Read abua Ạsuor 102 Bible Online

Ạsuor 102 - abua bible

Ạsuor 102

¹Nạghan ịiḅereghi ạmi, Ọmoogh-we, ạḅile ạnaghan ịlom ọloghonaan ạḍighaagh phọ ạmi.

²Mem dị mị odi esi ịiḅaghami, kákiton risigh ạna esi ạmi apogh ẹnon ekpisi; ụnaghanan ịmi elhom mem lọ mị ạmagh.

³Aghuḍum ạmi ramuneen ịdipho ạmughi; aloor ạmi reemor mụdi ạnian.

⁴Mụuzeghi ịmi ọkiom ude ịdipho ạtugharaghar ạroogho; ẹephua eḍien mẹḍua loor ạmi.

⁵Mị rạkonan kamitiom; mị masugha ruzu rꞌịḅarara bịn.

⁶Mị mạghigh ẹnun eḍum dị edi de ịisaar, mụdi eekughum dị ọwile mọ ephe esi otu dị ameleghu.

⁷Mị ạmina bịn mị ụ́naani; mị odi ịdipho ẹnun dị ogina ọdi kụ ạlhel ạnyu otu.

⁸Oomo aḍio phọ ạbumulogh-ḍien ụsinoghom ghan ịmi ịghor; bụphe rụnmoghoghoom bọ ịmi ọsighe ḍien ạmi kụ rotonyonom ghan we.

⁹Loor ophin ologhi rꞌọghagh ologhi phọ ạna, ọoru kụ eḍien ạmi, ḅịle izin kụ amiim ạmi. Nạ ụkpaph ịmi aphoophe kụ aroph.

¹¹Aghuḍum ạmi ạkigh oogho adulhe; mị ạkigh tụgharaghar ạroogho.

¹²Kụ nạ, Ọmoogh-we, kụ ọdaam kꞌagee-pọ; oghiil atum oghiil, oomo awe kọotughian ni nyịna.

¹³Nạ kaḅetenu kụ ạnma ighirigiir Zạyon; amem mẹteeny ọnma ighirigiir nyọdi; phọn kụ amem dị eeleeny.

¹⁴Abutelhedom ạna ọpomoghian nyọdi, ghạlamo ịduon mophiemi bọ ni nyọdi; bịdi rọnma ni nyọdi ighirigiir ghạlamo ịduon ọdi maagulaan bọ ni.

¹⁵Areelhe phọ kekiilaan ni Ọmoogh-we phọ; oomo ạbudaam ịsien ade phọ kokiilaan ni ịikpo phọ ọdi.

¹⁶Mem dị Ọmoogh-we phọ ạḅile aselemi Zạyon, ọdi kagananami ni igbogh phọ ọdi.

¹⁷Ọdi kạnaghanan ni we phọ ọdi oghel bọ kụ aler rụru ịiḅereghi ạbidi.

¹⁸Gẹ ịpe Ọmoogh-we phọ maḍighi bọ aseenaan oghiil dị ratu, ẹrol dị awe dị kọ̋mar oboom nyọdi.

¹⁹Ọmoogh-we phọ ạrol sịphe ạdol iigbia phọ ọdi. Kꞌẹpe ạnyu ạke kụ ẹdi ọdi aphogh ude.

²⁰Ọdi ạnaghan ịkuph awe ikoli kụ aseere ẹereegh bụphe osophonaan bọ mọ ọze phọ.

²¹Loor esi ịduon phọ ḍien phọ ọdi kogbeelom ni ẹpe Zạyon ḅịle koboom ni nyọdi ẹpe Jeruselem

²²mem dị areelhe rꞌạramar ookpomoghan kụ ooseeny Ọmoogh-we phọ.

²³Ọmoogh-we phọ mudughe ịmi mem dị mị odi ugheel; ọdi makpere ghuḍum ạmi.

²⁴Ẹnaan, kụ́sighe ịmi ạ́ḍuanam kụ mị agbi ọkpo. Ọmoogh-we, nạ kạtol kꞌagee-pọ.

²⁵Mem dị eten dị mebia, nạ kụ ụlhem bọ de phọ kụ ạsighe rạghaagh phọ ạna kụ ạlemom kẹ phọ.

²⁶Oomo phọ ạbidi kope ni ọmadan, kụ nạ kạtol li. Bịdi kokitonu ni ịdipho igbaany arukpe. Nạ kakiton bịdi ịdipho iinmenan kụ ạḅitonaan bịdi.

²⁷Kụ ọlo, nạ kạtol li bịn, nạ káḍighi ogbaany.

²⁸Ạnmuny ayira kọtol rꞌẹepho, kụ esi ịbooghian phọ ạna ẹemara ẹemara ạbidi kọmaar ri ọtol.