Read abua Job 6 Bible Online

Job 6 - abua bible

Job 6

¹Eḍighi ịyaar dị ọsighe ịiḅaghami phọ rꞌọto phọ ạmi kụ ọtooghi,

³kẹemor epu ịisaar ọgbal ọphiiny phọ, kụ iḍighi kụ ịgbagara ikpo ọnhu phọ ạmi kíḍighi iikia esi anyina.

⁴Ẹnaan Oomo Ịikpo phọ mạsighe ịkpina ụraph ịmi, kụ ika phọ ạbidi melheeny loor ạmi. Ẹnaan mẹkoolomi rạraar aruugu usomoriom ịmi.

⁵Ẹnam adool kụ ẹraal rọogho bịn mẹgbaanyan ni nyọdi. Ḅịle kẹn ạnam raḅoorian ghan ni mem lọ rạtaal tụgharaghar ạroogho.

⁶Kụ ọlo ạnhian kụ katue ale eḍien dị ị́dugh, boph ụ́logh? Eeghe ạḍidugh kụ edi ghan sịphe ẹphalaḅaal phọ edi ghan bọ eghelhe ạkenegh?

⁷Mị ụ́moogh ẹephua olhe ẹdo eḍien phọ ẹpe kụ tọrotoro ịyaar lọ mị ale retu ghan ozu.

⁸Eeghe kụ iḍighi kụ Ẹnaan ịmi ị́ngo bọ ịlo mị ạlom? Eeghe kụ iḍighi kụ ọdi ịiḅereghi phọ ạmi ọ́phagharanaan bọ?

⁹Mụghumo ọdi kameera ni ughiigh ịmi,

¹⁰mụghumo mị ulegheri ni mọ ọdi kaḍighi ni, mị mupeleghu ni esi iboh. Mị múpogh ịphen repin bọ loor phọ ạmi. Mị alegheri ni mọ Ẹnaan phọ oye aruukuan. Mị kọ̋gbagharan ghan ịlo ọdi ạto.

¹¹Edi ẹghen ịnyaam dị mịna ạmoogh ọrol ghan nịiniin eye? Eeghe kụ iḍighi kụ mị odi ghan bọ ni rapooghu mem dị mị ụ́moogh oḍuom ologhi.

¹²Mịna aḍighiigh ḍụghum? Aloor phọ ạmina enaba ḍụghum?

¹³Ịnyaam ịmi ílho mun ọphelom aloor ạmi; esi ílho dị mị kạki kụ ạmoogh ọloghonaan ạḍighaagh.

¹⁴Mem ịiḅaghami dị ẹrol ịduon mị ạkpe ọmoogh igey ạrighiri — mụghumo mị mạḅitonaan Ẹnaan Oomo Ịikpo mụghumo mị ụ́ḅitonaan.

¹⁵Kụ ọlo nyina phọ, ạrighiri phọ ạmi, nyina riikeleghi ghan ịmi ịdipho asikol ạmuum dị rẹkaraghar ghan mem lọ ọlophia ụ́loph.

¹⁶Ibikpo meekpereghiom sikol phọ,

¹⁷kụ ọlo, ẹghologhol reru, bịdi mephe, bịn ude asikol phọ mẹgharaghar.

¹⁸Aḍita awe erelhe rope ghan ni loor esi ọwa ạmuum; bịdi royeela ghan ni bịn tụtu komuughu ẹpe ade ophugh phọ.

¹⁹Aḍita awe erelhe dị ọḍua ẹpe Siba rꞌạTema rọwa ghan ni,

²⁰kụ ọlo oḍuom ologhi phọ ạbidi ramuneen ghan ọgbal asikol phọ.

²¹Nyina ẹkigh sikol phọ ịpe phọ esi ạmi, nyina ẹmiin dọl phọ ạmi kụ eḍuragh eḅula ọman esi oghiilaan.

²²Mịna ụlhom ḍịen ni inyina ịyaar, ọbo ọbo ụḅeni ni inyina mọ ikol ẹmhu ạmi eti-ọman oye,

²³ọbo ọbo ọphel ạmi ḍịghaagh ẹpomoghian?

²⁴Ẹnighe ni-a; ịtughemi ịmi ịḅeni ịmi ọpioman phọ ạmi. Mị kaḅoorian ịnaghanan inyina.

²⁵Igey ikpo ọnhu rekiton ghan ni ologhi oye, kụ ọlo ọghaaph phọ anyina ọ́moogh ịyaar oḍighinom.

²⁶Oḍuom ologhi ạmi maphe. Nyina rẹetughian ghan mọ ọghaaph phọ ạmi aḍighi ookuugh bịn; kụ eeghe kụ iḍighi kụ nyina rẹpagharanaan ghan bọ?

²⁷Nyina kẹsighe bụnyigo ạnmuny dị oḍighi rẹbene bịn epeghom abili? Nyina ketue ni ẹsighe ọkaraghi ẹmhu-ọyaghiri anyina bịn ẹwaam ikpoki?

²⁸Ịkaraghi ephogh risigh ạmi. Mị kạ́gba ọkpe.

²⁹Nyina mẹghi ni ịdi mẹkasian. Kẹ́ki mun ekeeny ịiruen. Késoph mun ọoruen epume. Mị odi ni elhiom.

³⁰Kụ ọlo nyina rẹetughian ghan mọ mị rakue ni — nyina rẹetughian ghan mọ mị úlegheri igey rꞌịkaraph.