Read abua Ạsuor 106 Bible Online

Ạsuor 106 - abua bible

Ạsuor 106

¹Iboom Ọmoogh-we phọ! Ịngo ḍịseph Ọmoogh-we phọ, ịdi eḍighi bọ ọdi ạnighe ni; ẹphomoghian phọ ọdi edi ghan bịn oomo amem.

²Ạnhian kụ katue agbi oomo iboom ạraraar phọ ọdi maḍighi bọ; ạnhian kụ katue ạseph nyọdi ịdi kẹkasian?

³Ọḅaal ologhi kụ odianaan bụphe ọnaghanan bọ ịto phọ ọdi, bụphe oomo amem roḍighi ghan bọ ịlo ẹnighe.

⁴Ụutughian ịmi, Ọmoogh-we, mem dị nạ raanmoom we phọ ạna, ụloghom ịmi mem dị nạ ạtagharan bịdi.

⁵Mị ụmiin aani edughom awe eelhe phọ ạna, uḍighan bụphe oḍighi bọ bụo ạna ụmoogh aani ọḅaal ologhi.

⁶Yoor moḍighi ịkaraph ịdipho ạburude ạburude phọ ayoor; yoor mọpioman ọḅile oḍighi ịpe ị́nighe bọ.

⁷Ạburude ạburude phọ ayoor ẹpe Ijipt ụ́naghanan ịiḍaany phọ Ẹnaan eḍighi yogh bọ; bịdi uwula ni ịdi ọdi aḍeenaan bịdi ẹphomoghian phọ ọdi ịbadi amem, kụ bịdi ọḅaar ẹmhu esi Ẹnaan Oomo Ịikpo sịphe Ọphiiny Igbilha phọ.

⁸Kụ ọlo, ọdi ạphel bịdi ịdipho ọdi aguanaan bọ ịlo oḍeenaan igbogh ịikpo phọ ọdi.

⁹Ọdi ạto ạḅeni Ọphiiny Igbilha phọ kụ ạmuum ạaya; ọdi arelhiom we ọdi ạḅeenyom ḍịgharaghar ade.

¹⁰Ọdi ạphel bịdi ḍịghaagh ạbuphe bịdi okia bọ; ọdi ạtagharan bịdi esi ạbumulogh-ḍien phọ ạbidi.

¹¹Kụ ạmuum ạminoghom bụmulogh-ḍien ạbidi, rꞌoniin ókpetenaan.

¹²Kụ awe ọdi omeeraam ruguanaan phọ ọdi kụ ọmoor oboom nyọdi.

¹³Kụ ọlo bịdi uugborion ni owula ịpe ọdi aḍighi bọ kụ oḍighi yogh rạraar dị úkori ọdi aromoghiom bịdi.

¹⁴Bịdi ụmoogh rụuphua eḍien sịphe ẹdala ọosaar phọ kụ ọdegh Ẹnaan phọ ophogh;

¹⁵kụ ọdi ạngo bịdi ịpe bịdi ọlom bọ kụ ạngoom ẹkaraph ẹzegh ogbo ạbidi.

¹⁶Sịphe ẹdala ịisaar phọ bịdi ọghagham ologhi Mozis, rꞌEeron oyil ạrikia phọ Ọmoogh-we phọ ạsaḅar bọ.

¹⁷Kụ ade phọ eruphaan kụ ẹmin Datan kụ eekpereghiom Abiram rꞌeghunotu phọ ọdi.

¹⁸Ạnian esoorom bụmatuan ạbidi kụ ẹsuughi we ẹkaraph eḍighinom ịyaar phọ.

¹⁹Bịdi ọsighe gol kụ ọlemom mọony aḍilephiri ạnam dị oseere sịphe Sainai kụ ooseeny ẹkaaneen ịyaar phọ ẹpe;

²⁰bịdi oonmenenom eegu phọ Ẹnaan rꞌạnam dị rẹtaal ghan rọogho.

²¹Bịdi owula Ẹnaan phọ ẹsighe bọ igbogh iiḍighi kụ ẹphelom bịdi ẹpe Ijipt.

²²Pọ eeghe ịiḍaany dị ọdi aḍighi ẹpe! Pọ eeghe ịikia ạraraar sịphe Ọphiiny Igbilha phọ!

²³Mem dị Ẹnaan ẹḅem mọ ọno kapiemi we ọno, aMozis otelhedom mọ ọdi ạsaḅar bọ ómeera mọ Ẹnaan ephiemi we phọ kụ asophoghom ophin ologhi phọ ọdi.

²⁴Kụ bịdi oghel ịma ade phọ Ẹnaan aguanaan bọ bịdi, loor esi dị bịdi úmeeraam nyọdi.

