Read abua Ạsuor 107 Bible Online

Ạsuor 107 - abua bible

Ạsuor 107

¹“Ịngo ḍịseph Ọmoogh-we phọ, loor esi dị ọdi ạnighe ni; ẹphomoghian phọ ọdi rémuneen ghan.”

²Ịḅile ẹḅem ikpo ọnhu phọ ịphen ọsephom Ọmoogh-we phọ, oomo phọ anyina ọdi mạphel bọ. Ọdi mịtagharan inyina rạghaagh ạbumulogh-ḍien anyina,

³kụ mịsighe inyina atighelom iiruen ạramha, ẹḍua emitenom erumuḍio kụ esi emeelom, ẹḍua ephunom kụ esi esoorom.

⁴Buniin uyeela ẹpe ẹdala ịisaar phọ eten ị́tol bọ kụ útue ụ́miin ekpisi orelhe ọteeny ẹmha ọrol.

⁵Ọkoony asiph bịdi ḅịle ạmuum ạphu bịdi kụ oḍuom-ologhi ọ́rol mun.

⁶Kụ sịphe ịiḅaghami phọ kụ bịdi ọmagh Ọmoogh-we phọ kụ ọdi ạphel bịdi ạsighe esi ạḍikaraph ạdol phọ ạbidi.

⁷Ọdi arelhiom bịdi eten dị esel asiemi ẹmha dị bịdi kọtol.

⁸Ẹkpianaan bịdi ọseph Ọmoogh-we phọ esi ẹphomoghian phọ ọdi rémuneen ghan bọ, esi ạraraar ịiḍaany phọ ọdi aḍighinaan bọ bịdi.

⁹Ọdi ạpheremi mụum bụphe ạmuum ạphu bọ kụ ạngo egey eḍien bụphe ọkoony asiph bọ.

¹⁰Buniin ụrolom okiriri rꞌufiri, awe ikoli dị ọrolom rꞌizime,

¹¹loor esi dị bịdi mọḅaar ẹmhu esi ịto Ọkaraghi Egbogh Ẹnaan kụ moghel oromoghiom ọdi.

¹²Bịdi ominenom loor ọokpara oḍighi; bịdi omeel ude kụ oye ọpham ólho.

¹³Kụ sịphe ịiḅaghami phọ kụ bịdi ọmagh Ọmoogh-we phọ kụ ọdi ạphel bịdi ạsighe esi ạḍikaraph ạdol phọ ạbidi.

¹⁴Ọdi ạsighe bịdi amitiom sịphe ạdol okiriri phọ rꞌufiri phọ kụ aagbo izime phọ ikulha ikulha.

¹⁵Ẹkpianaan bịdi ọseph Ọmoogh-we phọ esi ẹphomoghian phọ ọdi rémuneen ghan bọ esi ạraraar ịiḍaany phọ ọdi aḍighinaan bọ bịdi.

¹⁶Ọdi ạphueghi rughuugh dị oḍighinom enaba kụ awunughi igbonoghiom arukuron.

¹⁷Buniin uḍighi ighiil awe dị rọmiinom loor ịkaraph ạbidi, ḅịle rꞌaloor ạsipioghom ạbidi.

¹⁸Bịdi ọmiin eḍien útue ghan bịn uten dị úle kụ esugha ẹnum bịn ọbo momuughu.

¹⁹Kụ sịphe ịiḅaghami phọ kụ bịdi ọmagh Ọmoogh-we phọ kụ ọdi ạphel bịdi ạsighe esi ạḍikaraph ạdol phọ ạbidi.

²⁰Ọdi aakonom bịdi rꞌịto phọ ọdi kụ ạphel bịdi ạsighe sịphe oḍi phọ.

²¹Ẹkpianaan bịdi ọseph Ọmoogh-we phọ esi ẹphomoghian phọ ọdi rémuneen ghan bọ esi ạraraar ịiḍaany phọ ọdi aḍighinaan bọ bịdi.

²²Ẹkpianaan bịdi ọphinyon ạrikia ọsephom ọdi, ḅịle rꞌọmooraan nyọdi sụor iboh ọḅeniom oomo phọ ịpe ọdi maḍighi bọ.

