Read abua Job 5 Bible Online

Job 5 - abua bible

Job 5

¹Oye odi ni dị kạloghonaan nyịna ḍịghaagh ḍụghum? Mạgh aphogh, Job, mọ ọokpaany kꞌẸnaan kamegheron ni.

²Eḍighi ni elologhi iboom ọoḅaghami aloor ạna oghire ghan tụtu nạ amugh.

³Mị mạmiin ghan ni rolologhi dị ẹghi mụdi ịyaar rẹ́eḅaghami kụ ọlo mị uronyon ni iloghi aruutu phọ ạbidi.

⁴Ạnmuny phọ ạbidi kótue ọmoogh dọl ẹereegh; oye ólho dị kạmeera ạgbaanaan bịdi otu iilogh.

⁵Awe lọ ọkoony rasiph kụ kole riiḍien lọ uwo elologhi aḅeph — ghạlamo ịizupha lọ esi igbo iitoor — kụ awe ẹephua ạmuum kogbeghe ni ẹelha phọ ọdi.

⁶Ịkaraph rési ghan ude kemite; ḅịle kẹn, ịiḅaghami rési ghan sịen ade phọ kemite.

⁷Eeye, ọkar agey. Oye kụ rạsighe ghan ịiḅaghami kạngo loor ọdi, ọkar ịdipho ạnian rẹkpataan ghan bọ kemite loor ạnian.

⁸Mụghumo mị kụ ạna, mị mukiton ạghi esi Ẹnaan kụ ạḅogh ḍighiton phọ ạngo nyọdi.

⁹Yira kótue ọnaghanan igbogh ạraraar phọ dị raḍighi ghan bọ, kụ ịiḍaany phọ ọdi eekuna ílho.

¹⁰Ọdi kụ rạngo ghan ọlophia de phọ; ḅịle kẹn, ọdi kụ raadu ghan mụum iizo phọ.

¹¹Ii, Ẹnaan kụ repoophe ghan bụphe osooromi bọ loor, ẹḅile rẹngo ghan iboh oomo ạbuphe odi bọ ọto.

¹²Ọdi kụ rakpor ghan kazu igbiighi awe areekeleghian, kạḅile ạsighe igbiighi awe olegheri ịyaar asiphom bịdi bịn ịyaar ílho dị bịdi oḍighi kụ kẹnighe;

¹⁴ghạlamo amem ootaany bịdi rooba ni esi ufiri.

¹⁵Kụ ọlo, Ẹnaan rẹpel ghan rukulom mọ esi aḍuugh; ọdi rạpel ghan bụphe ịyaar ụ́moogh bọ mem lọ awe rọgbiphoghom bịdi.

¹⁶Ọdi rạngo ghan oḍuom ologhi rukulom mọ kạḅile akpomori rụnhu ạbukaraph awe.

¹⁷Ọḅaal ologhi odianaan oye dị Ẹnaan kụ eelemi. Kákire mem lọ ọdi rạḅaam nyịna.

¹⁸Ẹnaan reekonom ghan ni rẹlem lọ ọdi ạloghoḍi; ạḍighaagh phọ ọdi kụ kẹlogh ẹlem mọ kụ ạḍighaagh phọ ọdi kụ keekonom ni.

¹⁹Amem etum mem ọdi kạphel li nyịna esi ịkaraph.

²⁰Mem lọ ịgbakuro eru, ọdi kámeera nạ amugh; ḅịle kẹn, mem ẹgham ọdi kạgbalagham ni nyịna esi aḍuugh.

²¹Ẹnaan kẹtagharan ni nyịna ẹsighe esi iḅoroghom; ọdi kạphel li nyịna mem lọ ịiḅaghami eru oogulemi ạna.

²²Nạ kạmilogh ni ọkoony rꞌạraagham; ḅịle kẹn, nạ kákiilaan ilhom ịnam.

²³Iizo lọ nạ aḅeph ạrana kẹ́tol; ilhom ịnam nyịna kézuom.

²⁴Kụ nạ ạtol rꞌẹepho sịphe ogbogo phọ ạna; mem dị nạ aphogh iyool-ịga phọ ạna, nạ kạmiin ni mọ ịyaar ị́ḅogh bịdi.

²⁵Nạ kạmoogh ịbadi ạnmuny dị koḍiza ịdipho ạroogho lọ asi.

²⁶Ịdipho ịbiakpa rẹtol ghan bọ kẹḅaal kụ ogbi nụun ọku, ịpe kụ ịdi nạ kạtol ạkpo agey.

²⁷Job, yoor mọtuugha ni iboom kụ ogbi bọ olegheri ịphen phọ. Ọkpe ólho, kụ iḍighi kụ sịghe ni.