Read abua Ạsuor 17 Bible Online

Ạsuor 17 - abua bible

Ạsuor 17

¹Ọmoogh-we, ler rụru ạnaghan emoghi phọ ạmi rꞌịiḅereghi phọ ạmi ịpe mị ụ́sighe bọ ologhi ẹḍim kụ rạaḅereghiom.

²Nạ kụ kasoph ọoruen ugheelemi ịmi, ịdi eḍighi bọ nạ kụ raagbo ghan ịiruen dị esel.

³Nạ alegheri ni ịitughian phọ ạmi. Nạ maru ụteeny ịmi ḍughul phọ; Nạ mạaḅeghion oomo ologhi ạmi apogh kụ nạ ọ́miin sịpioghom.

⁴Mị rạ́kaaph ghan ịkaraph ịdipho ạbueri phọ rọkaaph ghan bọ. Mị maḍighi ni ịpe nạ ạto bọ, Mị kőrelhe ghan reten awe igbagbaar eḍighinom ịyaar.

⁵Ịgbaranuom aruwol phọ ạmi rẹ́daph ghan reten ạbuphe rozirion bọ rạraar ạbunon awe kụ mị kọ̋piom ghan eten phọ ạna.

⁶Ẹnaan, mị ạmagh nyịna, nạ rạnaghan ghan ni nyịna. Ler rụru ạnaghan ịphen mị rạkaaph bọ.

⁷Uḍeenaan ịmi eboom ẹphomoghian phọ ạna kụ ụphel ịmi atene, nạ ọpo ạsighe bọ ḍịghaagh elhiom mọ ạna kạphel atene bụlo oḍighom nyịna.

⁸Uuko ịmi ịdipho ọony ekpeḍien phọ ạna, umuphonom ịmi, ạaghi ịmi eeḍian araphaaph phọ ạna.

⁹Ụsighe ịmi esi ạbuo ạsipioghom mọ rụgbiphoghom bọ ịmi. Arephelegbe ạbumulogh-ḍien ukoom ịmi.

¹⁰Igbiririph ílho pạ ologhi phọ ạbidi kụ rootuma ghan iituma bịninin.

¹¹Mụdaph ịmi, uko ịmi okitonom, rọwa ghan eepoogh onyu ạmi olher.

¹²Bịdi ọkigh ịdipho ạnam-dịka lọ ạaghian rekori ghan ọkiriph ạmi ịpherepe.

¹³Ọmoogh-we, ḅetenu. Sịghe elhool ẹgham mọ ạna asophoghom bụmulogh-ḍien phọ ạmi, ạkpar apu bịdi ụphelom ịmi rạghaagh ạbuo ạsipioghom mọ.

¹⁴Ọmoogh-we, sịghe ịminimiin phọ nạ aseenaan bọ bịdi ạlhiom bịdi rꞌạnmuny phọ ạbidi rꞌoghiil atum oghiil.

¹⁵Kụ mị kạmiin ni nyịna, ịdi eḍighi bọ mị ịkaraph úḍighi. Mem dị mị aḅetenu, mị kabo ni iboh iboom ọmeera aghisigh ạna.