Read abua Job 41 Bible Online

Job 41 - abua bible

Job 41

¹Ạnhian kụ katue ạsighe ekpo aḍiḅaph bịn ạḍaam Lẹviatan ọbo kẹn ạsighe oḍigh bịn ạkpoom nem ọdi?

²Nạ katue ni ạlogh oḍigh apughe izon eghol ọbo kẹn ạkomom ḍiḅaph lẹegh phọ ọdi?

³Ọdi katue ni ạaḅereghian nyịna mọ meera ọno agheel? Ọdi kạlom ni nyịna ọnma ighirigiir ḍụghum?

⁴Ọdi katue ni ameera aguanaan okumu ạna kꞌagee-pọ ḍụghum?

⁵Nạ katue ni ạkpooghi nyọdi ịdipho ẹnun lọ orughom otu, ịdipho ịyaar lọ ạnmanyaan-otu ạna kopeghom ephegh?

⁶Awe lọ rọze ghan ina kotue ni otu omerenyan ogho ọdi ḍụghum? Abumuul ḍighi kotue ni oogbo nyọdi obool ḍụghum?

⁷Nạ katue ni ạsighe ịsoph atoph ḍizu phọ ọdi ọbo kẹn ạsighe ogbogh ọsoph agim ẹmhu ọdi?

⁸Ḅọgh nyọdi mem bịn nạ kạ́ḅile mun amuneni ịyal; nạ kábula ẹgham dị nyina kebe!

⁹Tọrotoro oye lọ ạmiin Lẹviatan rameel ghan ni ude loor esi eepuph.

¹⁰Mem dị oye ạdegh nyọdi, ọdi rạgam ghan ni iboom; oye ólho dị katue ạmerenyan nyọdi.

¹¹Ạnhian kụ katue ạdegh nyọdi kụ ạtol ẹereegh? Oye ólho sịen oomo aḅirini phọ dị katue aḍighi ịdipho?

¹²Mị kạḅeni nyịna ịlo aruwol eghol ạLeviatan ạḅile ạmaaghi ịpe ọdi ạbugh bọ ạḅile ạkpar ịikpo.

¹³Oye kátue ạpaar ozu ạnyu phọ ọdi ọbo kẹn ạsighe ọsoph agimom rạna phọ ọdi ạkpologhian bọ.

¹⁴Ạnhian kụ katue ạtagharan sịleegh phọ ọdi, ịdipho ạralaal phọ ịpe eḍigh bọ ruugu phọ kụ ekitonom bọ?

¹⁵Ọman phọ ọdi ọsuaram kụ ạde akitonom, ẹḅaraghan sịphe aloor phọ kụ ẹkpar ịdipho ẹna.

¹⁶Ọmaar ri kụ otulughi ọgbiphe ịdi kótue ọlogh ẹlem sịphe ịbaay phọ.

¹⁷Oomo phọ ạbidi ẹmaar ẹgbiphan ịdi ịyaar kétue ẹpam ẹkpagharan.

¹⁸Ạnian kụ remite ghan mem lọ ọdi ạzia, kụ ariḍien ọdi rẹtaphan ghan ịdipho erumuḍio.

¹⁹Asinem ạnian kụ remite ghan ọnhu ọdi ịdipho ạmuum lọ rakil.

²⁰Ạmughi ramiteghu ghan izon ọdi, ịdipho esi lọ okpoph rọogho kụ rọsaam eḍien.

²¹Aḍiphooghu ọdi remitiom ghan nịan; asinem ạnian kụ remite ghan ọnhu ọdi.

²²Orum ọdi ạmoogh ịikpo ịdi oomo awe lọ ozuan nyọdi aruugu rasiph ghan ni.

²³Sịphe aḍizu phọ ọdi esi dị edugh ílho ghan; ẹkpar ịdipho okuron.

²⁴Sịphe ekpom mọ ọdi oghiilaan ólho ghan, ẹkpar ịdipho aḍighiigh.

²⁵Mem dị ọdi aḅetenu, ghạlamo awe igbogh ịikpo bịn rokiilaan ghan ni; aruugu dị ịlo oḍighi ílho kụ rasiph ghan bịdi.

²⁶Elhool ẹgham ílho dị ketue eben nyọdi ẹlogh ẹlem; ọsoph ọbo kẹn ẹkpina dị ketue egim nyọdi ílho ghan.

²⁷Esi ọdi okuron adugh ọkul ịdipho ạroogho lọ mạgharaghar; ḅịle enaba edugh ịdipho ạḍipe lọ mẹḅor.

²⁸Ẹkpina ílho dị ketue eḍighi ịdi ọdi kakiil; ạrana lọ oroḅol nyọdi rẹkigh ghan ịdipho ạroogho lọ ọsam kụ mạgharaghar.

²⁹Esi ọdi ẹḅam ẹkigh ọpherepe ạroogho lọ ọsam kụ mạgharaghar, kụ ọdi rạmilogh ghan mem lọ awe oroph ọsoph.

³⁰Ipholopol dị edi ọkuruḅaka ọdi ẹkigh ipoḍi oko lọ aḅomaan; bịdi rẹparion ghan ọogha ade phọ ịdipho okuron lọ rọgbiom ịbiakpa.

³¹Ọdi rapighemi ghan ọphiiny ịdipho ạmuum lọ rapul, kạḅile aḍighi ịdi kapul ịdipho aguugh ạmunum lọ rọsa.

³²Ọdi rạbile ghan ni eten dị rẹmu ẹpe ọman phọ ọdi, kạḅile akiton ọphiiny phọ atene ọphalaḅaal oopha.

³³Ịyaar ílho sịen ade phọ dị kọsighe ọtomaam nyọdi; ọdi ịyaar dị ị́moogh oghiilaan.

³⁴Ọdi rapogh ghan ni kasoore ghạlamo rꞌịnam lọ ephoophe loor; ọdi kụ ọolha-ẹmha oomo ọmar ịnam.