Read abua Ạsuor 31 Bible Online

Ạsuor 31 - abua bible

Ạsuor 31

¹Ọmoogh-we, mị aḍigh ḍibuo ạna. Loor ariliom eḍighinom ạraraar phọ ạna, kámeera umugholoor usiph ịmi kꞌagee-pọ.

²Ler rụru ạna, ụnaghanan ịmi, aagborion aru ụphel ịmi ạsighe. Nạ kụ aḍighiigh ạmi dị ẹkpar, aḍibuo otu ạpeleeny ạmi.

³Nạ kụ aḍighiigh ạmi rꞌotu ạmi dị ophighi ọkparami. Loor esi aḍien phọ ạna urorori ịmi, urororiom ịmi rꞌẹepho.

⁴Ụutoghion ịmi ạsighe sịphe ọseki phọ bịdi ạaghian bọ ulherenaan ịmi. Nạ kụ ịnyaam ạmi.

⁵Mị ạḅogh uwaloor phọ ạmi ạlogh ḍịghaagh ạna. Nạ mụtagharan ịmi, Ọmoogh-we, Ẹnaan dị ọkpe rẹ́gba ghan.

⁶Nạ akel li bụphe rọoḅereghi ghan bọ oopho ạrumugh. Mị aḍuom Ọmoogh-we phọ ologhi.

⁷Mị kạḅaalami ni ologhi ạmi kụ mị abo, loor esi ẹphomoghian phọ ạna rémuneen ghan bọ. Nạ ạmiin ni ịminimiin phọ ạmi; nạ alegheri ni ịiḅaghami phọ ạmi.

⁸Nạ ịmi ụ́ḅogh bọ ụngo rạghaagh ạbumulogh-ḍien phọ ạmi. Nạ mụngo ịmi ẹereegh ọghi ekpisi lọ mị ạwa.

⁹Ọmoogh-we, ụnma ịmi ighirigiir, mị odi esi ịiḅaghami, amukum ologhi mạaḅaghami riḍien ạmi, mị maminonom amuneen.

¹⁰Mị odimom ghan rꞌọto rꞌịḅiphighu oomo ạsia aghuḍum mọ ạmi; ịnyaam ịmi ílho mun loor ịkaraph phọ ạmi ịḅarara ạmi mẹghola.

¹¹Mị maḍigh ạagia esi oomo ạmulogh-ḍien phọ ạmi ḅịle rꞌesi amatuman phọ ạmi. Mị mạghigh nonom esi iigbo phọ ạmi, kụ tọro ọlo ụmiin ịmi rasuma ghan bịn.

¹²Muwula ịmi bịn sịphe iloghi phọ ạbidi ịdipho oye lọ mamugh. Mị ạḅile ạkigh ọnyoki lọ aḅomaan,

¹³Mị rạnaghan ni dị ịbadi ạbidi roophola ghan, kụ aruugu rusiph ghan ịmi. Bịdi rumitonom ghan ịmi ruuzue roopuruan ghan ịlo ọsighe aghuḍum ạmi.

¹⁴Ọmoogh-we, mị aḍuom nyịna ologhi kụ mị rạḅem ghan mọ nạ kụ Ẹnaan ạmi.

¹⁵Amem mọ ạmi edi ḍịghaagh ạna. Ụphel ịmi ạsighe rạghaagh ạbumulogh-ḍien phọ ạmi, rꞌesi ạbuphe ruusophoghian bọ ịmi.

¹⁶Ḅạalami risigh ạna esi otelhedom mọ ạna; ụnma ịmi ighirigiir ụphel ịmi ạsighe.

¹⁷Ọmoogh-we, kámeera umugholoor usiph ịmi. Loor esi dị mị ạmagh nyịna, umugholoor asiph bụo ạsipioghom mọ; ịnhu ạbidi ikpom ẹpe ọmar iḍim.

¹⁸Kpomori yogh ịidoronhu ọkpe phọ ạbidi, bụphe rọgbaaghi ghan bọ ịlo orue kọḅam rụmhu ạbuo aruukuan phọ.

¹⁹Eḍighi ịikia iikia ịma ạraraar phọ ịpe nạ aseenaan bọ bụphe roghueni ghan bọ nyịna, ịpe nạ raako ghan bọ bụphe oḍuom bọ nyịna ologhi.

²⁰Nạ kạbooghi ni bịdi esi ịbooghian phọ ạna loor ịpe awe roosophoghian bọ bịdi. Bọoghi bịdi esi dị ịyaar bịdi kéḍighi; bịdi okpetenaan sinem ịruonu.

²¹Ạḍiseph ẹrolonaan Ọmoogh-we phọ, ịdi eḍighi bọ ọdi muḍeenaan ịmi ẹphomoghian phọ ọdi mem mọ uzuom bọ ịmi okitonom ẹpe egbogh ẹmha phọ.

²²Rꞌunmam bịn mị ạḅem mọ ọdi mạsighe riḍien ọdi esi ạmi, kụ ạri nạ ụnaghan ni ẹḍogh ịlom mọ ạmi, mem mọ mị amoghi bọ aphoghomiom nyọdi.

²³Ịpomoghian Ọmoogh-we phọ, nyina awe oḍuom-ologhi phọ ọdi. Ọmoogh-we phọ raako ghan bụo oḍuom-ologhi phọ ọdi, kụ rạkpeeghiom ghan bụo iituma ịdi ẹkasian ịkaraph phọ ạbidi.

²⁴Ịmoogh ạkpo ologhi, ẹkparam, oomo anyina phọ ạbuphe oḍuom bọ ologhi Ọmoogh-we phọ.