Read abua Ạsuor 147 Bible Online

Ạsuor 147 - abua bible

Ạsuor 147

¹Iboom Ọmoogh-we phọ! Ẹnighe ni ọmoor ạsuor oboomiom Ẹnaan phọ ayira; ẹkpe ni, ḅịle kẹn, edugh ni oboom ọdi.

²Ọmoogh-we phọ mạḅile raḅulemi Jeruselem; ọdi raḅulemi yogh bụphe osumughu bọ.

³Ọdi raakonom ghan bụphe iloghi ẹphuughi bọ, kụ ạghoroghiom rukpe riisi dị ị́nighe yogh.

⁴Ọdi maseere ọnhu ạraanaan dị kẹtol kụ akol ẹenaan ẹenaan ḍien ḍien.

⁵Ogbogh dị ạmanam kụ Ọmoogh-we phọ ayira. Ologhi ọdi kótue ọtooghi.

⁶Ọdi rapoophe ghan bụlo osooromi loor, kụ kaler buḍighinom ịkaraph phọ kꞌude.

⁷Ịmoor sụor eboomiom Ọmoogh-we phọ; itiom ọne sụor ẹngo Ẹnaan phọ ayira.

⁸Ọdi aleenye ọotu oomo okuaḍio phọ; ọdi ạngo ọlophia de phọ kụ aḍighi ịdi ạroogho asi ạnyu aroogbolom mọ.

⁹Ọdi aḍighi ịdi ịnam ẹḅal ịḅal, kụ ạngo eḍien rịghiligho mem dị bịdi ẹlom.

¹⁰Ọdi ọ́moogh ḍịḅeeraan loor ịnam-ạsu dị ẹmoogh ịnyaam ḅịle rꞌaloor ịgbagara awe ẹgham.

¹¹Bụphe ọkpasi bọ emooph ạbidi esi ẹphomoghian phọ ọdi rémuneen ghan bọ kụ ạbudi ọdi ạmoogh ḍịḅeeraan.

¹²Boom Ọmoogh-we phọ, Jeruselem; boom Ẹnaan phọ ạna, Zạyon.

¹³Ọdi rakori ghan rụnhu-aḍibuo anyina rꞌịikpo ọdi rạseph ghan we anyina.

¹⁴Ọdi rakori ghan rụuku phọ anyina kụ kịpheremiom inyina igey ịbiakpa.

¹⁵Ọdi ạto ịyaar ạngo de phọ, kụ ịpe ọdi ạto ọnuun ni oḍighi.

¹⁶Ọdi ạde oopha ẹephoom mụdi ukpe ẹmina, kụ ạawalami ibikpo mụdi ophugh.

¹⁷Ọdi rạkimom ghan iiḅoghoḍi ibikpo ịdipho ilhom ịisaar; rꞌoniin oye kátue ạkparam osipheeny dị ọdi amitiom.

¹⁸Kụ ọdi rạto ghan ạngo kụ ibikpo phọ ẹgbenyenu; ọdi atom ookuugh, kụ ạmuum akil.

¹⁹Ọdi atom dom ọdi we ọdi, ạngo ịtooghi rꞌiilogh ọdi we Ịzirel.

²⁰Ọdi kőḍighinaan ịphen phọ ịnon areelhe; bịdi úlegheri iilogh ọdi. Iboom Ọmoogh-we phọ!