Read abua Ạsuor 20 Bible Online

Ạsuor 20 - abua bible

Ạsuor 20

¹Ọmoogh-we phọ ạnaghanan ni nyịna mem lọ nạ odi esi ịiḅaghami; Ẹnaan phọ ạJekob ẹeḅaki nyịna!

²Ọdi aruom nyịna ọloghonaan ạḍighaagh dị ạḍua ẹpe Otu Ịiḅereghi phọ ọdi kụ aru. Ọmoogh-we phọ ạngo nyịna ọloghonaan ạḍighaagh dị ạḍua ẹpe Eegum ạZayon kụ aru!

³Ọdi ạatughian ghan ni oomo ạrikia phọ ạna; ḅịle ạrikia oguom ạnian phọ ạna ẹḅeeraan ni nyọdi!

⁴Ọdi ạngo nyịna ịpe nạ rạwa bọ, kụ aḍighi ịdi oomo igbiighi ạna kẹḅoph.

⁵Pọ kụ amem dị yoor ọlo ḍịolho iboh esi ọkpar opu ạna. Esi aḍien Ẹnaan phọ kụ yoor ogimogh sịlagba phọ ayoor. Ọmoogh-we phọ aḍighinaan ni nyịna ịpe nạ rạwa bọ.

⁶Nyịidipho kụ ẹdi mị alegheri mọ Ọmoogh-we phọ rạngo ghan ọkpar opu ọdaam mọ ọdi ạsaḅar bọ. Ọdi odi ẹpe ạdol iigbia phọ ẹpe kꞌạke kụ rạpagharanaan nyọdi, ḅịle esi ịikpo ọdi kạngo nyọdi ọkpar opu.

⁷Buniin oḍuom ologhi rughuugh-ude ẹgham ạbidi, buniin oḍuom ologhi rụsu ạbidi; kụ ọlo yira oḍuom ologhi ḍien Ọmoogh-we phọ Ẹnaan phọ ayira.

⁸Ọdo phọ awe phọ ạbuphe kokperenom yogh ni bịn omeleghu; kụ ọlo yira koḅerenu ni kụ ọmeregha kpiy.

⁹Ọmoogh-we, ngọ ọkpar opu ọdaam mọ; ụnaghanan iyoor mem lọ yoor ọmagh nyịna.