Read abua Job 40 Bible Online

Job 40 - abua bible

Job 40

¹Job, nạ kụ ụpa ịnugh Ẹnaan Oomo Ịikpo phọ; nạ kạ́gba mun nyịidipho ḍụghum kụ nạ kạpagharanaan ni?

³Mị ụghaaphom rꞌelologhi, Ọmoogh-we. Mịna kạpagharanaan eeghia? Mị kạ́ki mun ọghaaph ịyaar.

⁵Ọghaaph phọ ạmi mạphughan.

⁶Kụ esi oghim kụ ẹdi Ọmoogh-we phọ ạḅaanaan kẹn Job.

⁷Mẹera nyịidipho ịdipho olephiri ọony, ạphanyanaan sipuru phọ ạmi.

⁸Nạ rạwa ghan ọma omitiom mọ mị rásoph ghan igey ịiruen — ọḅem mọ mị odi ekeeny kụ nạ odi elhiom?

⁹Nạ ạmoogh ni ịikpo uuleeny ịmi ḍụghum? Ẹḍogh ạna ketue ni emoogha ịduon ẹphen ạmi?

¹⁰Eḍighi ịdipho, pọ mẹeraam rughuenian phọ ạna, sịghe igbogh rꞌeegu kụ ạkpologhian.

¹¹Mịin bụphe ophoophe bọ loor phọ ạbidi; kạgham bịdi ologhi bịdi osooromi loor ạbidi.

¹²Ii, pogh bịdi ạsighe asoore ude; piemi bụkaraph awe phọ sịphe bịdi ọmeera bọ.

¹³Sịghe oomo ạbidi aḍi ude; pạḍi bịdi ẹpe ọmar iḍim.

¹⁴Kụ mị agbi oḍighi ọḅel oye dị kaboomi nyịna, ạḅile ameeraam mọ nạ mazin ḍịghaagh iphelegbe.

¹⁵Mạar aphogh ọoma ạmuum; mị kụ ụlhem nyọdi ạḅile ạlhem nyịna. Ọdi rạtaal ghan rọogho ịdipho ạnam

¹⁶kụ ọlo ịpe eeghia ịikpo dị edi sịphe aloor phọ ọdi, ḅịle kẹn ịpe eeghia ịikpo dị edi sịphe ighiph phọ ọdi!

¹⁷Ẹsoph phọ ọdi ẹmeera ịdipho ọsaga ḅịle kẹn ighiph aruwol phọ ọdi ẹmoogh ni ịikpo.

¹⁸Ịḅarara phọ ọdi ẹkpar ịdipho enaba, ḅịle kẹn aruwol phọ ọdi ẹkigh okuron.

¹⁹Ọdi kụ ọkaraghi ẹekia ẹnam esi oomo ạraraar phọ mị ạlhem bọ! Ọpo ạlhem bọ nyọdi bịn kụ katue ạkpar apu nyọdi.

²⁰Ạroogho dị ọdi rạtaal ghan rasi ghan ẹpe aroogbolom mọ ilhom ịnam mọ repegh ghan bọ ephegh phọ.

²¹Ọdi raḍigh ghan ni esi ạroogho iitoor kụ kạaghian, ạḅile ạbooghian ologhi iipoghoḍian esi ighool.

²²Ạroogho iitoor phọ rꞌireeny ọgbal okol ạmuum mọ kụ reekpereghiom ghan nyọdi oghoph.

²³Ọdi rákiilaan ghan mụum ọphiiny dị rakil iboom; mem lọ ạmuum ạJodan phọ aakpereghiom ghisigh ọdi, ọdi rạpoomi ghan ni loor ọdi.

²⁴Ạnhian kụ katue apuki riḍien ọdi bịn asiph nyọdi? Ọbo kẹn ạnhian kụ katue ạkpami ḍiphil dị kesiph izon ọdi?