Read abua Job 7 Bible Online

Job 7 - abua bible

Job 7

¹Aghuḍum oye ạkigh oye dị ọkpaariom mọ ạghi ẹgham, ạkigh ghuḍum dị odimom oḍighi ạḍighaagh dị ạkpar,

²ạkigh ẹbene dị ramoghi ghan esi uba oḍigh aani; ạkigh oye oḍighi dị rakori ghan ruunmo ọdi.

³Ụnwanyu atum ụnwanyu mị ụ́moogh ịyaar ọrolom; aḍughul etum ḍughul rịngo ghan ịmi ọto.

⁴Mem lọ mị ạmina ọnaani, amem mọ rediina ghan ni; mị rakironaan ghan oomo phọ aḍughul phọ kamoghi mọ ẹnuun ẹḅaal.

⁵Ạsileegbem kụ imuza loor phọ ạmi; ipholopol kụ imuza loor phọ ạmi; aruuny kụ ramite ghan rọko ạmi.

⁶Asiḍughul-otu phọ ạmi reten ghan bịn dị oḍuom ologhi úlho, eegborion oten epu ogbororiom oloom arukpe.

⁷Tụutughian ni, Ẹnaan, aghuḍum mọ ạmi aḍighi ookuugh bịn; ọḅaal ologhi phọ ạmi masi ni eekuna.

⁸Nyina rịmiin ni ịmi nyịidipho, kụ ọlo nyịna ịmi kị́miin mun. Eḍighi ịyaar lọ nyina ịwa ịmi, mị maten.

⁹Ịdipho ọotu rạagbenyenu ghan bọ kạḍua, oye ramugh ghan bịn rátigheel ghan mun; oomo awe lọ olegheri ghan nyọdi mowula nyọdi.

¹¹Eeye, mị kátue aḅoorian. Eghiḍim rꞌọghagh ologhi odi ni esi ạmi. Mị kạkaaph ni.

¹²Eeghe kụ iḍighi kụ nyina rigonogha bọ ịmi? Nyina regbiom ghan mọ mịna anonom ọphiiny ḍụghum?

¹³Mị ạmina ạwa ọnaani; mị ạwa ophooghian esi eephina phọ ạmi.

¹⁴Kụ ọlo nyina — nyina rịdeghoghom ịmi rạmalha; nyina rịngo ghan ịmi ịkaraph ạramalha,

¹⁵tụtu ẹnighe ghụn dị kọpur orum ạmi okiigh kpạripe rꞌọrolom aloor ịminimiin phọ aḍien.

¹⁶Mị kátue mun. Mịpher ịmi ọrol phọ. Ịwile ịmi. Aghuḍum ạmi ọ́moogh ịyaar oḍighinom.

¹⁷Eeghia kụ iḍighi kụ oye ạman bọ ịduon ịyaar esi ạna? Eeghia kụ iḍighi kụ nạ rapogh ghan bọ ịlo ọdi aḍighi?

¹⁸Nạ rapogh ghan nyọdi kakitonom tọrotoro ạḍiroor kạdegh nyọdi aphogh tọrotoro amem.

¹⁹Nạ kápogh ẹnon ekpisi tụtu ebia pịdi mị atue ạmin aani ịghor?

²⁰Ịkaraph phọ ạmi eḍighi ni nyịna ịyaar ḍụghum, nạ okoriom otu ikoli? Eeghe kụ iḍighi kụ nạ ụsighe bọ ịmi rạtuughaam dạph? Mịna aḍighi ni igbogh ịiḅaghami ạngo nyịna ḍụghum?

²¹Nạ kátue ạsar ạbilenaan ịkaraph ạmi? Nạ kátue ạbilenaan ịkaraph lọ mị aḍighi? Kébia mị kaḍigh oḍi phọ ạmi bịn mị maten mem dị nyina kịwa ịmi.