Read abua Ạsuor 104 Bible Online

Ạsuor 104 - abua bible

Ạsuor 104

¹Boom Ọmoogh-we phọ, nạ uwaloor phọ ạmi! Ọmoogh-we, Ẹnaan ạmi, pọ eeghe ịdi nạ ạbugh. Oonmenemiom nyịna igbogh rꞌeghuan.

²Nạ akpereghiom loor ạna ḍịḅaal. Nạ mạatarion kẹ phọ ịdipho otu ịmaam.

³Kụ ạlogh otu ạna ạnyu ạrumuum mọ. Nạ ạsighe ọotu phọ kụ aḍighi oghuugh erelhe ạna kụ rạpeeph ghan loor araphaaph ookuugh.

⁴Nạ ạsighe ookuugh phọ kụ atene butelhedom ạna, ọmeephian okuaḍio kụ atene nmụny oḍighi ạna.

⁵Nạ maphighi de phọ ạkparami dọl ọdi kụ kótue opoophe.

⁶Nạ aseere otu-ḅualhe ạnyu ade dịadi ogbogh ạsuoma, kụ ạmuum mọ aakpereghiom ruugum.

⁷Mem dị nạ ạḅaam rụmuum mọ, bịdi ọḍuaghu; bịdi okiil kụ osuma mem dị ọnaghan ḍịolho ịto phọ ạna.

⁸Bịdi okil ạnyu aruugum kụ osoroghu riḍiiny, osi esi phọ nạ aseenaan bọ bịdi.

⁹Nạ amitiom ọku dị bịdi kọ́ḅeeny, ọbo kọḅile ghan bọ ookpereghiom de phọ.

¹⁰Nạ aḍighi ịdi arikiilia ạmuum ekil esoor riḍiiny, kụ ạriphiiny eteneghu igbo aroogbolom.

¹¹Bịdi emitiom mụum dị ịnam eḍum rẹpughol. Ịsiphe kụ ẹdi ịnam adool elegheḍum ẹphoomi ẹephua ạmuum ạbidi.

¹²Loor ireeny dị etuman kụ ẹdi ịnun ẹzaaghi ruutu ạbidi kụ ẹmoor ghan.

¹³Ịsiphe okuaḍio phọ kụ ẹdi nạ amitiom ọlophia dị aakuom ạnyu aroogbolom, kụ ạḍiseph ạna emuza de phọ.

¹⁴Nạ amitiom rọogho mọ ạsinam ẹraal ghan rꞌịizupha awe sịen ade phọ dị rẹngo eḍien,

¹⁵kụ aḍighi miim mụo ọḅaalami ologhi ạbidi, mụnum-ọliv ọbo aghisigh ạbidi ạmaar ạḅaal, ḅịle rꞌạbred ọlo ọngo ạbidi ịnyaam.

¹⁶Ạrasaga phọ ạLebanon ịmoogh ni ọlophia dị ạmanam — ireeny dị Ọmoogh-we phọ ạzuph, ireeny ịlo ọdi.

¹⁷Ịsiphe kụ ẹdi ịnun ẹzaaghi ruutu ạbidi kụ ịgbaghaghaany ẹloghoḍi ruutu pạ ịla ireeny obool.

¹⁸Ạrutu-ịga dị otu íḍigh ịsiiny ạnyu ẹrol ghan ịigaany aruugum mọ ḅịle ịbam ịnam ẹbooghian ude etughogh igbo asighiigh phọ.

¹⁹Nạ ạlem ụnwanyu okuaḍio phọ ẹrol dị otue ghan ogbi ọnhu ariiḍio; ụnwanyu atum ụnwanyu, erumuḍio phọ elegheri mem omeel ighool.

²⁰Nạ ạlhem ḍughul, kụ amem ufiri phọ kụ ẹdi oomo ịnam eḍum mọ remiteghu ghan.

²¹Ugheel ạnam-dịka phọ emoogha mem ọtaya ịnon ịnam, kụ ephogh Ẹnaan ịlo amalhe ạbidi.

²²Mem lọ erumuḍio phọ emite, bịdi eḍiku riisi ạdol ạbidi bịn ẹmina eḅoorian.

²³Phọn kụ amem dị awe kọkiighi iiḍighi ạbidi, kụ oḍighi oḍighi kꞌadulhe.

²⁴Ọmoogh-we, nạ mạlhem ịbadibadi ạraraar. Rꞌolegheri ịyaar kụ ẹdi nạ ạlemom oomo phọ ịne. Ọlem mọ ạna bịn kụ amuza de phọ.

²⁵Ọphiiny ạbazi odi ni, ạbugh kụ ạtegh, esi dị ạraraar dị kótue ogbi erughogh, igbogh rꞌịbam.

²⁶Arughuugh ẹki riḅula rẹzoghi yogh ạnyu ạmuum mọ, kụ ẹmaany, eboom ẹnam ọphiiny phọ nạ ạlhem bọ, repegh ghan ni pạ ọphiiny phọ.

²⁷Oomo phọ ạbidi oḍuom nyịna ologhi ọngo ạbidi eḍien mem lọ bịdi rọwa.

²⁸Nạ ạngo bịdi kụ bịdi ole; nạ amitiom eḍien kụ ẹgbaanyan bịdi.

²⁹Mem lọ nạ ạgbole risigh ạna, eegu eḍigh mem lọ nạ ạsighe ḍiphooghu ạbidi, bịdi omuughu kụ aruzu phọ eḅula kꞌọphugh phọ ọsighe bọ kụ ọlhemom bịdi.

³⁰Kụ ọlo, mem lọ nạ ạngo bịdi ḍiphooghu, bịn mọlhem bịdi; nạ ạngo kumoom aghuḍum de phọ.

³¹Eegu Ọmoogh-we phọ ẹrol kꞌagee-pọ! Ọmoogh-we phọ ạmoogh ọḅaal ologhi esi ịpe ọdi maḍighi bọ.

³²Ọdi aphogh de phọ kụ ade phọ ephiigha; ọdi ạḅogh rạaḅaraph phọ, kụ emitiom mụghi.

³³Mị kạmooraan ni Ọmoogh-we phọ sụor oomo aghuḍum mọ ạmi; oomo ariiḍio ạmi mị kạmoor sụor oboomiom Ẹnaan ạmi.

³⁴Ạḍuor ạmi ẹḅeeraan ni nyọdi, loor esi dị ọḅaal ologhi ạmi ạḍua loor ọdi kụ atu!

³⁵Ọbo eḍighi ịdi koogulemi buḍighinom ịkaraph sịen ade phọ, awe ạsipioghom kụ́tol mun! Boom Ọmoogh-we phọ, nạ uwaloor phọ ạmi! Boom Ọmoogh-we phọ!