Read abua Ạsuor 115 Bible Online

Ạsuor 115 - abua bible

Ạsuor 115

¹Esi ạna bịn, Ọmoogh-we, esi ạna bịn, káyoor, kụ ẹdi kọngo ghan eegu loor esi ẹphomoghian phọ ạna rémuneen ghan bọ ḅịle rꞌébi ghan oguan.

²Esi ika kụ areelhe phọ upuru bọ iyoor mọ, “Ẹnaan phọ anyina edi ẹghen?”

³Ẹnaan ayoor edi kꞌạke; ọdi raḍighi ghan ịlo ẹḅeeraan nyọdi.

⁴Ạranaan ạbidi oḍighinom silva rꞌagol, ạraghaagh oye kụ ịka.

⁵Bịdi ẹmoogh rụnhu, kụ kétue ẹḅa, rꞌariḍien, kụ kétue ẹmiin eten.

⁶Bịdi ẹmoogh reḅeri, kụ kétue ẹnaghan, rꞌizon, kụ kétue epura eḍu.

⁷Bịdi ẹmoogh rạghaagh, kụ kétue ẹḅogh, rꞌaruwol, kụ kétue etelhe; bịdi ị́moogh ẹḍogh.

⁸Oomo ạbuphe ọkaaghi bọ ọḅile rooseeny ghan rạraar phọ ịphen kọkighogh ni rạraar phọ bịdi ọka bọ!

⁹Ịkpasaghi emooph anyina esi Ọmoogh-we phọ, nyina awe phọ Ịzirel. Ọdi rịphel ghan inyina kạḅile iikpereghi inyina.

¹⁰Ịkpasaghi emooph anyina esi Ọmoogh-we phọ, nyina ariil ạrikia phọ Ẹnaan. Ọdi rịphel ghan inyina kạḅile iikpereghi inyina.

¹¹Ịkpasaghi emooph anyina esi Ọmoogh-we phọ, oomo anyina ạbuphe rooseeny bọ nyọdi. Ọdi rịphel ghan inyina kạḅile iikpereghi inyina.

¹²Ọmoogh-we phọ rụutughian ghan iyira ḅịle kụseph ni iyira; ọdi kạseph we phọ Ịzirel rꞌoomo ariil ạrikia phọ Ẹnaan.

¹³Ọdi kạseph tọrobo oye lọ aghueni nyọdi, mꞌọbam mꞌogbogh.

¹⁴Ọmoogh-we phọ aḍighi ni ịdi nyina kẹmoogh ẹnighenom — nyina rꞌạnmuny anyina!

¹⁵Ịmoogh ḍịseph esi Ọmoogh-we phọ, ọpo ạlhem bọ kẹ phọ rꞌade phọ!

¹⁶Ạke phọ ọlo Ọmoogh-we phọ bịn, kụ ọlo, ọdi ạngo de phọ oye.

¹⁷Bụlo momuughu róboom ghan Ọmoogh-we phọ. Bịdi mogheel ọmar iḍim oḅoorian nam.

¹⁸Kụ ọlo, yira ạbuphe odi bọ kọngo nyọdi ḍịseph nyịidipho ḅịle kꞌagee-pọ. Iboom Ọmoogh-we phọ!