Read abua Ạsuor 36 Bible Online

Ạsuor 36 - abua bible

Ạsuor 36

¹Ịkaraph eḍigh ologhi ọkaraph oye phọ; ọdi ọ́moogh oghiilaan Ẹnaan rꞌọlogh ọdi eegu,

²ịdi eḍighi bọ ọdi rạatughian ghan mọ, “Oboom mọ ạmina; Ẹnaan rẹ́miin sịpioghom mọ ạmi.”

³Ọghaaph ọdi, ọghaaph iigbegheḍiom rꞌọkpe bịn, ọdi maghel olegheri ịyaar rꞌoḍighan ịlo ẹnighe.

⁴Ịkaraph igbiighi bịn kụ ịitughian ọdi mem lọ ọdi ạmina; aseerian loor phọ ọdi ịkaraph igbiighi, óghel sịpioghom.

⁵Ọmoogh-we, ẹphomoghian phọ ạna rémuneen ghan bọ edi ẹpe kꞌạke; oḍuom-ologhi phọ ạna asi ni ẹpe okuaḍio phọ.

⁶Aruukuan phọ ạna epoph ịdipho aruugum, ḅịle ịiruen phọ ạna ẹkel ịdipho eḍiiny ọphiiny. Nạ kụ raako ghan ịnam rꞌawe.

⁷Ẹnaan, pọ eeghia ịdi ẹphomoghian phọ ạna rémuneen ghan bọ ẹnighe, Awe rọbooghian ghan sịphe uba araphaaph phọ ạna.

⁸Yoor role ghan eḍien phọ ẹpe nạ ụngo bọ iyoor amuzeḍi ḅịle yoor rọpughol ghan mụum ọphiiny ẹnighe phọ ạna.

⁹Oomo ịnhu aghuḍum mọ ayoor edi ghan esi ạna; ạḍiḅaal phọ ạna kụ ẹdi yoor rọmiinom ghan eten.

¹⁰Ẹphomoghian ọnma ighirigiir phọ ạna esi ạbuphe olhegheri bọ nyịna kíkunughian; ạpeleeny phọ ạna ạrolonaan ni bụphe ọmoogh bọ igeny iloghi.

¹¹Kámeera awe oobaga ugbekian ịmi; kámeera kẹn ạḍighaagh oye ạsipioghom mọ igboton ịmi dọl.

¹²Monyuughi bụkaraph awe olereghi. Bịdi momeleghu, ịlo oḅetenu bịdi ílho mun.