Read abua Job 42 Bible Online

Job 42 - abua bible

Job 42

¹Kụ aJob ạphagharanaan Ọmoogh-we phọ.

²Ọmoogh-we, mị alegheri ni mọ nạ ạmoogh oomo ịikpo; mọ nạ katue ni aḍighi tọrotoro ịlo nạ ạwa.

³Nạ apuru ịpe mị ạtu bọ kụ ạḍagha bọ olegheri-ịyaar phọ ạna mem dị elologhi ạmi eleeny ịduon. Mị ụghaaph ghan ịlo ạraraar dị mị ụ́naghanan, rꞌịlo ịiḍaany dị ipel ịmi olegheri.

⁴Nạ ụḅeni ịmi olher ạruru mem mọ nạ ạghaaph ghan bọ, ḅịle mọ mị ụpagharanaan sipuru phọ ạna.

⁵Mem dị meten mị ulegheri ghan rạraar dị awe ụḅeni ịmi kụ ọlo nyịidipho mị mạkaraghi ạsighe riḍien ạmi ạmiinom nyịna.

⁶Loor ịduon phọ umugholoor rusiph ni ịmi esi oomo phọ ịpe mị ạḅemogh bọ kụ mị magbula ọoru rꞌophugh esi okiton.

⁷Ọmoogh-we phọ rọghaaph bọ rọmadan rọḅeni Job, kụ ọdi ạḅeni Ẹlifaz, “Mị ạmoogh ni ọghagh ologhi esi ạna rꞌịyal phọ ạrighiri phọ ạna, loor esi dị nyina ị́kaaph ịpe eru bọ ịne ịlo ạmi, ịdipho aJob otelhedom mọ ạmi ạghaaph bọ.

⁸Nyịidipho sịghe oḍual ilephiri ạsinam rꞌoḍual idughuna ạghiomonaan Job ạsighe ạphighironaan ẹkia loor phọ anyina. AJob kịiḅereghinaan inyina kụ mị kạnaghanan ni ịiḅereghi phọ ọdi bịn mị ạbile oofolomi anyina ịdipho nyina ẹkpe bọ oofolomi phọ. Nyina ị́kaaph ịne ịlo ạmi ịdipho ọdi ạghaaph bọ.”

⁹Ẹlifaz rꞌạBildad ḅịle rꞌaZofar oḍighi ịpe Ọmoogh-we phọ ạḅeni bọ bịdi oḍighi phọ, kụ Ọmoogh-we phọ ạnaghanan ịiḅereghi phọ aJob.

¹⁰AJob rọoḅereghinaan bọ ịraar phọ ạrighiri phọ ọdi, kụ Ọmoogh-we phọ ạḅile aḍighi ịdi ọdi ạḅile ạmoogh ẹelha kụ ạḅile ạngo nyọdi ịyal ọdo ẹelha phọ ẹpe ọdi ạmoogh ghan bọ mem dị meten.

¹¹Oomo abumor phọ rꞌabumarani phọ rꞌabugbaany ạrighiri phọ aJob oru ghan ophogh ọdi rꞌole ẹyaal sịphe kꞌọdi. Bịdi ọseenyaan ghan nyọdi ọḅile ọodereghi nyọdi esi oomo ịiḅaghami phọ Ọmoogh-we phọ mạngo bọ nyọdi. Tọrotoro ọnyo ạbidi ạngo ghan nyọdi ikpoki ḅịle rꞌagulu dị oḍighinom gol.

¹²Kụ Ọmoogh-we phọ ạseph ruukuna phọ aJob apuemi ịpe ọdi ạseph bọ emiighom mọ. AJob ạmoogh ḍioph rꞌinya ọonir iyool-ịga, odiiny ọonir ạsikamel, ịyal ọonir ạsinam, ḅịle rꞌoniin ọonir ịnam adool.

¹³Ọdi aḍighi ọde oḍual alephiri ạnmuny rꞌịraar ạnmanyaan.

¹⁴Ọdi aghol ọkpanyan phọ mọ aJemima, ọpo atum bọ ọdi aghol mọ aKezaya, ḅịle ọkar ọbam mọ ọdi aghol mọ aKeren Hapuk.

¹⁵Ạbunon ạnmariir ụ́tol sịen oomo aḅirini phọ dị ọnighe ịdipho ạnmanyaan phọ aJob. Ọde phọ ạbidi adi ni erua ạngo aani bịdi ịdipho ọdi ạngo bọ bumor alephiri phọ ạbidi.

¹⁶Ịphen phọ reten kụ aJob ạḅile ạrol oniin okuron rꞌinyadi ạsia, tụtu ọdi ạmiin nmụny oko rꞌạnmuny ạnmuny-oko ọdi.

¹⁷Kụ ọdi agbi nụun omugh mem dị ọdi mạkpo iboom.