Read abua Ạsuor 135 Bible Online

Ạsuor 135 - abua bible

Ạsuor 135

¹Iboom Ọmoogh-we phọ! Iboom ḍien phọ ọdi, nyina abutelhedom Ọmoogh-we phọ,

²bụphe ọmeera bọ sịphe otu Ọmoogh-we phọ, sịphe Otu Ịiḅereghi Ẹnaan phọ ayira.

³Iboom Ọmoogh-we phọ, ịdi eḍighi bọ ọdi ạnighe ni; ịmoor sụor ẹsephom ḍien phọ ọdi, loor esi dị ọdi ạmoogh ọnma ighirigiir.

⁴Ọdi ạsaḅar Jẹkob oḍighi ọlo aloor ọdi, we phọ Ịzirel oḍighi ạbuo ọdi.

⁵Mị alegheri ni mọ Ọmoogh-we phọ ayira ạbugh ni iboom, ạbugh apu oomo ạrumugh.

⁶Ọdi raḍighi ghan tọrobo ịlo ẹḅeeraan nyọdi ẹpe kꞌạke phọ rꞌịsien ade phọ, sịphe ạriphiiny phọ rꞌude ạriphiiny phọ.

⁷Ọdi ạmagh oghim ọotu mọ ạḍua ruukuna ade phọ amite; ọdi aḍighi ịdi aḍio ẹmeephian kụ ẹdaphan oghim mọ, kụ ọdi ạsighe oghim sịphe osoph phọ ọdi osereghi ạraraar kụ amitiom.

⁸Ẹpe Ijipt ọdi ạze oomo ịkpana ạnmuny, nmụny awe rꞌạnmuny ịnam.

⁹Ịsiphe kụ ẹdi ọdi aḍighi ịiḍaany rꞌareḍeenaan ịlo ọlhiom ọdaam mọ rꞌoomo awe iiḍighi ạbidi.

¹⁰Ọdi aphiemi ịbadi areelhe kụ ạze rạalha dị ọmoogh ịikpo:

¹¹Sihon, ọdaam Ạmorait; Ọg, ọdaam ạBasan; rꞌoomo ạraalha ẹpe Kenan.

¹²Ọdi ạngo rere phọ ạbidi we phọ ọdi, rere phọ ạbidi we phọ Ịzirel.

¹³Ọmoogh-we, kogbeelom nyịna oomo amem mọ nạ Ẹnaan; oghiil atum oghiil kọotughian ni nyịna.

¹⁴Ọmoogh-we phọ kabianaan ni we phọ ọdi; ọdi kạnma ni ighirigiir butelhedom mọ ọdi.

¹⁵Ruru areelhe phọ oḍighinom silva rꞌagol; awe kụ ịkaaghi bịdi.

¹⁶Bịdi ọmoogh ịnhu kụ kétue ẹḅa; ḅịle rꞌariiḍien kụ kétue ẹ́miin.

¹⁷Bịdi ẹmoogh reḅeri kụ kétue ẹnaghan; ḅịle rꞌizon kụ kétue kẹn epooghu.

¹⁸Eḍighi ịdi oomo ạbuphe ọkaaghi bọ bịdi kụ ọkpasaghi emooph esi ạbidi kọkigh ịkaaghineen ạraraar phọ bịdi ọkaaghi bọ!

¹⁹Iboom Ọmoogh-we phọ, nyina awe Ịzirel; iboom nyọdi, nyina ariil ạrikia phọ Ẹnaan.

²⁰Iboom Ọmoogh-we phọ, nyina awe aLivait; iboom nyọdi, oomo anyina phọ rooseeny bọ nyọdi.

²¹Iboom Ọmoogh-we phọ ẹpe Zạyon, ẹpe Jeruselem, ẹmha phọ ọdi. Iboom Ọmoogh-we phọ!