Read abua Ạsuor 21 Bible Online

Ạsuor 21 - abua bible

Ạsuor 21

¹Ọmoogh-we, ịnyaam mọ ạna rẹngo ghan ọdaam mọ ọḅaal ologhi. Ọdi raboom ni nyịna iboom loor ịdipho nạ ạphel bọ nyọdi.

²Nạ mạngo nyọdi ịpe ịitughian ologhi phọ ọdi rẹwa bọ, ḅịle nạ ọ́ḅitonaan ịpe ịidoronhu phọ ọdi ẹlhom bọ nyịna.

³Nạ mạseph nyọdi ạngo igeny, ạsighe eghoony agol azu nyọdi.

⁴Ọdi ạlhom nyịna ghuḍum kụ nạ ạngo nyọdi; ạḅaram ḍịkpo mọ ọdi ạrol abia.

⁵Eghuan phọ ọdi ẹbugh ni, loor ọloghonaan ạḍighaagh phọ ạna. Arughuenian rꞌigbogh kụ ịdi nạ ạḅaram bọ kụ ạngoom nyọdi.

⁶Ạḍiseph phọ nạ ạseph bọ nyọdi kẹtolonaan ni nyọdi kꞌagee-pọ; kụ elhor phọ ạna rẹngo ghan nyọdi ọḅaal ologhi.

⁷Ọmoogh-we Egbogh Ẹnaan, ọdaam mọ aḍuom ni nyịna ologhi, kụ loor ẹphomoghian phọ ạna rémuneen ghan bọ, dọl phọ ọdi, nyọdi kógboton.

⁸Ọdaam mọ kasiph ni oomo ạbumulogh-ḍien phọ ọdi. Ọdi kasiph ni tọrobo ọlo ạlogh nyọdi ḍien.

⁹Nạ kapiemi ni bịdi ịdipho aḍiboom ạnian, mem dị nạ amite. Ọmoogh-we phọ kạminogh ni bịdi rꞌọghagh ologhi, kụ ạnian ẹmoogh bịdi.

¹⁰Nạ kapiemi ni nmụny ạbidi sịen aḅirini phọ. Ọdaam mọ kạze ni oomo ạbidi.

¹¹Bịdi rogbiighiom ghan nyịna ịkaraph, kụ rọotughian ghan oguulom ạna, ịyaar bịdi kótue oḍighi.

¹²Bịdi kosumughu ni, mem lọ nạ ạkpami kụmugh phọ ạna kụ agbon ịkpina phọ asomoriom bịdi.

¹³Ọmoogh-we, yoor roboom ni nyịna loor iboom ịnyaam mọ ạna; yoor kọmoor ghan sụor kụ oboom ghan ịikpo phọ ạna.