Read abua Ạsuor 34 Bible Online

Ạsuor 34 - abua bible

Ạsuor 34

¹Mị rạseph ghan Ọmoogh-we phọ oomo amem. Mị kạ́bile ghan oboom ọdi.

²Uwaloor ạmi raatumaam ghan Ọmoogh-we phọ; bụphe osooromi bọ loor ọnaghan ịphen phọ bịn iloghi ạbidi ẹḅaal.

³Itu ịdaph ịmi ọbughe Ọmoogh-we phọ, ọḅophoghan omitiom ḍien phọ ọdi.

⁴Mị ụmagh ni Ọmoogh-we phọ kụ ọdi ạnaghan kụ ụphagharanaan ịmi; kụ ụphel ịmi ạsighe esi eepuph phọ mị rakiil bọ.

⁵Bụphe rọgbiphoghom bọ ophogh nyọdi bịn oomanam, bịn umugholoor bịdi ósiph mun.

⁶Uwekulom oye phọ ọphon ạmagh Ọmoogh-we phọ, kụ ọdi ạphel nyọdi ạsighe esi oomo ịiḅaghami phọ ọdi.

⁷Ọokpaany Ọmoogh-we phọ atughan rꞌawe phọ ạbuphe rokueni ghan bọ nyọdi, kụ rạtophoron ghan bịdi kạsighe.

⁸Ịinema Ọmoogh-we phọ bịn nyina kẹmiin ni ẹnighe phọ ọdi; ạḍiseph rẹtolonaan ghan oye phọ ọpo aḍuom bọ ologhi nyọdi.

⁹Ịlogh eegu Ọmoogh-we phọ, nyina awe phọ ọdi. Ịyaar rékuom ghan oomo ạbuphe rọlogh bọ eegu phọ nyọdi.

¹⁰Rekuom ghan ni ugheel ạnam-dịka kụ rẹmiinom ghan ọkoony. Kụ ọlo ịyaar rékuom ghan bụphe rọwa bọ Ọmoogh-we phọ.

¹¹Nmụny phọ rꞌạnmanyaan phọ, itu ẹnaghan ịphen kịḅeni bọ inyina. Mị kịtughemi inyina ọlogh eegu Ọmoogh-we phọ.

¹²Ạnhian oye kụ ẹdi aghuḍum rạpu? Obia aḅirini phọ ọmiin aani igey rạpu?

¹³Pọ mạar ạphama nem ạna, kạ́ḅemogh sịkaraph; ạmaar ạphama ịidoronhu ạna, kạ́kaaph ghan ọghaaph iigbegheḍiom.

¹⁴Bịle oḍighi yogh ghan ịkaraph, aḍighi ghan igey, wạ ẹepho ạḅaram kụ ạrolom.

¹⁵Ariḍien Ọmoogh-we phọ esomoghi bụo aruukuan phọ ạḅile apoghoghomi reḅeri ọdi rạnaghan ghan emoghi ạbidi.

¹⁶Arisigh Ọmoogh-we phọ ókpoghoronu esi abuḍighinom ịkaraph phọ. Kapiemi ni bịdi sịen aḅirini phọ, kụ kọ́otughian ghan mun bịdi.

¹⁷Bụo aruukuan phọ omoghi, Ọmoogh-we phọ rạnaghanan ghan ni bịdi, kạḅile ạphel bịdi ạsighe esi ịiḅaghami.

¹⁸Ọmoogh-we phọ atuman bụo amukum ologhi phọ; ọdi rạpel ghan bụphe ụ́moogh mun bọ oḍuom-ologhi.

¹⁹Ịminimiin oye aruukuan ẹpughan, kụ ọlo Ọmoogh-we phọ rạpel ghan nyọdi kạsighe esi oomo ịminimiin phọ ọdi.

²⁰Ọmoogh-we phọ raako ghan oomo ịḅarara phọ ọdi, rꞌoniin ówunaan.

²¹Ịkaraph kẹze ni bụo ạsipioghom mọ, kụ koogulemi ni bụphe ọlogh bọ ḍien bụo aruukuan phọ.

²²Ọmoogh-we phọ mạtagharan ruwaloor abutelhedom mọ ọdi.