²⁵Bịdi ụrologhu iloghi arugbogo ạbidi kụ ọkunu ghan kụ Ọmoogh-we phọ ụ́naghanan.

²⁶Kụ iḍighi kụ ọdi ạphur bịdi rụru mọ ọno kaḍighi ịdi bịdi komugh ẹpe ẹdala ịisaar phọ,

²⁷ạḅile ạawalalami nmụny ạnmuny ạbidi bịdi omuughu sịphe iiruen areelhe phọ.

²⁸Kụ ẹpe Pior, awe Ẹnaan ọḅophan ooseeny Baal kụ olhe ẹkia dị ọphighiron ọngo ịkaaneen ạraraar dị ghuḍum ị́moogh.

²⁹Iiḍighi ạbidi ịghagh ni ologhi Ọmoogh-we phọ kụ ẹkaraph ẹzegh emite ogbo ạbidi.

³⁰Kụ ọlo, ạFinehas aḅetenu kụ ạliom bụphe ọmoogh bọ apum, kụ ẹkaraph ẹzegh phọ esophoghian.

³¹Mọotughian ni ịphen phọ ọsephom nyọdi kꞌaḍiodi kụ kẹtol ghan oomo amem dị retu.

³²Sịphe okol ạmuum aMeriba awe phọ oḍighi ịdi ephin ologhi Ọmoogh-we phọ, kụ aMozis ạrol esi ịiḅaghami loor ẹmhu ạbidi.

³³Bịdi oḍighi ịdi ephin ologhi ọdi kụ ịkaraph ikpo ọnhu ẹḍua ọnhu ọdi bịn emite.

³⁴Bịdi ụ́ze we aruru phọ, ịdipho Ọmoogh-we phọ ạto bọ mọ bịdi oḍighi phọ,

³⁵kụ oophinighan rꞌạbidi ọḅile ọdaphan reten awe phọ Ẹnaan úlegheri bọ.

³⁶Awe Ẹnaan ooseeny ịkaaghineen ạraraar, kụ ịphen kụ iḍighi ịyaar dị ophiemi bịdi.

³⁷Bịdi ọḅogh nmụny rꞌạnmanyaan ạbidi ọngo mọ oḍighinom rạraar aghuḍum aruru ẹpe Kenan.

³⁸Bịdi ọze nmụny phọ ạbuphe úlegheri aani bọ kụ ọphuenom de phọ.

³⁹Bịdi ọphuenaan siloor ạbidi rꞌeḍighinom ịyaar phọ ạbidi kụ úmeelom Ẹnaan phọ.

⁴⁰Kụ iḍighi kụ Ọmoogh-we phọ ạghagham ologhi we phọ ọdi; kụ ạḅitonaan bụphe ọdi ạloghomaam bọ.

⁴¹Ọdi ạḅitonaan bịdi ạwilenaan ịikpo awe aruru phọ, kụ ạbumulogh-ḍien ạbidi kụ ụḅile ọda bịdi.

⁴²Ạbumulogh-ḍien ạbidi ọgbiphoghom bịdi bịn eḍighi ịdi bịdi osoorom iboom ọngo bụmulogh-ḍien phọ.

⁴³Ịbadi amem Ọmoogh-we phọ ạtagharan ghan ni we phọ ọdi, kụ ọlo bịdi uphin ọḅaar ghan ẹmhu esi ọdi kụ olegheri kụ osuma esi ịkaraph.

⁴⁴Rꞌịduon phọ bịn Ọmoogh-we phọ ạnaghanan ni mem lọ bịdi omoghi omitiom, kụ ọdi akiririom aphogh ịminimiin phọ ạbidi.

⁴⁵Loor ẹmhu ạbidi ọdi ạatughian ịyo phọ ọdi, kụ esi eboom ẹphomoghian phọ ọdi, ọdi adughe rạraar.

⁴⁶Ọdi aḍighi ịdi oomo ạbuphe ọgbiphoghom bọ bịdi ọmoogh ọnma ighirigiir ạbidi.

⁴⁷Ụphel iyoor, Ọmoogh-we Ẹnaan ayoor, ạḅile ụsighe iyoor ạḍuanam sịphe aḍita areelhe phọ, ọbo yoor ọngo ḍịseph kụ oboom ḍien iigbia phọ ạna.

⁴⁸Iboom Ọmoogh-we phọ, Ẹnaan phọ Ịzirel. Iboom nyọdi nyịidipho kụ kꞌagee-pọ; tọrobo oye ạḅem mọ, “Ẹrol li ịdipho!” Iboom Ọmoogh-we phọ!