ nyịna.

⁴Nạ ụrol li mem mọ mị ạlhem bọ aḅirini phọ? Eḍighi ịyaar dị nạ alegheri ni kꞌịphen kꞌịphen, pọ ụḅeni ịmi ịphen phọ.

⁵Ạnhian kụ agbiighi bọ ịpe aḅirini phọ kaleeny bọ? Ạnhian kụ ạpham bọ oḍigh phọ ọtooghiom bọ? Nạ alegheri ni oomo ọphagharanaan phọ ḍụghum?

⁶Eeghe kụ rẹpam ghan bọ rọko phọ erool bọ de phọ? Ạnhian kụ aphighi bọ aḅirini phọ?

⁷Ḍịroor aḍio phọ ạḍiphe phọ ạraanaan phọ ịmoor ri sụor, ḅịle kẹn ạruukpaany kꞌạke phọ ịlo ni ḍịolho iboh.

⁸Ạnhian kụ aghughi bọ rughuugh phọ kụ ọphiiny phọ ạmeera bọ mem mọ ọpo ọdi aruphaan bọ amite ọkuruḅaka ade phọ?

⁹Mị kụ ụsighe bọ ọotu aakpereghiom ọphiiny phọ, ạḅile ạsighe ufiri aphurughiom.

¹⁰Mị kụ ụmaanaan ọku ọphiiny phọ ạḅile ạlhogh iigbom rꞌeḍighom.

¹¹Kụ mị ạḅeni nyọdi mọ, “Nạ masi sịen, kạ́ḅeeny! Oologh phọ ạna asi ghan sịen bịn!”

¹²Job, kꞌekulha kꞌekulha nạ mạto ghan ni bịn ạḍiroor ẹḅaal?

¹³Nạ mạto ghan ni bịn ạḍiroor ẹsighe de phọ ẹḅile epighemi bụkaraph awe phọ riisi ịbooghian phọ ạbidi?

¹⁴Ootaany kụ ragananami ghan roogbolom rꞌariiḍiiny phọ ịdipho ẹekula ukpe lọ ọkpooghi, eganana ịdipho ẹda lọ ọzer esi ọposo.

¹⁵Ạḍiḅaal ootaany rẹeḅaghami ghan ni bụkaraph awe, kẹḅile ekikima bịdi esi ịkaraph.

¹⁶Nạ masi ni rụudu ude ọphiiny ḍụghum? Nạ marelhe ni ude otu-ḅualhe phọ?

¹⁷Oye maḍeenaan ni nyịna rụnhu-aḍibuo ọmar iḍim?

¹⁸Nạ alegheri ni ịpe aḅirini phọ ạbugh bọ aleeny? Ụphagharanaan ịmi mụghumo nạ alegheri.

¹⁹Nạ alegheri ni ẹpe ạḍiḅaal ẹḍua ghan bọ kụ retu, ọbo kẹn ẹpe ufiri phọ rạḍua ghan bọ karu?

²⁰Nạ katue ni aḍeenaan bịdi ẹekela ekpisi ọghi, ọbo kẹn ọḅile oḅulemi ạbidi?

²¹Mị alegheri ni mọ nạ katue ni loor ịduon nạ mạkpo bọ kụ nạ ạrol aani bọ ni mem mọ ọlhem bọ!

²²Nạ maḍigh ni iisoph phọ ịpe mị akpol bọ ibikpo phọ?

²³Mị aseere rakoriom ghan mem ịiḅaghami, siḍughul-otu elephiri rꞌạraagham.

²⁴Nạ mạghi ghan ni sịphe erumuḍio phọ rẹḍua ghan bọ kemite, ọbo kẹn sịphe ookuugh phọ raḅetenu ghan bọ ẹpe erumuḍio phọ remite ghan bọ?

²⁵Ạnhian kụ ạkonyon sikol phọ ạmuum ọlophia phọ rạdaph ghan bọ, ạḅile ạḅaalami eten ọomaany phọ?

²⁶Ạnhian kụ raseere ghan bọ ọlophia ẹpe oye útugh bọ?

²⁷Ạnhian kụ raadu ghan mụum ḍịgharaghar ade phọ kụ ạroogho phọ rasi ghan bọ?

²⁸Ọlophia phọ rꞌooto phọ ọmoogh ni ọde ḍụghum?

²⁹Ạnhian kụ onhiin ibikpo phọ rꞌooroogh phọ,

³⁰ọpo rakiton ghan bọ mụum katene ẹna, ạḅile ạaphomi ạnyu ọphiiny?

³¹Nạ katue ni ạkoroghi rạanaan ạPledis ạḅile ạakpo iḍigh phọ ẹpham bọ ẹenaan Orion ḍụghum?

³²Nạ katue ni amitiom rạanaan phọ mem dị ẹkpianaan, ạḅile aḍeenaan erelhe Egbogh rꞌẸbam ạranaan phọ oghol bọ mọ ạBeya?

³³Nạ alegheri ni iilogh phọ repogh bọ okuaḍio phọ, ḅịle kẹn nạ katue ni ạsighe iilogh phọ ịpe phọ apoghom de phọ?

³⁴Nạ katue ni ạto ạḅeni ọotu phọ bịn ọlophia ạloph?

³⁵Kụ eḍighi ịyaar dị nạ ạto mọ aḍio phọ ẹmepheghian, ọdi katue ni atu risigh ạna ạḅem mọ, “Mị odi oḍighi ịlo nạ ạḅem.”

³⁶Ạnhian kụ ạḅeni bọ ạkeledeeny Ọphiiny aNail phọ mem lọ ạmuum-aḍigho katu, ọbo kẹn ạnhian kụ ạḅeni kẹnegh mem lọ ọlophia kạloph?

³⁷Ạnhian kụ ạsu ologhi dị katue agbi ọotu phọ kụ ạḅile ạgoghoghomi mọ ọlophia aakuan,

³⁸ọlophia dị kaakpomoghi ophugh phọ atene rọbol.

³⁹Nạ kụ rạwaanaan ghan eḍien ạnam-dịka ḍụghum, kạḅile ạpheremi eḍien ugheel ạnam-dịka lọ ọkoony rasiph,

⁴⁰mem lọ bịdi ạaghian iloghi aropogh phọ ạbidi, ọbo kẹn ọmina yogh iloghi aropogh phọ ạbidi regon?

⁴¹Ạnhian kụ rạngo ghan eḍien rẹghiligho mem dị rẹpeeph rꞌọkoony, mem dị ạnmuny ạbidi rumoghiom ịmi eḍien?