²³Buniin ụzoghi ọḅeeny otu-ḅualhe ologhi ạrunwunyaru, ọmoogh ghan ịyaar olhe sịphe ạriphiiny phọ.

²⁴Bịdi ọmiin rạraar dị Ọmoogh-we phọ aḍighi ghan, ịiḍaany ọdi sịphe ạriphiiny phọ.

²⁵Ọdi ạto, kụ ookia oghim amiigh kụ amitiom oologh.

²⁶Kụ aphoophe ghan rụnwunyaru phọ ạghiom kꞌạnyu kụ asumeeny kꞌude. Mem mọ ọpo phọ awe phọ ụ́moogh mun oḅio.

²⁷Bịdi okpetaan kụ ọbelebele mụdi awe dị amiim rakiigh — oomo ẹmaar phọ ephe.

²⁸Kụ sịphe ịiḅaghami phọ kụ bịdi ọmagh Ọmoogh-we phọ kụ ọdi ạphel bịdi ạsighe esi ạḍikaraph ạdol phọ ạbidi.

²⁹Ọdi ạphoomi oghim mọ, kụ ọphiiny phọ aḅoorian.

³⁰Iloghi ạbidi ẹḅaal ịdipho ọphiiny phọ aḅoorian bọ, kụ ọdi ạsighe bịdi asiemi rꞌẹepho esiḍia phọ bịdi ọwa bọ.

³¹Ẹkpianaan bịdi ọseph Ọmoogh-we phọ esi ẹphomoghian phọ ọdi rémuneen ghan bọ, esi ạraraar ịiḍaany phọ ọdi aḍighinaan bọ bịdi.

³²Ẹkpianaan bịdi ogbeelom igbogh phọ ọdi mem dị awe mookpomoghan kụ ọseph ọdi sịphe aḍita ikumoor awe phọ.

³³Ọmoogh-we phọ aḍighi ịdi ạriphiiny ẹgharaghar bịn kpel kpel kpel ạḅile akikima sikol ạmuum ọḅile okil.

³⁴Ọdi aḍighi ịdi ade ẹnuum eten ẹyaghaghaany ade rꞌaboph bịn loor esi ẹkaraph eḍighinom ịyaar ạbuphe ọrol bọ sịphe phọ.

³⁵Ọdi akiton de ịisaar atene roghoroghan ạmuum, kụ ạḍigharaghar ade eten sikol ạmuum dị rekilogh.

³⁶Ọdi aḍighi ịdi awe lọ ọkoony rasiph ọrol sịphe phọ bịdi omitiom ẹmha ẹlo orugh.

³⁷Bịdi oguphogh de phọ kụ ọzuphogh ireeny avain kụ obugha ibugha dị ẹbugh iboom.

³⁸Ọdi ạseph we phọ ọdi kụ bịdi ọmaraghi ịbadi ạnmuny; ọdi ómeera aḍita ạsinam ạbidi esoorom.

³⁹Mem dị ạbunon kụ ọkpar opu kụ oofolomi we phọ Ẹnaan reten ọgbiphoghom rꞌọmiine,

⁴⁰ọdi aḍeenaan ḍikia esi ạbuphe rọgbiphoghom bọ bịdi kụ aḍighi ịdi bịdi oyeela de ịisaar dị eten ị́tol.

⁴¹Kụ ọdi ạatoghion ni weye ẹkparam mọ ạsighe esi ạdol phọ ạbidi, kụ aḍighi ịdi arughunotu phọ ạbidi eḍiza ịdipho aḍita ịga.

⁴²Awe aruukuan phọ ọmiin ịphen phọ kụ iloghi ẹḅaal, kụ ọlo oomo ạbuo ẹkaraph eḍighinom ịyaar phọ ịnhu ekpomoghan yogh.

⁴³Eḍighi ni ịdi bụlo ọsu ologhi kọotughian rạraar phọ ịphen! Bịdi ọotughian ni ịlo ẹphomoghian Ọmoogh-we phọ rémuneen ghan bọ!