Read abua Ạsuor 16 Bible Online

Ạsuor 16 - abua bible

Ạsuor 16

¹Ẹnaan, ụphel ịmi, mị aḍigh ḍibuo ạna.

²Mị ạḅeni Ọmoogh-we phọ mọ, “Nạ kụ Ẹnaan ạmi. Nạ múlho bọ ọbo igey ịmi mị́teeny.”

³Bụo igey ạroozo ịsien aḅirini phọ kụ awe Ẹnaan. Bịdi ọḅaalami ghan ni ologhi ạmi.

⁴Bụphe oghiil bọ ọghi esi ịnon ạrumugh rọsighe ghan ịbadibadi ịiḅaghami koruom siloor ạbidi. Mị káḍighan bịdi ọphinyon ạrikia phọ ạbidi. Mị kạ́aḅereghi ruru phọ ạbidi.

⁵Nạ, Ọmoogh-we, kụ abin erua dị mị alhe. Nạ kụ oomo ịdi mị ạmoogh. Ịpe idianaan bọ ịmi risigh edi rạghaagh ạna.

⁶Ạdol phọ nạ useenaan bọ ịmi ẹnighe ni agey; pọ eeghe ịma ạdol.

⁷Ọmoogh-we, mị rạseph ghan ni nyịna ọpo urorori ghan bọ ịmi. Ḍughul aḍughul, ịitughian phọ ạmi rịphur ghan ịmi rụru.

⁸Mị alegheri ni mọ Ọmoogh-we phọ odi ni rꞌạmi oomo amem. Ọdi utuman ịmi kụ ịyaar kégboton dọl phọ ạmi.

⁹Ịduon kụ iḍighi kụ ologhi ạmi ạḅaal li. Uwaloor ạmi rabo ni. Ịyaar ịmi kíḍighi.

¹⁰Nạ kụ́wile ịmi ọmar iḍim. Nạ kámeera aḍizu Oye Aghuḍuul phọ ạna ẹḅor.

¹¹Nạ kuḍeenaan ịmi eten phọ ẹpe retorori ghan bọ kẹlogh ghuḍum. Ịduon mị odi bọ rꞌạna, ologhi ạmi ạḅaal li iboom, kụ rịngo ghan ịmi iboh kꞌagee-pọ.