Read abua Ạsuor 39 Bible Online

Ạsuor 39 - abua bible

Ạsuor 39

¹Ịdi mị rạḅem ghan ịduon: “Mị kạmaar ạpama loor phọ ạmi rꞌanem mọ ạmi, esi lọ mị rꞌạbuo ạsipioghom mọ kụ odi, ọbo mị kaḍighi ghan bọ ịkaraph.”

²Mị ạkurughan, aḅoorian, ạpama loor phọ ạmi, ịyaar mị ụ́ḅem ghạlamo ịlo ẹnighe ni; kụ ịminimiin phọ ạmi ẹbugh ghan bịn.

³Mị odimom rꞌokaphian oomiigh, kụ tọro amem lọ mị ạatughian bịn rịiḅaghami ịmi, kụ mị ạbile ghan rapuru.

⁴“Ọmoogh-we, mị kạtol dọl phọ ạḍien kꞌạpur amem? Mị kamugh pụr aḍio? Ụḅeni ịmi mem mọ aghuḍum mọ ạmi ạmuen kamuneen bọ.”

⁵Pogh aani, nạ makpere siḍughul-otu phọ ạmi, ị́man mun ẹezua ạḍighaagh ḅịle ạsia phọ ạmi kị́yaar mun esi ạna. Agey ni, tọrobo aḍigeny ạdol dị oye odi, ookpomoghi oomo phọ ạdol phọ ọdi oopho, oopho ni bịn.

⁶Oye ịdipho oogho, rakumuan ghan oopho arukumuan bịn, raakpomoghi ghan ẹelha phọ ọdi kaseerian kụ ọpo kaliom bọ ẹelha phọ ọdi ólhegheri.

⁷Kụ nyịidipho, Ọmoogh-we, mịna ụḅile rakori ghan eeghe? Mị aḍuom ni nyịna ologhi.

⁸Ụphel ịmi ạsighe esi oomo ạsipioman phọ ạmi. Kámeera mị aḍigh ạagia, ọbo bụo elologhi phọ kụmilogh ghan bọ ịmi.

⁹Mị makpomoghan, ọnhu mị rạ́tagharan ghan mun. Nạ kụ uḍighi bọ ịmi ịphen phọ.

¹⁰Sịghiogh sigbir phọ ạna loor ạmi. Mị mạghola ramuneen loor ikuphogh phọ ạna.

¹¹Nạ rạliom oye lọ aḍighi ịkaraph, pọ oroma ni; ḅịle nạ rapiemi ghan ẹnighe phọ ọdi ịdipho ophiliḅa asuphuugh. Agey ni, oye phọ oopho ịyaar ri bịn.

¹²Ọmoogh-we, nạghan ịiḅereghi phọ ạmi. Ler rụru ạnaghan emoghi phọ ạmi. Tue ụlhoghonaan ịmi ḍịghaagh mem lọ mị amoghi. Ịdipho ạbuḅel ạburude phọ ạmi, mị aḍighi ooruen ạna bịn esi ẹnum amem.

¹³Ụwile ịmi, mị ụmoogh aani ọḅaal ologhi, kụ egbi ọteeny amem egheel phọ ạmi, mem mọ mị kạ́tol mun bọ sịen aḅirini phọ.